މައިމީހާދެކެ ލޯބިވާންވާނެ! އެކަމަކު ރުހުން ހޯދަން ތިމާގެ އަނބިމީހާ ނިކަމެތިކުރެވޭނަމަ އެކަންވާނީ ކުރެވޭ ބޮޑު ފާފައަކަށް!

އިސްލާމް ދީނުގައި އޮތީ އެންމެންނަށްވެސް ހެޔޮކޮށްހިތުމަށެވެ. ޚާއްޞަކޮށް މައިންނަށް ހެޔޮކޮށް ހިތަންޖެހޭނެއެވެ. އެކަމަކު އެއިގެ މާނައަކީ އެހެން މީހަކަށް ޚާއްޞަކޮށް ތިމާގެ އަނބިމީހާއަށް އަނިޔާވެރިވެ ނިކަމެތި ކުރުން ހުއްދަވުމެއް ނޫނެވެ. އަނބިމީހާ ދެކެވެސް ލޯބިވާންވާނެއެވެ. ހެޔޮކޮށް ހިތަންވާނެއެވެ.
ކައިވެނިކުރެވުމުން ޝައިޠޯނާ ވަރަށް ގިނަ ވަސްވާސްތައް ދޭނެއެވެ. މިސާލަކަށް ކައިވެނީގެކުރިން ލިބޭ ހުރިހާ އާމްދަނީއެއް މަންމައަށްދިންނަމަވެސް އަދި ގެއަށް ޚަރަދުކުރިނަމަވެސް ކައިވެންޏަށްފަހު އެކަން އެހެނެއް ނުކުރެވޭނެއެވެ. އަނބިމީހާއަށްވެސް ޚަރަދުކުރަންޖެހޭނެއެވެ. އަމިއްލައަށް ދިރިއުޅެންވެސް ޚަރަދުކުރަންޖެހޭނެއެވެ.
އެ ޙާލަތުގައި ޝައިޠޯނާ ވަސްވާސްދޭނީ ކުރިން ކުރި ޚަރަދު މައިމީހާއަށާއި ޢާއިލާއަށް ނުކުރަނީ އަނބިމީހާގެ ސަބަބުންކަމަށެވެ. އޭނާގެ ނުފޫޒުން ކަމަށެވެ. ނަމަވެސް ޙަޤީޤަތަކީ އެއީއެއް ނޫނެވެ. ކުރިން ކުރި ގޮތަށް ޚަރަދުނުކުރެވެނީ އަމިއްލަ ދިރިއުޅުމަށް ޚަރަދުކުރަންޖެހެތީއެވެ.
ބައެއް ފަހަރު އޮޅުންއަރާކަމެއްވެއެވެ. އެއީ މައިންބަފައިންނަށް ކިޔަމަންތެރިވާންޖެހޭނެކަމަށް ޤަބޫލުކުރުމެވެ. ޤުރްއާނުގައިވެސް އެއްވެސް ހަދީޘްފުޅެއްގައިވެސް މައިންބަފައިންނަށް ކިޔަމަންތެރިވާކަމަށް ނެތެވެ. އޮތީ ހެޔޮކޮށް ހިތުމަށެވެ. ކިޔަމަންތެރިވާންޖެހޭނީ ހަމައެކަނި ﷲ ތަޢާލާއަށެވެ. ރަސޫލް ﷺ 4 ފަހަރުވެސް ޙަދީޘްފުޅުކުރެއްވެވީ މައިމީހާއަށް ހެޔޮކޮށް ހިތުމަށެވެ! ކިޔަމަންތެރިވުމަކަށް ނޫނެވެ. ވީމާ މާނަ އޮޅުވާލައިގެން ނުވާނެއެވެ.
ވީމާ މައިންބަފައިންނަށް ކިޔަމަންތެރިވާންޖެހޭނެ ކަމަށް ދެކެ އަނބިމީހާއަށް އަނިޔާވެރިވެގެން ނުވާނެއެވެ. އަދި އަނބިން ފިރިމީހާއާއިމެދު އިހާނެތިކޮށް ކަންކަންކޮށްގެންވެސް ނުވާނެއެވެ.
އަންހެނުންނަށް ބަހެއް ބުނެލާނަމެވެ. ތިބާގެ ކޮންމެވެސް ރައްޓެއްސެއްގެ މައިދައިތައަކީ ނުބައި މީހަކަށްވުމަކީ ތިބާއަށް ލިބުނު މައިދައިތައަކީ، އައު މަންމައަކީ ނުބައި މަންމައަކަށް ވާންޖެހޭނެ ސަބަބެއް ކަމަށް ނުދެކޭށެވެ! އޭނާގެ ހުރި ގޮތް ދައްކައިލަން ފުރުޞަތުދޭންވާނެއެވެ. ގޮތް ނިންމަންވާނީ އެއިގެ ފަހުންނެވެ.
ގޭތެރޭގައި ކަމެއް ދިމާވުމުން ނުބައީ މައިމީހާ ނުވަތަ އަނބިމީހާ ނުވަތަ ފިރިމީހާ ކަމަށް ބުނެގެން ނުވާނެއެވެ. އެކަކީވެސް ނުބައި މީހެއް ނޫނެވެ. ނުބައީ ޝައިޠޯނާގެ ބަހަސް ހެއްލި ކުށްކުރި މީހެކެވެ. ވީމާ އެއީ ވަކިމީހަކަށްވީތީ ނުބައިކަން އެމީހެއްގެ ބޮލުގައި ނުއަޅުވާށެވެ! ކުށްވެރިވަނީ ކާކުތޯ ބަލައި އެމީހެއްގެ ބޮލުގައި އަޅުވާށެވެ! ވަކި މީހަކަށްވީތީ (އެއީ މައިމީހީ ކަމުގައިވީނަމަވެސް) ޙިމާޔަތްވެސް ނުކުރާށެވެ! އެއިރުން އެވެވެނީ އިންޞާފުންބޭރެވެ. އެވެވެނީ އަނިޔާވެރިއަކަށެވެ. އެއިރުން އެކަންވާނީ ކުރެވޭ ފާފައަކަށެވެ.
--މުފްތީ މެންކުގެ ދަރުސަކުން ސަމާލުކަންދޭންޖެހޭ ކަމެއް: މިދަރުސްގައި އިމާމް މުފްތީ މެންކް ވިދާޅުވެފައިވާ ބަސްފުޅަކީ ޒަވާޖީ ޙަޔާތުގައި ދިމާވާ މައްސަލަތަކަށް ވިދާޅުވެފައިވާ ބަސްފުޅެކެވެ. އެއްވެސް ޙާލެއްގައި މައިންބަފައިންގެ ބެލެނިވެރިކަމުގެދަށުގައި ތިބޭ ކުޑަކުދިންނަށް ވިދާޅުވެފައިވާ ބަސްފުޅެއް ނޫނެވެ. ވީމާ 2 ޙާލަތު އޮޅުވައިނުލުން މުހިންމުކަން ފާހަގަކުރެވެއެވެ. އަދި ކިތަންމެ ކުޑަ ކުއްޖަކުނަމަވެސް މައިންބަފައިންގެ އަމުރަށް ކިޔަމަންވާން ﷲ ތަޢާލާގެ ޙުކުމްފުޅާއި އެއްވެސް މިންވަރަކަށް ޚިލާފްވެގެން ނުވާނެކަންވެސް ފާހަގަކުރެވެއެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ