ލ. ގަން ކައިރީގައި އޮންނަ 'މަހަކަންފުށި' ފަޅު ރަށް ކައިރިއަށް މަސް ހިފަން ފައިބާ އުޅުނު ފިރިހެނަކު ގެއްލިގެން ހޯދަމުން ދަނިކޮށް މަރުވެފައި އޮއްވައި ފެނިއްޖެއެވެ. ފުލުހުންގެ މީޑިއާ އޮފިޝަލް 'ސަން' އަށް ވިދާޅުވީ، ލ. ގަން ކައިރީ އޮންނަ ފަޅު ރަށެއް ކަމަށްވާ މަހަކަންފުށި ކައިރިއަށް މަސް ހިފަން މޫދަށް ފައިބާ އުޅުނު މީހަކު ގެއްލިފައިވާ މައްސަލައެއް މިއަދު ހެނދުނު 09:50 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ. އެކަމާ ގުޅިގެން ގަމު ކައުންސިލުން ކުރި ޕޯސްޓެއްގައި ބުނީ މިއަދު ހެނދުނު ބަޔަކާ އެކުގައި މަހަކަންފުށި ކައިރިއަށް، ދާ ޖަހަގެން މަސް ހިފަން ދިޔަ އަބުދުލްސަމަދު މުހައްމަދު (ސަމަދު) ތުނޑީ، ފެސްފަރީ ލ. ގަން، ގެެއްލިގެން ހޯދުމުގެ މަސައްކަތް ކުރިއަށް ދާ ކަމަށެވެ. 'ސަން' އަށް މައުލޫމާތު ދެމުން ގަމު ކައުންސިލުން ބުނީ، އެ މީހާ ހޯދަމުން ދަނިކޮށް، މަރުވެފައި އޮއްވައި ފެނުނު ކަމަށެވެ. އަދި އޭނާ ފަޅު ރަށް ކައިރިން ގެއްލުނީ ދާ އަޅައިގެން މަސް ހިފަން ފައިބާ އުޅެނިކޮށް ކަމަށް ކައުންސިލުން ބުންޏެވެ. ފާހަގަކޮށްލެވޭ ގޮތުގައި މި ދުވަސްވަރަކީ ރާއްޖޭގެ އެކި ހިސާބުތަކަށް ވިއްސާރަކޮށް، މޫސުން ވެސް ގޯސް ދުވަސްވަރެކެވެ. މީގެ ކުރިން ވެސް މޫސުން ގޯސްވުމުގެ ސަބަބުން، މޫދަށް އެރި އުޅުމުގެ ތެރެއިން އެކިއެކި ހިތާމަވެރި ހާދިސާތައް ހިނގާފައި އެބަހުއްޓެވެ. އެޕްރީލް މަހުގެ ދެވަނަ ދުވަހުގެ ރޭ ތ. އަތޮޅުގައި ދަތުރުކުރަމުން ދަނިކޮށް "ހޮޅުދޫ ބޯޓު"ގައި ހިނގި އަލިފާނުގެ ހާދިސާގައި ވެސް ކަނޑުމައްޗަށް ލ. އަތޮޅު ޒުވާނަކު ގެއްލުނެވެ. އެއީ ލ. މާވަށަށް އުފަން، އަލީ މުޝްފިގު ޝަރީފެވެ.