ހުޅުމާލޭގެ ދެވަނަ ފިޔަވަހީގައި ކުރިއަށްދާ ފްލެޓުތައް ނިމެންވާ އިރަށް ކުރީ ސަރުކާރުން އެ ފްލެޓުތައް ދޫކުރި ގޮތް ބަލަން އުފެއްދި ކޮމިޓީގެ މަސައްކަތް ނިންމާނެ ކަމަށް ރައީސުލްޖުމްހޫރިއްޔާ އޮފީހުގެ ތަރުޖަމާން ހީނާ ވަލީދު ވިދާޅުވެއްޖެއެވެ.
ހީނާ ވިދާޅުވީ ފްލެޓު ކޮމިޓީގެ މަސައްކަތް ބާރަށް ކުރިޔަށް ދާކަމަށާއި އަދި އެކަމާ ގުޅޭ ގިނަ މައްސަލަތަކެއް އޭސީސީން ފާހަގަކޮށްފައިވާކަމަށާއި ފްލެޓުތައް ހަދާ ނިމެންވާއިރަށް ކޮމިޓީގެ މަސައްކަތްތައް ނިންމައި ފްލެޓު ހަވާލު ކުރާނެ ކަމަށެވެ.
މިދިޔަ ސަރުކާރުން ދޫކުރަން ނިންމި ފްލެޓުތައް ލިބޭނެ ފަރާތްތަކުގެ ލިސްޓެއް އޭރު ނެރުނު ނަމަވެސް އެންޓި ކޮރަޕްޝަން ކޮމިޝަން (އޭސީސީ) އިން ފްލެޓުތައް ހަވާލު ކުރުން ހުއްޓުވާ އެ މައްސަލަ ބެލުމަށް ފަހު ބޮޑެތި މައްސަލަތަކެއް ފާހަގަކުރުމާއެކު މި ސަރުކާރުން ވަނީ އެ މައްސަލަތައް ބެލުމަށް ކޮމެޓީއެއް އެކުލަވާލާފައެވެ.