ހަވީރު މީޑިއާ ގްރޫޕުގައި ހިމެނޭ މީހުންނާއި ހަވީރު ނޫހުގެ ހުރިހާ މުވައްޒަފުން އާ ނޫހެއް ފަށައިގެން ހަވީރުގެ ހުރިހާ ސިއްރުތައް ބޭނުންކޮށް އެ ނޫހާ ވާދަކުރުމަކީ ކަނޑައެޅިގެން ހުރި މަކަރާއި ހީލަތެއް ކަމަށް ހަވީރު ނޫހުގެ ތިން ހިއްސާދާރަކު ބުނެފި އެވެ. ހަވީރު ނޫހުގެ ހިއްސާދާރުންގެ ތެރޭގައި ހިމެނޭ އަބްދުﷲ ފާރޫގު ހަސަނާއި އިބްރާހީމް ރަޝީދު މޫސާ އާއި މުހައްމަދު ނައީމް ނެރުއްވި ބަޔާނެއްގައި ވިދާޅުވީ މަކަރާއި ހީލަތުގެ އެފަދަ ކަމެއް ވެގެން ހިނގައްޖެނަމަ ހަވީރުގެ ވިޔަފާރި ފަނާވެ، ހަވީރު ބަނގުރޫޓުވެ، ހަވީރަށް އިއާދަނުކުރެވޭނޭ ގެއްލުންތަކެއް ލިބޭނެކަން ކަށަވަރު ކަމަށެވެ. "މިހާރުގެ ހާލަތައް ބަލާއިރު، ހަވީރުގެ ވިޔަފާރިތަކުގެ ފައިދާއާ މެދު މުހައްމަދު ޒާހިރު ހުސައިނާއި، ހަވީރު މީޑިއާ ގްރޫޕުން އަމަލު ކުރީ ކޮން ގޮތަކަށް ކަމެއް ނޭނގެ އެވެ. ހަވީރުގެ ބޭންކު އެކައުންޓުގެ ހާލަތު އަޅުގަނޑުމެންނަށް އެންގުމަށ އެފަރާތުން ވަނީ އިންކާރުކޮށްފަ އެވެ. ހަވީރުގެ ނަމުގައި ދަރަންޏަށް ނަގާފައި ހުރިކަން ނުވަތަ ނޫން ކަން ވެސް، ދަރަންޏަށް ނަގާފައި ހުރިނަމަ ހުރީ ކޮން ގޮތަކަށް، ކޮންތަނަކުން މިހާ މިންވަރަކަށް ކަމެއް ވެސް އަޅުގަނޑުމެންނަށް އަންގާފައެއް ނެތެވެ،" ތިން ހިއްސާދާރުން ވިދާޅުވި އެވެ. ހަވީރު ނޫހުގެ އަނެއް ތިން ހިއްސާދާރުންގެ ބައިވެރިވުން ނެތްގޮތަށް އެ ނޫސް ނުހިންގުމަށް ސިވިލް ކޯޓުން އަމުރު ނެރެފައި ވަނިކޮށް، އެ އަމުރަށް ގޮންޖައްސަވައި ޒާހިރު ހުސައިން ހަވީރު ނޫސް ހުއްޓާލީ ކަމަށް ވެސް އެބޭފުޅުންގެ ބަޔާނުގައި ވަނީ ވިދާޅުވެފަ އެވެ. އިސްލާމީ ޝަރީއަތާއި ގާނޫނުގެ ދާއިރާ އިން ކިޔަވައިދޭ ޔުނިވާސިޓީއަކަށް ދުވަހަކު ނުގޮސް ތިބި ހާލު އިސްލާމީ ޝަރުއީ ގާއިދާތަކާއި ގާނޫނު އަސާސީ އާއި ގާނޫނުތައް ރޯނުބައިކޮށް މާނަކޮށްގެން ހަގީގަތް ފޮރުވުމަށް މަދުބަޔަކު ލިޔުންތައް ލިޔެ ޝާއިއުކުރަމުންދާ ކަމަށް ވެސް ތިން ހިއްސާދާރުން ވިދާޅުވި އެވެ. "ހަވީރުގެ މުވައްޒަފުން މަސައްކަތަށް ނުކުތުން މަނާކުރީ އަޅުގަނޑުމެނެއް ނޫނެވެ. އެމީހުންގެ މުސާރަ ދިނުން ހުއްޓާލީ އަޅުގަނޑުމެނެއް ނޫނެވެ. ހަވީރުގެ އޮޕަރޭޝަންސް މެދުކަނޑައިލީ އަޅުގަނޑުމެނެއް ނޫނެވެ. މި ހުރިހާ ކަމެއް ވެސް ކުރެއްވީ އަޅުގަނޑުމެން ތަކުރާރުކޮށް އެދެމުންދިޔަ އެދުމާ ޚިލާފަށް އަދި ކޯޓުގެ ސަރީޙަ ހުކުމްތަކާއި އަމުރުތަކާއި ޚިލާފަށް މުހައްމަދު ޒާހިރު ހުސައިނާއި ހަވީރު މީޑިއާ ގްރޫޕުންނެވެ. ހިއްސާދާރުންގެ މެދުގައި އޮތް މައްސަލައިގެ ތެރެއަށް ހަވީރުގެ މުވައްޒަފުން ވައްދާފައި ވަނީ ޒާހިރު ހުސައިނާއި ހަވީރު މީޑިއާ ގްރޫޕުން ކަމަށް ވެސް އެ ބަޔާނުގައި ވިދާޅުވެފައި ވެއެވެ. ތިން ހިއްސާދާރުން ވިދާޅުވީ ހަވީރު ނޫހުގައި ހުރި މުވައްޒަފަކަށް އެހެން ވަޒީފާއަކަށް ދެވޭނީ ހަވީރާ އެކު ވެފައިވާ އެއްބަސްވުން ޝަރުއީ އަދި ގާނޫނީ ހަމަތަކުގެ މަތިން ޓާމިނޭޓު ކުރުމަށްފަހުގައި ބުއްދި ސަލާމަތުން ހުރި ކޮންމެ މީހަކު ގަބޫލުކުރާނެ ކަމެކެވެ. "މި ފުރުސަތުގައި އަޅުގަނޑުމެން އެންމެހައި ފަރާތްތަކަށް ކަށަވަރުކޮށްދޭން ބޭނުންވަނީ އަދުލުވެރި އިންސާފުވެރި ގޮތެއްގެމަތިން ހަވީރުގެ ވަޒީފާގެ އެއްބަސްވުން ޓާމިނޭޓުކޮށްފައި އެހެން ވަޒީފާއަކަށްދާން ބޭނުން މުވައްޒަފަކަށް އަޅުގަނޑުމެންގެ ފަރާތުން އެއްވެސް ހުރަހެއް ނޯންނާނެ ކަމެވެ. ނަމަވެސް ވަޒީފާގެ އެއްބަސްވުމާ ޚިލާފަށް އެމްޕްލޯޔަރުގެ ހައްގުގައި ކޮޅުފައިން ޖަހައިފައި ނުކުމެގެން ދިޔުމުގެ ފުރުސަތު މުވައްޒަފަށްދޭ އެއްވެސް އިދާރާއެއް ދިވެހިރާއްޖޭގައި ވެސް ސިންގަޕޯރުގައި ވެސް ޔުނައިޓެޑް ކިންގް ޑަމްގައި ވެސް، އަދި އެހެން ގައުމެއްގައި ވެސް، އަދި އެހެން ގައުމެއްގައި ވެސް، މިއިން ގައުމެއްގެ ޕަބްލިކް ސެކްޓަރުގައި ވެސް އަދި ޕްރައިވެޓް ސެކްޓަރުގައި ވެސް ނުހުންނާނެކަން އެއީ ކަނޑައެޅިގެން އެނގޭ ހަގީގަތެކެވެ،" ތިން ހިއްސާދާރުން ވިދާޅުވި އެވެ. ހަވީރު ނޫހުގެ ތިން ހިއްސާރުން ހުށަހެޅި މައްސަލާގައި ސިވިލް ކޯޓުން ކުރި ހުކުމްގައި ވަނީ ދެ އަހަރުވަންދެން އެހެން ނޫހެއްގައި އެމީހުންނަށް ވަޒީފާ އަދާނުކުރެވޭނެ ކަމަށެވެ. އަދި އެ ހުކުމް ތަންފީޒު ކުރަން ހޯމް މިނިސްޓްރީގެ މައްޗަށް ވަނީ އަމުރުކޮށްފަ އެވެ. އެ މައްސަލަ ހަވީރު ނޫހުގެ ކުރީގެ މުވައްޒަފުން ވަނީ ހައިކޯޓުގައި އިސްތިއުނާފު ކޮށްފަ އެވެ.