500 ކިލޯއަށްވުރެ ގިނަ މަޑި މަހާއި މިޔަރު މަސް ބޭރު ކުރަން އުޅުނީ "ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުން ކަމަށް ކަސްޓަމްސްއިން ބުނެފިއެވެ.
ކަސްޓަމްސް އިން ރޭ އެކްސްގައި ކުރި ޕޯސްޓެއްގައި ބުނީ، 07 ނޮވެންބަރު 2024 ދުވަހު ކަސްޓަމްސްއިން ބަލައި ފާސްކުރި މުދާ ޝިޕްމެންޓެއްގެ ތެރެއިން މިޔަރު މަހާއި މަޑި މަސް ހުރި 45 (ސާޅީސް ފަހެއް) ފޮށިގަނޑު (ޖުމުލަ 582 ކިލޯގްރާމް) ފެނިފައިވާ މައްސަލައެއް އެ ސަރވިސްއިން ތަހްގީގްކުރަމުންދާ ކަމަށެވެ.
މި ޝިޕްމެންޓް ކަސްޓަމްސްއަށް ޑިކްލެއަރ ކޮށްފައިވަނީ "ދަ ކްރިސްޓަލް ކޮންޕެނީ ޕްރައިވެޓް ލިމިޓެޑް" ނަމަކަށް ކިޔާ ކުންފުންޏަކުންނެވެ.
ކަސްޓަމްސް
މިއާއެކު ކަސްޓަމްސްއިން ބުނީ، މިކަމާ ގުޅިގެން ކަސްޓަމްސްއާއި ކަމާބެހޭ އެހެން އިދާރާތަކުން ބަލަންޖެހޭ ބެލުންތައް ބެލުމަށްފަހު، ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށްފަހު 2024 ޑިސެމްބަރު 22 ވަނަ ދުވަހު އެ ތަކެތި ނައްތާލާފައިވާ ކަމަށެވެ. 
އިކޮނޮމިކް މިނިސްޓްރީގެ ބިޒްނަސް ޕޯޓަލުން އެނގޭ ގޮތުގައި ދަ ކްރިސްޓަލް ކޮމްޕެނީގެ ހިއްސާދާރުންގެ ގޮތުގައި އެ މިނިސްޓްރީގައި ރެޖިސްޓްރީ ކޮށްފައި އޮތީ، ދިވެހި ފިލްމު ޑައިރެކްޓަރު، ފާތިމަތު ނަހުލާ އާއި އޭނާގެ ފިރިމީހާ ހަސަން ސިނާން އެވެ. އެ ވިޔަފާރި ރެޖިސްޓްރީ ކޮށްފައި އޮތީ ވެސް ނަހުލާގެ ގެ، މއ. ކަބީލާގެ އަށެވެ.