ރާއްޖޭން ބޭރުގައި ސަރުކާރުގެ ހަރަދުގައި ކިޔަވާ ދަރިވަރުންނަށް ފައިސާ ދޫކުރުން ގިނަ ފަހަރު ލަސްވަނީ ބޭރުގެ ޔުނިވާސިޓީތަކުގެ ސަބަބުން ކަމަށް ހަޔާ އެޑިއުކޭޝަން މިނިސްޓަރު އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ރާއްޖެއިން ބޭރުގައި މަތީތައުލީމު ހާސިލުކުރާ ދަރިވަރުންނަށް ސަރުކާރުން ދޭން ޖެހޭ ފައިސާ ނުދީ ދިގުލައިގެންދާ މައްސަލަ ބައެއް ދަރިވަރުން އަންނަނީ ވަރަށް ގިނައިން ސޯޝަލް މީޑިއާގައި ތިލަކުރަމުންނެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހައިދަރު ވިދާޅުވި ގޮތުގައި މިހާރު ފައިސާ ދިނުމުގެ ކަންކަން ރަނގަޅު ކުރުމަށް ގިނަ މަސައްކަތްތަކެއް ދަނީ ކުރަމުންނެވެ. އަދި ލަސްވުމެއް އަންނަނީ އެ ފައިސާއަކީ ތިން އިދާރާއަކުން ބަލާފައި ފައިސާއަކަށްވާތީ ކަމަށް އޭނާ ވިދާޅުވި އެވެ.
"ޔުނިވަސިޓީތަކުން އިންވޮއިސް އަންނައިރު އޮންނަނީ ހަފްތާއަކަށް ވެފައި ޑެޑްލައިނަށް. އެހެންވީމާ ވާ ގޮތަކީ އެ ޑެޑްލައިން މީޓުކުރުމުގައި ކޮންމެވެސް ވަރެއްގެ ދަތިތަކެއް ދިމާވޭ. އެއީ ކަންނޭނގެ އެންމެ ބޮޑަށް ޕޭމަންޓު ޑިލޭސްގައި ދިމާވާ މައްސަލައަކީ،" ހައިދަރު ވިދާޅުވި އެވެ.
އެހެން ނަމަވެސް ފައިސާ ދޫކުރުމުގައި ކުރިއަށްވުރެ މިހާރު ރަނގަޅަށް އަމަލުކުރެވޭ ކަމަށާއި ދެ ހަފްތާ ކުރިން ވެސް ސްޓައިޕެންޑު ދޫކުރެވޭ ކަމަށް އޭނާ ވިދާޅުވި އެވެ. އެންމެ ގިނަވެގެން ވެސް ދެ ހަފްތާގެ ތެރޭގައި 80 ޕަސެންޓު ދަރިވަރުންނަށް މި އަހަރު ތެރޭ ފައިސާ ދޫކުރެވިފައިވާ ކަމަށް ހައިދަރު ވިދާޅުވި އެވެ.
މީގެ ކުރިން ހައިދަރު ވިދާޅުވި ގޮތުގައި ދަރިވަރުންނަށް ފައިސާ ދޫނުކުރެވި ދިގުލައިގެންދާ މައިގަނޑު ސަބަބަކީ މިނިސްޓްރީއަށް ބޭނުންވާ ބައެއް ލިޔުންތައް ދަރިވަރުންގެ ފަރާތުން ނުލިބުމެވެ.
ސްޓޫޑެންޓް ލޯނުގައި މި ވަގުތު ރާއްޖެ އާއި ރާއްޖެއިން ބޭރުގެ 36 ގައުމެއްގައި 1،740 ދަރިވަރުން ކިޔަވަމުންދާ ކަމަށް ހަޔާ އެޑިއުކޭޝަން މިނިސްޓްރީން ބުންޏެވެ. ސްކޮލާޝިޕްތަކުގައި 20 ގައުމެއްގައި 602 ދަރުވަރުން ދަނީ ތައުލީމު ހާސިލުކުރަމުންނެވެ.