އިބްރާހިމް ނާސިރު އިންޓަރނޭޝަނަލް އެއަރޕޯޓު އިންޑިޔާގެ ޖީއެމްއާރަށް ދީފައިވާ މައްސަލައިގައި އުފެދިފަވާ ޚިޔާލު ތަފާތުވުންތަކުގައި ޖުުމްހޫރީ ޕާޓީއަށް ނިސްބަތްވާ ޓްރާންސްޕޯޓް މިނިސްޓަރ ޑރ.އަޙްމަދު ޝަމްހީދު ވަކި ބައެއްގެ މަސްލަހަތަށް މަސައްކަތް ކުރައްވަމުން ގެންދަވާކަމަށް ބުނެ ބައެއް ފަރާތްތަކުން ކުރަމުންގެންދާ ތުހުމަތުތަކަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ރައްދު ދެއްވައިފިއެވެ.
ޖުމްހޫރީ ޕާޓީގެ އޮފީހުގައި އިއްޔެ އޮތް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވީ، ޖީއެމްއާރުން ވިލާ އެއަރއަށް ދީފައިވާ ކްރެޑިޓް ފެސިލިޓީއަކާއި ގުޅުވައިގެން ޓްރާންސްޕޯޓް މިނިސްޓަރ ޑރ.އަޙްމަދު ޝަމްހީދު ބަނދުނާމު ކުރަމުން ދިއުމަކީ ހިތާމަކުރައްވާ ކަމެއް ކަމަށެވެ.
ޖީއެމްއާރާއި ކެނެރީގޭ ނަޝީދުގެ ސަރުކާރާއި ދެމެދު ވެފައިވާ އެއްބަސްވުން ދިރާސާކުރުމަށް ރައީސުލްޖުމްހޫރިއްޔާ ޑރ.މުޙައްމަދު ވަހީދު ޙަސަން މަނިކު އެންމެ ފުރަތަމަ އެކުލަވާލެއްވި ކޮމިޓީގައި ޓްރާންސްޕޯޓް މިނިސްޓަރުގެ ހައިސިއްޔަތުން ޑރ.ޝަމްހީދު ހިމަނުއްވާފައި ނުވާކަން ހާމަކުރައްވަމުން ޤާސިމް އިބްރާހިމް ވިދާޅުވީ، އެކޮމިޓީގައި ޑރ.ޝަމްހީދު ހިމެނުއްވީ އެމަނިކުފާނު ރައީސުލްޖުމްހޫރިއްޔާއާއި ބައްދަލުކުރައްވާ ޑރ.ޝަމްހީދު އެކޮމިޓީގައި ހިމަނުއްވައި ދެއްވުމަށް އެދިވަޑައިގަތުމުން ކަމަށެވެ.
ޖީއެމްއާރުގެ މައްސަލައިގައި ކުރިއަށްދާ ކޮމިޓީއެއްގައި ޓްރާންސްޕޯޓް މިނިސްޓަރުގެ ހައިސިއްޔަތުން ޑރ.ޝަމްހީދު ހިމެނިފައި ނެތުމަކީ ޑރ.ޝަމްހީދަށް ދީފައިވާ ނިކަމެތި ކަމެއްކަން ހާމަކުރައްވާ އެކޮމިޓީގައި ޑރ.ޝަމްހީދު ނުހިމެނުއްވި ސަބަބު ރައީސް ޑރ.ވަހީދާއި ހަވާލާދެއްވާ ޤާސިމް އިބްރާހިމް ވަނީ މީޑިއާއަށް ވިދާޅުވެ ދެއްވާފައެވެ.
ޤާސިމް އިބްރާހިމް ވިދާޅުވީ، ޖުމްހޫރީ ޕާޓީއަށް ނިސްބަތްވާ ވަޒީރަކު ނިކަމެތި ކޮށްލުމުން އެކަން އެގޮތަށް ނުކުރެއްވުމަށާއި، އަދި ރައީސް ޑރ.ވަހީދު ނައިބު ރައީސް ކަމުގައި ހުންނެވި ދުވަސްވަރު އޭރުގެ ސަރުކާރުން ރައީސް ޑރ.ވަހީދަށާއި، ހޯމް މިނިސްޓަރު ކަމުގައި ޤާސިމް އިބްރާހިމަށް ދީފައިވާ ނިކަމެތިކަން ރައީސް ޑރ.ވަހީދަށް ހަނދުމަފުޅުކޮށް އެރުވިކަަމަށެވެ.
ޤާސިމް އިބްރާހިމް ވިދާޅުވީ، ޓްރާންސްޕޯޓް މިނިސްޓަރ ޑރ.އަޙްމަދު ޝަމްހީދަކީ ވަކިމީހެއްގެ މަސްލަހަތުގައި މަސައްކަތް ކުރައްވާނެ ބޭފުޅެއް ނޫން ކަމަށާ، ޤާނޫނީ އިމުގެތެރެއިން ޑރ.ޝަމްހީދު މަސައްކަތް ކުރައްވާނެކަމުގެ ޔަޤީންކަން އެބައޮތް ކަމަށެވެ.
ޖީއެމްއާރުގެ މައްސަލައިގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި، އެޕާޓީއަށް ނިސްބަތްވާ ސަރުކާރުގެ ބައެއް އިސް ބޭފުޅުންނަށް ފާޑުކިޔުންތައް އަމާޒުވަމުން ދިޔަނަމަވެސް ޖީއެމްއާރާއި ދެކޮޅަށް ފިޔަވަޅު އެޅުމަށްޓަކައި ކުރީގެ އިދިކޮޅު ތިން ސިޔާސީ ޕާޓީއަކާއެކު ޖުމްހޫރީ ޕާޓީން ވެފަވާ އެއްބަސްވުމަށް ބަދަލު ނުގެންނާނެ ކަމަށް ޤާސިމް އިބްރާހިމް ވިދާޅުވިއެވެ. އަދި އެނިންމުން ބަދަލުކުރުމަށް ޖުމްހޫރީ ޕާޓީން މަސައްކަތް ކުރާހާދުވަހަކު އެޕާޓީގެ ލީޑަރުގެ ގޮތުގައި ނުހުންނަވާނެކަމުގެ ޔަޤީންކަންވެސް ޤާސިމް އިބްރާހިމް ވަނީ ދިވެހި ރައްޔިތުންނަށް ދެއްވާފައެވެ.