މެދުއިރުމަތީގައި ކުރަމުންދާ ހަނގުރާމައާއި ގުޅިގެން ރާއްޖެއިން ތެލާއި ގޭހަށް ނުޖެހޭނެ ކަމަށާއި މެދުކެނޑުމެއްނެތި ރާއްޖެއަށް ކާޑު ވެސް ލިބޭނެ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ. މިއަދު ބޭއްވި ނޫސްވެރީންގެ ބައްދަލުވުމުގައި ވާހަކަދައްކަވަމުން ސައީދު ވިދާޅުވީ ބައިނަލްއަގްވާމީ މާކެޓްތަކުގައި ތެލުގެ އަގަށް އިއްޔެ ބަދަލުތަކެއް އައިސްފައިވާ ކަމަށެވެ. އެގޮތުން 25 ޕަސެންޓާއި 30 ޕަސެންޓަށް ތެލުގެ އަގު އުފުލިގެން ދިޔަކަން ވަނީ ފާހަގަކުރައްވައިފައެވެ. މެދުއިރުމަތީގައި ކަމެއް ދިމާވެއްޖެ ނަމަ އެންމެ އަވަހަށް އަސަރުކުރާ ތަކެތީގެ ތެރޭގައި ތެޔޮ ހިމެނޭކަން ފާހަގަކުރައްވައިފައެވެ. އަދި މިފަހަރުގެ ހަނގުރާމައާއިއެކު ގޭސް ވެސް އޭގެތެރެއަށް ވަދެފައިވާކަމަށާއި ހުރިހާ މުދަލަކަށް ހަނގުރާމައިގެ ސަބަބުން އަސަރުކޮށްފައިވާކަން ސައީދު ވަނީ ފާހަގަކުރައްވާފައެވެ. މިނިސްޓަރު ސައީދު ވިދާޅުވީ ރާއްޖޭގައި ތެލުގެ ކަންކަން މެނޭޖުކުރަނީ އެފަދަކަމެއް ދިމާވެދާނެ ކަމަށް ދުރާލައި ވިސްނައިގެން ކަމަށެވެ. އެހެންވެ މާކެޓަށް އަންނަ ބަދަލާއި މުދާލިބޭނީ ކޮން ދިމާލަކުންތޯ ވަރަށް ފަރުވާތެރިކަމާއެކު ބަލަމުން އަންނަކަމަށް ވިދާޅުވިއެވެ. އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަކަށް އެއްވެސް ކަންބޮޑުވުމެއް އަދިއެއް ނެތް. ކުރުކޮށް ދަންނަވަންޏާ ތެލަކަށް ނުޖެހޭނެ. އިނގޭތޯ. އެލްޕީޖީވެސް އަދި ތެޔޮވެސް ހިމަނައިގެން އެ ވާހަކަ މިދެންނެވީ. އިކޮނޮމިކް މިނިސްޓަރު މުޙައްމަދު ސައީދު މިނިސްޓަރު ވަނީ ރާއްޖެ އަންނަ ފަތުރުވެރިންނާއި ރާއްޖޭގައި މަސައްކަތް ކުރާ މީހުން އިތުރުވަމުން އަންނައިރު އެ ހުރިހާ އެންމެންނަށް ކޭޓާ ކުރެވޭ ވަރަށް ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމަށް ސަރުކާރުން މުހިންމު މަސައްކަތްތަކެއް ކުރާކަން ފާހަގަކޮށްފައެވެ. އިކޮނިމިކް މިނިސްޓްރީއިން މިއަދު ބޭއްވި ނޫސްވެރީންގެ ބައްދަލުވުމުގެ ތެރެއިން މިނިސްޓަރު މުޙައްމަދު ސައީދު: މިނިސްޓަރު ވަނީ، ރާއްޖެ ތެލާއި ގޭހަކަށް ނުޖެހޭނެ, މެދުކެނޑުމެއް ނެތި ކާޑު ލިބޭނެ ކަމަށް ވިދާޅުވެފަ -- ފޮޓޯ: ރައީސް އޮފީސް މިނިސްޓަރު ވިދާޅުވީ މީގެ ކުރީން މުދާ ރައްކާކުރާ މިންވަރަށްވުރެ އިތުރަށް މުދާ ރައްކާކުރެވޭނޭ ގޮތްތަކެއް މުސްތަގުބަލަށް ރާވަމުންދާ ކަމަށެވެ. އަދި ލޮޖިސްޓިކްސްގައި ވެސް މީގެ ކުރީން ނުގެންގުޅޭ ޓްރާސްޕޯޓް ރޫޓްތައް ބަލަމުންދާކަމަށާއި، އެއީ ދުނިޔޭގެ ކަންކަން ބަދަލުވަމުންދާ ގޮތާއެކު ރާއްޖޭގެ ފުޑް ސެކިއުރިޓީއާއި ތެލާއި ގޭހުގެ ސެކިއުރިޓީ ކަށަވަރުކުރުމަށް ސަރުކާރުން ކުރިއަށްގެންދާ ކަންތައްތަކެއްކަން މިނިސްޓަރު ވަނީ ފާހަގަކުރައްވައިފައެވެ. މިޑްލް އީސްޓުގެ ޓެންޝަން އުފެދެމުން ދިޔައިރުގަވެސް ތައްޔާރީތަކެއް ވަމުން ދިޔައީ. ސަރުކާރުން ދިޔައީ ތައްޔާރީތަކެއް ވަމުން. އެއީ ކުރިއާލާ ވަމުން އައި އިންތިޒާމްތަކެއް. އެހެންވީމަ އަޅުގަނޑުމެންނަށް އޭގެ ރިސްކެއް ނެތް. އެއްކަމަކަށް. ދެވަނަކަމަކަށް މިހާރުވެސް ތެޔޮ ޝިޕްމެންޓެއް އެބަ އާދޭ ރާއްޖެއަށް. އެހެންވީމަ މިވަގުތު ދަތުރުކުރާ ރޫޓުގައި ވެސް ނެތް އިޝޫއެއް. މައްސަލައެއްނެތް. އަޅުގަނޑުމެންގެ ސްޓޮކްގައި ވެސް މައްސަލައެއް ނެތް. އިކޮނޮމިކް މިނިސްޓަރު މުޙައްމަދު ސައީދު މިނިސްޓަރު ވިދާޅުވީ ސަރުކާރުން ވަރަށް ކައިރީން މިހާރުގެ ހާލަތު ބަލަމުންދާކަމަށާއި، އެކަމަށް ޚާއްސަ ކޮމެޓީއެއްގެ އިތުރުން އެސްޓޯއާއެކު ވަރަށް ގާތުން އިކޮނޮމިކް މިނިސްޓްރީއާއި ފިނޭންސް މިނިސްޓްރީއިން ވެސް ކަންކަން ބަލަމުން އަންނަކަމަށެވެ.