ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރަކަށް މުހައްމަދު މައުރޫފް ޖަމީލު، މިއަދު އައްޔަނު ކުރައްވައިފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ބުނެފައިވަނީ އެޗްޑީސީގެ މެނޭޖިން ޑިރެކްޓަރުގެ މަގާމަށް މ. ދޫރެސް، މުހައްމަދު މައުރޫފް ޖަމީލު މިއަދު އައްޔަނު ކުރައްވާފައިވާ ކަމަށެވެ.
ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި ކޮންސްޓްރަކްޝަން މިނިސްޓަރުގެ މަގާމުވެސް މައުރޫފް ޖަމީލް އަދާކުރެއްވި އެވެ. އަދި އެޗްޑީސީގެ ސީއީއޯގެ މަގާމުވެސް ދުވަސްކޮޅަކަށް އަދާކުރެއްވި އެވެ.
އެޗްޑިސީގެ އެމްޑީގެ މަގާމުގައި ހުންނެވި ފަޒުލް ރޭގެ ވަގުތެއްގައި ވަނީ މަގާމުން އިސްތިއުފާ ދެއްވާފަ އެވެ. މަގާމުން އިސްތިއުފާ ދެއްވާ ރައީސް ޑރ. މުހައްމަދު މުއިއްޒުއަށް ފޮނުއްވި ސިޓީގައި ފަޒުލް ވިދާޅުވީ، އެޗްޑީސީގެ އެމްޑީގެ މަގާމުގައި ހޭދަކުރި މުއްދަތުގައި އެކިގޮތްގޮތުން އެކި ޕްލެޓްފޯމްތަކުގައި، ކުރިން އަދި މިހާރު ކުރަމުންދާ ތުހުމަތުތަކަށް އިންކާރު ކުރައްވާ ކަމަށެވެ. އަދި މަގާމުން އިސްތިއުފާ ދެއްވަނީ، ތަހުގީގަށް ފުރުސަތު ދިނުމަށް އަދި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން ކަމަށްވެސް ވިދާޅުވި އެވެ.
ފަޒުލް މަގާމުން އިސްތިއުފާ ދެއްވާފައިވާއިރު، ބިންވެރިޔާ ސްކީމަށް ޝަރުތު ހަމަނުވާ ފަޒުލްގެ ބޭބެ މުހައްމަދު ފަޒީލް ރަޝީދުގެ ނަން ލިސްޓުގައި ހިމަނައި އޭނާއަށް ގޯތީގެ ރެޖިސްޓްރީއެއް ހަދައިފައިވާ މައްސަލަ އަންނަނީ ތަހުގީގު ކުރަމުންނެވެ. މި މައްސަލައިގައި ފަޒުލްއާއި އޭނާގެ ބޭބެގެ ޕާސްޕޯޓް އޮތީ ހިފަހައްޓާފަ އެވެ.