މިހާރު ރާއްޖެ އަށް ކުރަމުންދާ ބޯ ވިއްސާރައިގައި ށ. ނަރުދޫ އަށް އާދަޔާ ހިލާފަށް އުދަ އަރައި، ރަށުގެ ބޮޑު ބައެއްގައި ފެން ބޮޑުވެއްޖެއެވެ.
ނަރުދޫއަށް އުދައަރައި ރަށުތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދިނުމުގައި، އެމްއެންޑީއެފް ނޮދަން އޭރިއާ ކޮމާންޑުން ސިފައިން ހަރަކާތްތެރިވަމުން އަންނައިރު ރޭ ދިޔަވަރު ބޮޑުވި ގަޑީގައި ނަރުދު އަށް ވަނީ ވަރަށް ބޮޑަށް އުދަ އަރާފައެވެ. ރަށު ތެރޭގެ ފެން ހިންދުމުގެ މަސައްކަތަށް ސިފައިންގެ ޓީމެއް އެ ރަށަށް ގޮސް ޕަންޕް ޖަހައިގެން ކުރަމުން އަންނައިރު، އެ ރަށުގެ އާންމު ދިރިއުޅުމަށްވެސް ވަނީ ބުރޫއަރާފައެވެ.
ނަރުދޫއަށް އުދަ އެރުމުގެ ސަބަބުން ރަށުގެ ވަރަށް ބޮޑު ސަރަހައްދެއްގައި ފެން ބޮޑުވެފައިވާއިރު ގާތްގަނޑަކަށް 12 ވަރަކަށް ގެއަށް ވަނީ ފެންވަދެފައެވެ.
މި ދުވަސްވަރު ރާއްޖެއަށް މޫސުން ގޯސްވެ، ފެންބޮޑުވެ ގެއްލުންތައް ލިބެމުން އަންނަ ދުވަސްވަރެކެވެ. ރާއްޖޭގެ މޫސުމާއި ބެހޭ ގައުމީ އިދާރާ (މެޓް) އިން ބުނީ މިއަދުވެސް ރާއްޖޭގެ ބޮޑުސަރަހައްދަކަށް މޫސުމް ގޯސްވާނެކަމަށެވެ. ރާއްޖޭގެ ބޮޑު ބަޔަކަށް ވައިޓް އެލާޓް ނެރެފައިވާއިރު ބ. އަތޮޅުން އައްޑޫ ސިޓީއަށްގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ކަނޑުތައް ގަދަވާނެ ކަމަށް ލަފާކޮށް މޫސުމަށް ސަމާލުވުމަށް މެޓުން ވަނީ އިލްތިމާސްކޮށްފައެވެ.