ލ. ފޮނަދޫ އިންޖީނުގެ ހިންގުމަށް ބޭނުންވާ ތެޔޮ ނުލިބިގެން އިންޖީނުތައް ނިއްވާލައި އެ ރަށުން މިއަދު ކަރަންޓް ކަނޑާލައިފި އެވެ. ޑީއާރްޕީގެ ފަސް މެމްބަރުން ހިމެނޭ ކައުންސިލްގެ ރައީސް އަބްދުލް ހަސީބް ވިދާޅުވި ގޮތުގައި އެ ރަށަށް އެސްޓީއޯ އިން މިއަދު ތެޔޮ ގެންނާނެ ކަމަށް އުއްމީދުކޮށްގެން ތިބި ނަމަވެސް ބޯޓަށް ދިމާވި މައްސަލައަކާ ގުޅިގެން މިއަދު ބޯޓު ނާދެ އެވެ. އެހެންވެ، 24 ގަޑިއިރު ކަރަންޓް ދެވޭ ވަރަށް ތެޔޮ ނެތުމުން ކަރަންޓް ކަނޑާލާފައިވާ ކަމަށް ވެސް އޭނާ ވިދާޅުވި އެވެ. "ރޭގަނޑު ކަރަންޓް ދިނުން މުހިއްމު ކަމަށް ފެންނާތީ ދުވާލު އިންޖީނު ނިއްވާލީ. ކުރިއަށް އޮތް ދެ ދުވަހު ވެސް ތެޔޮ ލިބޭނެ ކަމުގެ އުއްމީދެއް ނެތް. އެހެންވެ އަޅުގަނޑުމެންނަށް މި އަތޮޅު މާބައިދޫން 5،000 ލިޓަރު ތެޔޮ ދޭން އެއްބަސްވެފައިވަނީ. އެކަމަކު އެ ތެލުން ވެސް ދުވާލު ގަޑީގައި ކަރަންޓެއް ނުދެވޭނެ،" ހަސީބް ވިދާޅުވި އެވެ. އޭނާ ވިދާޅުވި ގޮތުގައި އެ ރަށުގައި ކަރަންޓް ނެތުމުން އެ އަތޮޅުގެ ރައްޔިތުންނަށް ވެސް ވަނީ ދަތިތަކަކާ ކުރިމަތިލާން ޖެހިފަ އެވެ. ބޭންކް އޮފް މޯލްޑިވްސްގެ އެ އަތޮޅުގެ ބްރާންޗް އެ ރަށުގައި ހުންނާތީ ގިނަ އަދަދެއްގެ ބަޔަކު މި ދުވަސްކޮޅު މުސާރަ ނަގާނެ ކަމަށް ވެސް އޭނާ ވިދާޅުވި އެވެ. އަދި ރަށުގެ ސިއްހީ މަރުކަޒުގައި ވެސް ކަރަންޓް ނެތުމުން އެ ތަނުން ހިދުމަތް ހޯދާ ފަރާތްތަކަށް ވެސް ވަނީ ދަތިތަކެއް ކުރިމަވެފަ އެވެ. "އެކަމަކު ކަރަންޓް ނެތީމަ މުސާރައެއް ނުދެވޭނެތާ. އިމަޖެންސީކޮށް ހިދުމަތް ދެވޭނެ ގޮތެއް ބޭންކުގައި ހަމަޖެހިފައެއް ނެތް. އެހެންވީމަ އަތޮޅުތަކުން އަންނަ މީހުންނަށް ވެސް ދަތިތަކެއް ކުރިމަތިވާނެ،" ހަސީބް ވިދާޅުވި އެވެ. "މި ރަށުގެ ސިއްހީ މަރުކަޒުގައި ވެސް ކަރަންޓެއް ނެތް."