ބޮޑު ކާސްޓަކާއެކު ފީރޯޒް ނަދިއަދުވާލާ އަދި ޖިއޮތީ ދޭޝްޕާންޑޭ ޕްރޮޑިއުސްކޮށް ގެނެސްދޭ ފިލްމު "ވެލްކަލް ޓު ދަ ޖަންގަލް" ސިނަމާތަކަށް ގެންނަ ތާރީޚު އިއުލާނުކޮށްފިއެވެ. ކޮރިއަގްރާފަރެއްގެ ގޮތުގައި ކުރިން މަސައްކަތްކޮށްފައިވާ އަހުމަދު ޚާން ޑައިރެކްޓްކޮށް މި ކޮމެޑީ ފިލްމު ބެލުންތެރިންނަށް ގެނެސްދޭން ނިންމާފައި ވަނީ މި އަހަރުގެ ހޫނު މޫސުމުގައެވެ. ބޮލީވުޑްގެ ގިނަ ފިލްމީ ތަރިންތަކެއް ކާސްޓުގައި ހިމެނޭ "ވެލްކަމް ޓު ދަ ޖަންގަލް"އަކީ ފިލްމު އިއުލާނުކުރީއްސުރެ ސިނަމާތަކަށް ފިލްމު އަންނާނެ ދުވަހަކަށް ބެލުންތެރިން އިންތިޒާރު ކުރަމުން އަންނަ ފިލްމެއްކަން ފާހަގަކޮށްލެވެއެވެ. ފިލްމު "ވެލްކަމް ޓު ދަ ޖަންގަލް" ރިލީޒްކުރާ ތާރީޚު އިއުލާނު ކުރަމުން ފިލްމު އެނަލިސްޓް އަދި ކްރިޓިކް ތަރަން އާދާޝް ބުނީ މި އަހަރު ސިނަމާތަކަށް އަންނާނެ އެންމެ ބޮޑު ކޮމެޑީ ފްރެންޗައިސް އެނބުރި އަތުވެއްޖެ ކަމަށެވެ. "ވެލްކަމް ޓު ދަ ޖަންގަލް"ގެ ޕޯސްޓަރެއް-- ފޮޓޯ/ ފޭސްބުކް މި އަހަރުގެ ޖޫން މަހުގެ 26ގައި ފިލްމު ރިލީޒްކުރާނެކަން އިއުލާނުކުރުމާ އެކު ފިލްމަށް އިންތިޒާރުކުރާ ކަމަށް ބުނެ ގިނަ ބަޔަކު ވަނީ ސޯޝަލް މީޑިއާގައި އެމީހުންގެ ޝުއޫރުތައް ފާޅުކޮށްފައެވެ. މި ފިލްމާ ގުޅޭގޮތުން ތަންކޮޅެއްކުރިން ނިއުސް18އަށް ޑައިރެކްޓަރު އަހުމަދު ޚާން ދިން އިންޓަވިއުއެއްގައި ބުނީ "ވެލްކަމް"ގެ ފްރެންޗައިސްގެ ދަށުން އުފައްދާ ފިލްމުތަކުގައި ތަފާތު ކާސްޓެއް ހިމަނަން އަބަދުވެސް އިސްކަންދޭ ކަމަށެވެ. މިހާތަނަށް އެ ފްރެންޗައިސްގެ ދަށުން ގެނެސްދިން ފުރަތަމަ ފިލްމުގައި އަކްޝޭ ކުމާރު މުހިއްމު ރޯލެއް ކުޅުނުއިރު ދެވަނަ ފިލްމުގެ މުހިއްމު ރޯލަކުން ފެނުނީ ޖޯން އަބްރަހަމެވެ. އޭގެފަހުން ގެނެސްދޭ ތިންވަނަ ފިލްމުގެ ކާސްޓުގައި ގިނަ ތަރިންތަކެއް ތިބިއިރު އަކްޝޭ ވަނީ އަނެއްކާވެސް ފިލްމުން ޖާގަ ހޯދާފައެވެ. އަކްޝޭއާއެކު "ވެލްކަމް ޓު ދަ ޖަންގަލް"އިން ފެންނާނެ ތަރިންގެ ތެރޭގައި ސުނިލް ޝެޓީއާއި ރަވީނާ ޓަންޑަނާއި ސަންޖޭ ދަތާއި ދިޝާ ޕަޓާނީ އާއި އަފްތާބް ޝިވްދަސާނީ އާއި ޖެކްލީން ފެނާންޑޭޒާއި ތުޝާރް ކަޕޫރާއި އަރުޝަދު ވަރްސީ އާއި މަނޫޝީ ޗިލާރާއި ރަންދީޕް ހޫޑާ އާއި ލާރާ ދައްތާ އާއި ޝްރެޔަސް ތަލްޕަޅޭ އާއި ޝާރިބް ހާޝީމީ އާއި ޕަރޭޝް ރާވަލާއި ސުޕްރިޔާ ކަރްނިކާއި ރާޖްޕަލް ޔާދަވާއި ޖޯނީ ލީވާ އައި ފަރީދާ ޖަލާލާއި ޕުނީތު އިސާރް އަދި މަނޯޖް ޕަހްވާ ހިމެނެއެވެ.