ސްޓެލްކޯގެ އެންމެ ބޮޑު ތިން ޖަނަރޭޓަރު ފެއިލްވެ، މާލޭގެ ބޮޑު ބަޔަކުން މިއަދު މެންދުރު ފަހު ކަރަންޓް ކެނޑިއްޖެ އެވެ.
ސްޓެލްކޯގެ އޮފިޝަލަކު ވިދާޅުވީ މެންދުރުފަހު 00: 2 ހާއިރު ކަރަންޓް
ކެނޑުނީ ޖަނަރޭޓަރަކަށް ދިމާވި ޓެކްނިކަލް މައްސަލައަކާ ގުޅިގެން
ކަމަށެވެ. އަދި އެ މައްސަލަ ދިމާވީ ކީއްވެގެންކަން އެނގިވަޑައިނުގަންނަވާ
ކަމަށް އޭނާ ވިދާޅުވި އެވެ.
"މިހާ ލޯޑު ބޮޑު ގަޑިއެއްގައި އެއް ޖަނަރޭޓަރު ފެއިލްވުމުން އަނެއް
ދެ ޖަނަރޭޓަރު ވެސް ފެއިލްވީ. އެކަން ދިމާވި ސަބަބެއް މިގެންދަނީ
ބަލަމުން،" އެ އޮފިޝަލް ވިދާޅުވި އެވެ.
ޖަނަރޭޓަރަށް ދިމާވި މައްސަލައާ ގުޅިގެން ކަރަންޓް ކެނޑުނު
ސަރަހައްދުތަކަށް އަލުން ކަރަންޓު ދޭން ފެށުނީ އޭގެ ގަޑިއެއްހާއިރު
ފަހުންނެވެ. ސްޓެލްކޯގެ އޮފިޝަލް ވިދާޅުވީ ކަރަންޓް ކެނޑުނު ހުރިހާ
ސަރަހައްދަކަށް އަލުން ކަރަންޓް ދޭން ފެށޭނެ އިރެއް އެނގިވަޑައިނުގަންނަވާ
ކަމަށެވެ.
ގާތްގަނޑަކަށް 130،000 މީހުން ދިރިއުޅޭ މާލޭގައި ކަރަންޓް
ބޭނުންކުރާ މިންވަރު އަހަރަކު އެވްރެޖްކޮށް ތިން މެގަވޮޓް އިތުރުވާ
ކަމަށްވެ އެވެ.
ސްޓެލްކޯ އިން ބުނި ގޮތުގައި މާލެ އަށް ކަރަންޓް ދޭން 13
ޖަނަރޭޓަރެއް ބަހައްޓާފައިވެ އެވެ. އޭގެ ތެރޭގައި 6500 ކިލޯވޮޓްގެ ދެ
ޖަނަރޭޓަރާއި 5000 ކިލޯވޮޓްގެ އެއް ޖަނަރޭޓަރާއި 4000 ކިލޯވޮޓްގެ އެއް
ޖަނަރޭޓަރާއި 2000 ކިލޯވޮޓް ތިން ޖަނަރޭޓަރު އަދި އެއް މެގަ ވޮޓްގެ ހަ
ޖަނަރޭޓަރު ހިމެނެ އެވެ.
މާލެ އަށް އިމަޖެންސީ ކަރަންޓް ދިނުމަށް 2010 ވަނަ އަހަރު، 1.6 މެގަވޮޓްގެ ފަސް ޖަނަރޭޓަރު ގެނެސް އިންސްޓޯލްކޮށްފައިވެ އެވެ.
އެ ކުންފުނިން ވަނީ މިހާރު ހިންގާ ކަރަންޓް މަޝްރޫއުގެ ދަށުން 8،000
ކިލޯ ވޮޓްގެ ދެ ޖަނަރޭޓަރު ގުޅާލައި ޓެސްޓްކުރަން ފަށައިފަ އެވެ. އަދި
މިމަހުގެ ފަހުކޮޅު އެ ޖަނަރޭޓަރުތައް ބޭނުންކުރަން ފެށޭނެ ކަމަށް ވެސް
ސްޓެލްކޯ އިން ބުނެފައިވެ އެވެ.