ސަރުކާރަށް އެއްބާރުލުން ދޭ ބަޔަކު ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ކައުންސިލްތަކަށް ނުހޮވައިފި ނަމަ އޭގެ ގެއްލުން ރައްޔިތުންނަށް ކުރާނެ ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން، ފަސްޓް ލޭޑީ ސާޖިދާ މުހައްމަދު މިރޭ ވިދާޅުވެއްޖެ އެވެ.ޕީއެންސީގެ މާފަންނު ދެކުނު ދާއިރާގެ ޖަގަހަ ހުޅުއްވައި ދެއްވުމަށް ފަހު ވާހަކަފުޅު ދައްކަވަމުން ސާޖިދާ ވިދާޅުވީ ވެރިކަން ކުރާ ޕީއެންސީގެ ޓިކެޓުގައި މާލޭގެ މޭޔަރުކަމަށް ކުރިމަތިލައްވާ މޫސާ އަލީ ޖަލީލަކީ ނޮވެމްބަރު 3، 1988 ވަނަ ދުވަހު ފާހަގަކޮށްލެވޭ ބޭފުޅެއް ކަމަށެވެ. އަދި ކުޑައިރު މަންމަމެން ޖަލީލްގެ ވާހަކަދައްކަވަނީ ވަރަށް އިހުތިމާރާ އެކުގައި ކަމަށް ސާޖިދާ ވިދާޅުވިއެވެ.ފަސްޓް ލޭޑީ އިތުރަށް ފާހަގަކުރެއްވީ ރާއްޖޭގައި ހުރި އިޖުތިމާއީ އިގުތިސާދީ މައްސަލަތައް ހައްލުކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާ ކަމެވެ. އަދި އެ މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އުދަގޫ އެތައް ނިންމެވުމެއް ނިންމަވަމުންދާއިރު، އެމަނިކުފާނާއި ސަރުކާރަށް އެހީތެރިވެދޭނެ ބަޔަކު ކައުންސިލުތަކަށް ނުހޮވައިފިނަމަ އެކަމުގެ ގެއްލުން ހުރިހާ ރައްޔިތުން ތަހައްމަލުކުރާނެ ކަމަށްވެސް އެކަމަނާ ވިދާޅުވި އެވެ. ކައުންސިލަކީ ރައްޔިތުންގެ އިހުސާސްތައް އެންމެ ކައިރިން ދެނެގަނެ، އެންމެ ގާތުން ރައްޔިތުންނަށް ހިދުމަތް ފޯރުކޮށްދެވޭނެ މުއައްސަސާކަން ފާހަގަކުރައްވަމުން ސާޖިދާ ވިދާޅުވީ ރައްޔިތުންގެ ކަންބޮޑުވުންތަކާއި ބޭނުންތައް ސީދާ ސަރުކާރާ ހަމައަށް ގެނެސްދެވޭނެ ބަޔަކު ކައުންސިލުތަކުގައި ތިބުމަކީ އެކަމުން ރައްޔިތުންނަށް ވަރަށް ބޮޑަށް ފައިދާކުރާނެ ކަމެއް ކަމަށެވެ. ފަސްޓް ލޭޑީ ވިދާޅުވި ގޮތުގައި ކައުންސިލަރުންނަކީ ސަރުކާރުގެ ސިޔާސަތުތައް ތަންފީޒު ކުރުމަށް ސަރުކާރާ އެކު އެންމެ ގާތުން މަސައްކަތް ކުރާނެ މީހުންނެވެ. އެހެންވެ، ރައްޔިތުންގެ ކަންބޮޑުވުންތައް ސަރުކާރާ ހަމައަށް ގެންގޮސްދެވޭނެ ކައުންސިލަރުންތަކެއް ތިއްބެވުމަކީ ރައްޔިތުންނަށް އޭގެ ލާބަ އާއި މަންފާ ކުރާނެ ކަމެއް ކަމަށް ފަސްޓް ލޭޑީ ވިދާޅުވި އެވެ.