ފިތުރު އީދާއި ގުޅިގެން ހދ. ހަނިމާދޫގައި ބާއްވާ "ކެތިއަރާ މަސް ރޭސް 2016" މިއަދު ހަވީރު ފެށިއްޖެއެވެ.
ހަނިމާދޫ ބަނދަރު ސަރަހައްދުގައި ބޭއްވި ރަސްމިއްޔާތެއްގައި މަސްރޭސް ފަށްޓަވައިދެއްވީ ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަލްފާޝިލް ހުސައިން ޝަހުދީއެވެ. މަސްރޭސް ފެށުން އިފްތިތާހް ކުރެވިގެން ދިޔައީ އެކަމަށް ޚާއްސަ ކުރެވިފައިވާ ކޭކެއް ފެޅުމާއެކުގައެވެ.
ހަނިމާދޫ ޒުވާނުންގެ ޖަމްޢިއްޔާއާއި ކެތިއަރާ ގުޅިގެން ހަނިމާދޫއަށް ޚާއްސަކޮށްގެން ބާއްވާ މި މަސްރޭހުގައި މިއަހަރު 8 ޓީމު ބައިވެރިވެއެވެ. މިއަހަރުގެ މަސް ރޭހުގައި ބައިވެރިވާ ޓީމު ތަކަކީ، ޓީމު ބަރުކޮލި، ޓީމް ހިބަރު، ޓީމް މަޑިހަން، ފަޅުމަތި، ދިރުން ފިޝިންގ ޓީމް، ސީހޯސް، ދޯކާ އަދި ދޯނި ހަތިފުށްޓެވެ. މިއީ މުޅިންވެސް ހަނިމާދޫއިން ބައިވެރިވެފައިވާ ޓީމުތަކެވެ.
މަސްރޭހުގައި ބައިވެރިވާ ހުރިހާ ޓީމުތައް މިއަދު ހަވީރު 4:00 ގައި މަހަށް ފުރާފައިވާއިރު، ޓީމުތައް މަހުން އެނބުރި އަންނަން ހަމެޖެހިފައިވަނީ މިރޭ 9:30 ގައެވެ.
މިއަހަރުގެ މަސްރޭހުން އެންމެގިނަ މަސް ބާނާ ޓީމަކަށް 6،000 ރުފިޔާގެ ފައިސާގެ އިނާމު ދިނުމަށް ހަމަޖެހިފައިވާއިރު، ދެވަނައަށް އަންނަ ޓީމަކަށް ދިނުމަށް ހަމަޖެހިފައިވަނީ 3،000 ރުފިޔާއެވެ. އަދި ތިންވަނައަށް އަންނަ ޓީމަކަށް ދިނުމަށް ހަމަޖެހިފައިވަނީ 5،00 ރުފިޔާއެވެ.
މީގެއިތުރުން، އެންމެ ގިނަމަސް ބާނާ ކެޔޮޅަކާއި، އެންމެ ދިގުމަސް ބާނާ ކެޔޮޅަކާއި، އެންމެ ބޮޑުމަސް ބާނާ ކެޔޮޅަކު ހޮވައި އިނާމު ދިނުމަށް ވަނީ ހަމަޖެހިފައެވެ.
ކެތިއަރާ މަސްރޭސް މިދިޔަ އަހަރުވެސް ވަނީ ބާއްވާފައެވެ. މިދިޔަ އަހަރާ އަޅާ ބަލާއިރު މިއަހަރުގެ ރޭހަށް ލިބުނު ތަރްހީބު އިތުރުވެފައި، ބައިވެރިވި ޓީމުތައްވެސް އިތުރުވެފައިވާކަން މަސްރޭސް އިންތިޒާމުކުރާ ކެތިއަރާއިން ފާހަގަކުރެއެވެ.
ކެތިއަރާއިން ބުނެފައިވަނީ، ފިތުރު އީދާ ގުޅިގެން މިފަދަ މަސްރޭހެއް ބާއްވަނީ، ހަނިމާދޫގެ ޒުވާނުން މަސްވެރިކަމަށް ޝައުގުވެރި ކުރުވައި، ފިތުރު އީދަކީ މަސްވެރިކަމުގެ ހަރަކާތްތަކަށް ޚާއްސަ އީދަކަށް ހެދުން ކަމަށެވެ. މި ރޭހަށް ހަނިމާދޫ މަސްވެރިންގެ ސަޕޯޓްވެސް ވަރަށް ބޮޑަށް ލިބެއެވެ.
މިއަހަރުގެ ފިތުރު އީދާ ގުޅިގެން ކެތިއަރާއިން އިންތިޒާމުކޮށްގެން ބާއްވާ މަސްރޭސް މިހާރު ފެށިފައިވާއިރު، ކެތިއަރާއިން އިންތިޒާމުކޮށްގެން ބާއްވާ ކުޑަކުދިންގެ ހަވީރު ހަނިމާދޫ ބަނދަރު ސަރަހައްދުގައި މިހާރު ފެށިގެން ކުރިއަށް އެބަދެއެވެ.
މި ކުޑަކުދިންގެ ހަވީރުގައި، ކުޑަކުދިންނާ ގުޅޭ ވަރަށް ގިނަ ހަރަކާތްތައް ހިނގަމުންދާއިރު، ހަނިމާދޫގެ ވަރަށް ގިނަ އަދަދެއްގެ ކުޑަކުދިންނާއި އާއިލާތައް ކުޑަކުދިންގެ ހަވީރުގައި ބައިވެރިވަމުންދެއެވެ.