އިޒްރޭލުގެ ގައުމީ ސަލާމަތާ ބެހޭ ވަޒީރު، މަސްޖިދުލް އަގްސާއަށް ވަދެގަތުން ހަރުކަށި އިބާރާތުން ކުށްވެރި ކުރާ ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން ނެރުނު ނޫސްބަޔާނެއްގައި ބުނީ، މިއީ އިސްލާމީ މުގައްދަސް ބިނާތަކުގެ ހުރުމަތް ކަނޑާލުމުގެ އިތުރުން، އެފަދަ ތަންތަނުގެ ދީނީ އަދި ތާރީހީ ހައިސިއްޔަތު ބަދަލުކުރުމަށް ތަކުރާރުކޮށް އިޒްރޭލުން ކުރަމުންދާ އަމަލެއްކަން ފާހަގަކުރާ ކަމަށެވެ. މިއީ ބައިނަލްއަގްވާމީ ގާނޫނުތަކާ ހިލާފު އަމަލެއް ކަމުގައި ދިވެހި ސަރުކާރުން ގަބޫލުކުރާ ކަމަށެވެ.
މިއީ ފަލަސްތީނުގެ ލޮބުވެތި ރައްޔިތުންނާއެކު ދުނިޔޭގެ 2 ބިލިއަނަށްވުރެ ގިނަ މުސްލިމުންގެ ހައްގުތަކަށް އަރައިގަތުމުގެ އަމަލެއް ކަމުގައި ދެކޭ ކަމަށް ވެސް ފޮރިން މިނިސްޓްރީން ބުނެއެވެ. މިފަދަ އަނިޔާވެރި އަމަލުތައް ހިންގުން ހުއްޓުވުމަށާއި ބައިނަލްއަގްވާމީ ގާނޫނުތަކާއި އިންސާނީ ހައްގުތަކަށް އިހްތިރާމުކުރުން ކަށަވަރުކުރުމަށް ހަރުދަނާ، އަވަސް ފިޔަވަޅުތަކެއް އެޅުމަށް ބައިނަލްއަގްވާމީ މުޖުތަމައަށް ގޮވާލާ ކަމަށް ފޮރިން މިނިސްޓްރީން ބުނެއެވެ.
މި ހަމަނުޖެހުމަށް ދެމެހެއްޓެނިވި، ސުލްހަވެރި ހައްލެއް ގެނެވޭނީ 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަން ކުރާ ރަށްކަމުގައި ކަނޑައަޅައި، އެއީ މިނިވަން، މުސްތަގިއްލު އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްތީނުގެ ދައުލަތް ގާއިމު ކުރުމުން ކަމުގައި ދެކޭ ކަމަށް ފޮރިން މިނިސްޓްރީން ބުނެއެވެ.
މީގެ ކުރިން ވެސް އަލްއަގްސާ މިސްކިތަށް ޔަހޫދީން ވަދެ، މިސްކިތުގެ ހުރުމަތް ކަނޑާފައި ވެއެވެ. އެގޮތުން ޔަހޫދީ ގުރޫޕްގެ ހައްދުފަހަނަ އަޅާފައިވާ ނަތަންޔާހޫގެ ކެބިނެޓްގައި ހިމެނޭ ނޭޝަނަލް ސެކިއުރިޓީ މިނިސްޓަރު ބެން-ގަވިއާ އަލްއަގްސާ މިސްކިތުގެ ގޯތި ތެރެއަށް ވަދެ ޔަހޫދީ ދީނުގެ ލަވަ ކިޔާފައި ވެއެވެ. އެ މަންޒަރު ފެންނަ ވީޑިއޯ ސޯޝަލް މީޑިއާގައި އާންމު ވެފައިވާ އިރު، ގިނަ ބަޔަކު އޭރު ހިންގި މި އަމަލުތައް ވެސް ވަނީ ކުށްވެރިކޮށްފައެވެ.