ސަރުކާރުން ދެއްވާ ޝަރަފުވެރިކަމުގެ ޤައުމީ އިނާމުގައި ކުޅިވަރުގެ ދާއިރާއިން ގައުމީ އިނާމު މުޙައްމަދު ނާސިރު، އަދި ކުޅިވަރަށް ޙިދުމަތްކުރުމުގެ ދާއިރާއިން ގައުމީ އިނާމު އަޙްމަދު މުޙައްމަދަށް ދެއްވައިފިއެވެ.
ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި އަޙްމަދު މުޙައްމަދު ނުވަތަ ދަނޑުގައި މަޝްހޫރު ނަމުންނަމަ ދޮނާވެސް ވަނީ ގިނަ ހިދުމަތްތަކެއް ކުރައްވާފައެވެ. އެގޮތުން އުމުރުން 15 އަހަރުގައި ކުޅިވަރަށް އުފެދުނު ޝައުގާއެކު އޭނާ ވަނީ 1976 ވަނަ އަހަރު ނިޝާން އިއްޒުއްދީނުގެ ޢިއްޒަތުގެ ވެރިޔާ އަލްމަރްޙޫމް މުޙައްމަދު ޒާހިރު ނަސީރާއެކު މަސައްކަތްކުރައްވަން ފައްޓަވާފައެވެ. ޝަރަފުވެރިކަމުގެ ޤައުމީ އިނާމު ލިބިވަޑައިގެންނެވި މުހައްމަދު ނާސިރު ވަނީ ރާއްޖޭގައި ރަސްމީ ސިފައެއްގައި ކުޅުނު ގިނަ ކުޅިވަރުތަކެއްގައި ކުޅުންތެރިއެއްގެ ގޮތުގައި މަޝްހޫރުކަން ހޯއްދަވާފައެވެ. އެގޮތުން ފުޓުބޯޅަ އާއި ޓީޓީ އާއި ކްރިކެޓާއި ހޮކީއާއި ބެޑްމިންޓަނާއި އެތުލެޓިކްސް ، ޓެނިސް، ބާސްކެޓް ، ވޮލީ އަދި ބައިސްކަލް ރޭސްތަކުން ވަނީ ކާމިޔާބީތަކެއް ހޯއްދަވާފައެވެ. 
ޤައުމީ އިނާމާއި ހިތްވަރުދިނުމުގެ ޤައުމީ އިނާމު ލިބިވަޑައިގެންނެވި ބޭފުޅުންނަށް އިނާމު ހަވާލުކުރުން އޮތީ ޤައުމީ ދުވަހުގެ ރަސްމީ ޖަލްސާގައެވެ.