ރައީސް އަވަހާރަކޮށްލަން ބާރުގަދަ ބޮމެއް ގޮއްވާލި މައްސަލައިގެ ތަހުގީގަށް ހޯދާ އަށް މީހަކު ވަގުތުން ރާއްޖެ އައުމަށް ނެޝެނަލް އިންކުއަރީ ކޮމިޝަނުން މިއަދު ގޮވާލައިފި އެވެ. ރައީސް އޮފީހުގައި ބޭއްވި ނިއުސް ކޮންފަރެންސެއްގައި ހޯމް މިނިސްޓަރު އަދި އެ ކޮމިޝަނުގެ ކޯޗެއާ އުމަރު ނަސީރު ވިދާޅުވީ ތަހުގީގަށް ބޭނުންވާ އަށް މީހަކު މިހާރު ތިބީ ރާއްޖެ އިން ބޭރުގައި ކަމަށެވެ. ކޮމިޝަނުން މިހާރު ހޯދަމުން އަންނަ އެންމެންނަކީ ވެސް ލޯންޗް މައްސަލާގައި ހައްޔަރުކޮށްފައިވާ ނައިބު ރައީސް އަހްމަދު އަދީބާ ގާތްގުޅުންތައް އޮންނަ މީހުންނެވެ. ތަހުގީގަށް ހޯދަން ބޭނުން ވަނީ، މިނިސްޓަރު ވިދާޅުވި ގޮތުގައި، މުހަންމަދު އައްލާމް ލަތީފް (މޮހޯ) މ. ސެސްނާ އާއި މުހަންމަދު ހުސެއިން (އޮއިއްޓޭ) ގ. އޮއިވާލި އާއި ހއ. މުރައިދޫ، ވައިޖެހޭގޭ މުހަންމަދު
ވިޝާމާއި ކ. ދިއްފުށީ ރަތް ބަގީޗާގެ އަހުމަދު ފާތިހާއި ހ. އައިދާ، މުހަންމަދު އަސީލް އަހުމަދާއި ޅ. ހިންނަވަރު ނައިލޯންގޭ އަހުމަދު އަޝްރަފު
(ޝުމްބާ ގޮންގް) އާއި ހ. ރަންވިލާގެ ހުސެއިން ސިނާނާއި މ. ލޭންޑް އޮފް ގާޑަން، އަހުމަދު އިޝްފާހު އަލީ އެވެ."މި މީހުން
އައިސް ތަހުގީގަށް އެއްބާރުލުން ދިނުން އެދެން. އެހެން ނޫނީ އިންޓަޕޯލް
މެދުވެރިކޮށް ގެންނަން ރެޑް ނޯޓިސް ނެރޭނަން. އަޅުގަނޑު މި ގޮވާލަނީ އެ މީހުން އަންނަން.
އެ މީހުންނަށް މިހާރު އެނގޭނެ އެއީ މި ތަހުގީގަށް ބޭނުންވާ މީހުންކަން،" އުމަރު ވިދާޅުވި އެވެ. ޕްރެސް ކޮންފަރެންސްގައި އުމަރު ވާހަކަ ދައްކަވަނީ. --ހަވީރު ފޮޓޯ އުމަރު ވިދާޅުވި ގޮތުގައި އަށް މީހުން ވެސް ހޯދަނީ ތަހުގީގަށް ކޮންމެހެން ބޭނުންވެގެންނެވެ. ރައީސް އަވަހާރަކޮށްލަން އުޅުނު ކަމުގެ ތުހުމަތުގައި ނައިބު ރައީސް އަދީބާއެކު ހައްޔަރުކޮށްފައި ތިބި މީހުންގެ އަދަދެއް އުމަރު ވިދާޅެއް ނުވި އެވެ. މިނިސްޓަރު ވިދާޅުވީ ތަހުގީގަށް ހައްޔަރުކޮށްފައި ތިބި މީހުންގެ ފަރާތުން އެއްބާރުލުން ލިބެނީ ވަރަށް ކުޑަކޮށް ކަމަށެވެ. ނަމަވެސް ތަހުގީގުގައި ބޮޑެތި ކުރިއެރުންތަކެއް ލިބެމުން އަންނަ ކަމަށް އޭނާ ވިދާޅުވި އެވެ.