ޝަރީއަތުގައި މިހާރު އޮތް، ފެނަކަ ކުންފުނީގެ ކުރީގެ އެމްޑީ، އަހްމަދު ސައީދުގެ މައްޗަށް ކޮރަޕްޝަނުގެ ތުހުމަތު ކުރެވޭ މައްސަލައިގައި ހިމެނޭ، ކައިޒާން އިންވެސްޓްމެންޓް ކުންފުންޏަށް، 7.2 މިލިއަން ރުފިޔާ ދައްކަން ފެނަކައިގެ މައްޗަށް ހުކުމެއް ކޮށްފިއެވެ. ޓްރޭޑް މިނިސްޓްރީގެ ޕޯޓަލްއިން ދައްކާ ގޮތުގައި ކައިޒާން އިންވެސްޓްމަންޓަކީ އިސްމާއިލް ޒާހިދު ކިޔާ މީހެއްގެ އަމިއްލަ ނަމުގައި އޮންނަ ސޯލް ޕްރޮޕެޓީޝިޕް ވިޔަފާރިއެކެވެ. ފެނަކަ ސައީދުގެ މައްޗަށް ތުހުމަތު ކުރެވޭ ކޭސްގައި ހިމެނޭ ގއ. މާމެންދޫ އައިސް ޕްލާންޓަކީ ކައިޒާންގެ ވެރިޔާ ލ. މާމެންދޫގައި ގާއިމުކުރި އައިސްޕްލާންޓެކެވެ. ސިވިލް ކޯޓުން މިދިޔަ ހަފުތާގައި ނިންމި މި މައްސަލަ ޒާހިދުގެ ފަރާތުން ހުށަހެޅީ އައިސްޕްލާންޓަށް ފެނަކައިން ދައްކަން ޖެހޭ ފައިސާގެ ތެރެއިން ނުދައްކައިވާ 7.2 މިލިއަން ރުފިޔާ ހޯދާށެވެ. އެއީ އެ މުއާމަލާތާ ގުޅިގެން ގެއްލުމުގެ ބަދަލުގެ ގޮތުގައި 580،155.68ރ. އާއި ޝަރީއަތުގެ ޚަރަދުގެ ގޮތުގައި އެއް ލައްކަ ރުފިޔާއެވެ. ޒާހިދުގެ މި ދައުވާއާ ގުޅިގެން ޝަރީއަތުގައި ފެނަކައިންވަނީ އައިސް ޕްލާންޓަށް ނުދައްކައިވާ 7.2 މިލިއަން ރުފިޔާ ދައްކަން ޖެހޭ ކަމަށް އެއްބަސްވެފައެވެ. އެހެންނަމަވެސް، ގެއްލުމުގެ ބަދަލުގެ ފައިސާ އާއި ޝަރީއަތުގެ ޚަރަދުގެ ބައި ދެއްކުމަށް ފެނަކައިންވަނީ ޝަރީއަތުގައި އިންކާރުކޮށްފައި ކަމަށް މައްސަލަ ނިމުނު ގޮތުގެ ރިޕޯޓުގައި ބަޔާންކޮށްފައިވެއެވެ. އޭގެ ސަބަބެއް ކަމަށް ބުނީ އެއްބަސްވުމުގައި މި ކަމަށް އެއްބަސްވެފައި ނުވުމެވެ. މި މައްސަލައިގައި ސިވިލް ކޯޓުގެ ގާޒީ އަލީ އަބްދުﷲ މިދިޔަ ހަފުތާގައި ހުކުމް ކުރެއްވީ، ޝަރީއަތުގެ ޚަރަދަށްވާ ބައިގެ ތަފުސީލް ނެތުމުން އެ ބައި ނަގައިނުދެވޭނެ ކަމަށެވެ. އަދި ގެއްލުމުގެ ބަދަލުވެސް ނަގައި ނުދީ، ހުކުމްކޮށްފައިވަނީ އައިސް ޕްލާންޓަށް ނުދައްކައިވާ 7.2 މިލިއަން ރުފިޔާ 30 ދުވަހުގެ ތެރޭގައި ދެއްކުމަށެވެ. https://sun.mv/208473 ފެނަކައިގެ ކުރީގެ މެނޭޖްމަންޓުން، ލ. މާމެންދޫގައި ކައިޒާން އިންވެސްޓްމަންޓުން ގާއިމުކޮށްފައިވާ އައިސްޕްލާންޓް، އެ ކުންފުންޏަށް ގަތުމުގައި ކޮރަޕްޝަނަށް މަގުފަހިވާގޮތަށް ޢަމަލުތަކެއް ހިންގާފައިވާކަމަށް ތުހުމަތު ކުރެވޭތީ މިދިޔަ މޭ މަހުގެ 20ވަނަ ދުވަހު ޕީޖީ އޮފީހުން ވަނީ ސައީދަށް ދައުވާ ވެސް ކޮށްފައެވެ. ސައީދުގެ މައްޗަށް ކޮށްފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއެވެ.