އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް އަސްކަރީ ފިޔަވަޅު އެޅުމުގެ ފުރުސަތު އޮތް ކަމަށް ވިދާޅުވެ އިންޒާރު ދެއްވުމާ ގުޅިގެން މަސްރަހު ގޯސްވެފައިވާ ދަނޑިވަޅެއްގައި، އެމެރިކާއާ އެކު އިންސާފުވެރި އަދި ހަމަހަމަ މަޝްވަރާތަކެއް ކުރަން ތައްޔާރު ކަމަށް އީރާނުން އިއްޔެ ބުނެފި އެވެ.
ނަމަވެސް، މި މަޝްވަރާތައް ކުރިއަށް ގެންދެވޭނީ އެއްވެސް ބިރުދެއްކުމެއް ނެތް މާހައުލެއްގައި ކަމަށް އެ ގައުމުން ބުންޏެވެ.
އިއްޔެ ތުރުކީއަށް ކުރެއްވި ދަތުރެއްގައި އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވީ، އީރާނަކީ މަޝްވަރާއަށް ފުރުސަތު ދޭ ގައުމެއް ނަމަވެސް، ފިއްތުންތަކުގެ ދަށުން ވާހަކަ ދެއްކުމަށް އިއުތިރާޒު ކުރާ ކަމަށެވެ.
"މަޝްވަރާ ކުރުމަކީ އީރާނަށް އޮތް މައްސަލައެއް ނޫން. އެކަމަކު ބިރުދެއްކުމާއި އިންޒާރުގެ ހިޔަނި އޮތް ތަނެއްގައި މަޝްވަރާތަކެއް ނުބޭއްވޭނެ،" ނޫސްވެރިންނާ ވާހަކަ ދައްކަވަމުން އޭނާ ވިދާޅުވި އެވެ.
އަރާގްޗީ ވިދާޅުވީ އީރާނުގެ ދިފާއީ ގާބިލުކަމާ ބެހޭ ގޮތުން އެއްވެސް މަޝްވަރާއެއް ނުކުރެވޭނެ ކަމަށެވެ.
"އީރާނުގެ ދިފާއީ އަދި މިސައިލް ގާބިލުކަމަކީ އަދި އީރާނުގެ މިސައިލްތަކަކީ އެއްވެސް އިރެއްގައި މަޝްވަރާގެ މޭޒަށް ގެންނާނެ މައުލޫއެއް ނޫން،" އޭނާ ވިދާޅުވި އެވެ.
އީރާނުގެ ރައްޔިތުންގެ ސަލާމަތާއި ރައްކާތެރިކަމަކީ އެހެން ބަޔަކު ބެހެންޖެހޭ ކަމެއް ނޫން ކަމަށް ވެސް އޭނާ ފާހަގަކުރެއްވި އެވެ.
އީރާނުން މިހެން ބުނެފައި މިވަނީ، އީރާނުން އެ ގައުމުގެ ނިއުކްލިއާ ޕްރޮގްރާމާ ބެހޭ ގޮތުން މަޝްވަރާ ނުކޮށްފި ނަމަ، ބޭނުންވެއްޖެ ހާލަތެއްގައި ބާރުގެ ބޭނުންކުރުމަށް ތައްޔާރަށް އޮތް، 'ޔޫއެސްއެސް އެބްރަހަމް ލިންކަން' އިސްވެ އޮންނަ ބޮޑު އަސްކަރީ ފައުޖެއް އީރާނާ ދިމާލަށް ދަތުރުކުރަމުންދާ ކަމަށް ޓްރަމްޕް ވިދާޅުވިތާ މަދު ދުވަސްކޮޅެއްގެ ތެރޭގަ އެވެ. ވައިޓް ހައުސްގައި ވާހަކަ ދައްކަވަމުން ޓްރަމްޕް އިއްޔެ ވިދާޅުވީ، އެމެރިކާއިން އެ ސަރަހައްދަށް އިތުރު މަނަވަރުތައް ފޮނުވަމުންދާ ކަމަށެވެ.
"އުއްމީދަކީ އެއްބަސްވުމަކަށް އާދެވުން. އެކަން ވެއްޖެ ނަމަ ރަނގަޅު. އެއްބަސްވުމަކަށް ނާދެވިއްޖެ ނަމަ ދެން ވާނެ ގޮތެއް ބަލާނީ،" ޓްރަމްޕް ވިދާޅުވި އެވެ.
މީގެ އިތުރުން، އީރާނަށް ސުންގަޑިއެއް ދީފައިވާ ކަމަށް ވިދާޅުވި ނަމަވެސް، އެއީ ކޮން ތާރީހެއް ކަމެއް ހާމައެއް ނުކުރައްވަ އެވެ.
ވޮޝިންޓަނުން ދަނީ ޔުރޭނިއަމް މުއްސަނދިކުރުން ހުއްޓާލުމަށް އީރާނަށް ފިއްތުންތައް ކުރިމަތިކުރަމުންނެވެ. އީރާނުން ނިއުކްލިއާ ހަތިޔާރު އުފައްދަން އުޅޭ ކަމަށް އެމެރިކާއިން ތުހުމަތު ކުރާއިރު، އީރާނުގެ ލީޑަރުން ތަކުރާރުކޮށް އެކަން ދޮގުކުރައްވަ އެވެ. ޓްރަމްޕް ވަނީ ކުރިން އޮތް ނިއުކްލިއާ އެއްބަސްވުމުން 2018 ވަނަ އަހަރު އެމެރިކާ ވަކިކޮށް، އީރާނާ ދެކޮޅަށް އަލުން ދަތިކުރުމުގެ ފިޔަވަޅުތައް އަޅާފަ އެވެ.
މި ނުތަނަވަސްކަމުގެ ތެރޭގައި، އަސްކަރީ ކުރިމަތިލުމަކުން ސަލާމަތްވުމަށްޓަކައި ސަރަހައްދީ ގައުމުތަކުން ދަނީ ޑިޕްލޮމެޓިކް މަސައްކަތްތައް ވަރުގަދަކުރަމުންނެވެ. ތުރުކީގެ ރައީސް ރަޖަބް ތައްޔިބް އުރުދުގާން ވަނީ، ވޮޝިންޓަނާއި ތެހެރާނާ ދެމެދު މެދުވެރިއެއްގެ ދައުރު އަދާކުރުމަށް ތުރުކީ އޮތީ ތައްޔާރަށް ކަމަށް އީރާނުގެ ރައީސް މަސްއޫދު ޕެޒެޝްކިއަންގެ އަރިހުގައި ވިދާޅުވެފަ އެވެ.
ތުރުކީގެ ހާރިޖީ ވަޒީރު ހާކާން ފިދާން ވިދާޅުވީ، އެމެރިކާ އާއި އީރާނާ ދެމެދު ނިއުކްލިއާ މަޝްވަރާތައް އަލުން ފަށަންޖެހޭ ކަމަށާއި އޭގެ ސަބަބުން ދަތިކުރުމުގެ ފިޔަވަޅުތައް އުވާލުމަށް މަގުފަހިވެގެންދާނެ ކަމަށެވެ.
"މައްސަލަތަކަށް ވަކިވަކިން ހައްލު ހޯދުމަށްޓަކައި ދެ ފަރާތުން މަޝްވަރާގެ މޭޒަށް އައުމަށް އަޅުގަނޑުމެން ގޮވާލަން،" އޭނާ ވިދާޅުވި އެވެ.
އީރާނުގެ އޮފިޝަލުން ވިދާޅުވާ ގޮތުގައި، އެ ގައުމުން މަޝްވަރާއަށް ތައްޔާރަށް އޮތް ނަމަވެސް، ހަމަލާއެއްދީފި ނަމަ ރައްދު ދިނުމަށް އެ ގައުމުގެ އަސްކަރިއްޔާ އޮތީ ތައްޔާރަށެވެ.