އެޕްރީލް މަހު ފެށުމަށް ހަމަޖެހިފައިވާ އެފްއޭކަޕް ފުޓްބޯޅަ މުބާރާތުގެ ގުރުލުން ހުކުރު ދުވަހު ބޭއްވިއިރު، މުބާރާތުގެ އެންމެ ކާމިޔާބު ޓީމު ނިއުރޭޑިއަންޓް ސްޕޯޓްސް ކުލަބާއި މިސީޒަނުގެ ޕްރެޒިޑެންސް ކަޕްގެ ޗެމްޕިއަން އޮޑި ސްޕޯޓްސް ކުލަބު މުބާރާތުގެ ކުއާޓާ ފައިނަލުގައި ވާދަކުރަން ޖެހިއްޖެއެވެ.
10 އެޕްރީލް 2026 އިން 18 އެޕްރީލް 2026 ނިޔަލަ ކުރިއަށްދާ މިސީޒަނުގެ އެފްއޭކަޕް ފުޓްބޯޅަ މުބާރާތުގައި ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށްގެންދިއުމަށް ހަމަޖެހިފައިވަނީ ނޮކްއައުޓް އުސޫލުންމެވެ.
އެގޮތުން މުބާރާތުގެ ކުއާޓާ ފައިނަލް ހަތަރު މެޗު އެޕްރީލް މަހުގެ 10 އަދި 11 ވަނަ ދުވަހު ކުޅުމަށް ހަމަޖެހިފައިވާއިރު، ސެމީފައިނަލް ދެމެޗު ކުޅުމަށް ތާވަލުކުރެވިފައިވަނީ އެޕްރީލް 15 ވަނަ ދުވަހު އެވެ. އަދި މުބާރާތުގެ ފައިނަލް ކުޅުމަށް ތާވަލުކުރެވިފައިވަނީ އެޕްރީލް 18 ވަނަ ދުވަހުގެ ރޭ އެވެ.
އެގޮތުން މުބާރާތުގެ ކުއާޓާ ފައިނަލުގައި އެންމެ ފާހަގަކޮށްލެވޭ މެޗަކީ މި މުބާރާތުގައި މުޅިން އަލަށް ވާދަކުރާ އޮޑި ސްޕޯޓްސް ކުލަބާއި އެފްއޭކަޕްގެ ތާރީޚުގައި އެންމެ ކާމިޔާބު ކުލަބު ނިއުރޭޑިއަންޑް ވާދަކުރާ މެޗެެވެ. ނިއު އިން މި މުބާރާތް 12 ފަހަރަށް ކާމިޔާބުކޮށްފައިވާއިރު، އޮޑިން ވަނީ އެކުލަބު ފުރަތަމަ ޑިވިޝަންގައި ވާދަކުރި ފުރަތަމަ ސީޒަނުގައި ވެސް ލީގުގެ ދެވަނަ ހޯދުމުގެ އިތުރުން ޕްރެޒިޑެންޓްސް ކަޕް ކާމިޔާބުކޮށްފައެވެ.
ކުއާޓާގެ ދެވަނަ މެޗުގައި އޭޕްރީލް 10 ވަނަ ދުވަހުގެ ރޭ ކުލަބު އީގަލްސް އާއި ބްލޫޒް ސްޕޯޓްސް ކުލަބް ވާދަކުރާއިރު، އެޕްރީލް 11 ވަނަ ދުވަހުގެ ހަވީރު ޓީސީ ސްޕޯޓްސް ކުލަބުން ނުކުންނާނީ ވިކްޓްރީ ސްޕޯޓްސް ކުލަބާއި ދެކޮޅަށެވެ. އަދި ކުއާޓާގެ ފަހު މެޗުގައި އެރޭ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ނުކުންނާނީ ބުރު ސްޕޯޓްސް ކުލަބާއި ދެކޮޅަށެވެ.
މީގެ އިތުރުން އެކި ސަބަބުތަކާއި ހުރެ ފާއިތުވެދިޔަ ތިން އަހަރު އެފްއޭކަޕް ފުޓްބޯޅަ މުބާރާތް ނުބޭއްވި ދިޔައިރު، މިއީ ފާއިތުވެދިޔަ 10 އަހަރު ތެރޭގައި މި މުބާރާތް ބާއްވާ ތިންވަނަ ފަހަރެވެ.