އެމެރިކާގައި "ނުރައްކާތެރި" އޮލިގާކީއެއް ނުވަތަ ނުފޫޒު ގަދަ މަދު ބައެއްގެ އަތުގައި ހުރިހާ ބާރެއް އޮންނަ ގައުމެއްގެ ގޮތުގައި ބައްޓަވަމުންދާ ކަމުގެ އިންޒާރު، އެމެރިކާގެ ރައީސްކަމުން ވަކިވެވަޑައިގަންނަވާ ޖޯ ބައިޑަންގެ ވަދާއީ ތަގުރީރުގައި މިއަދު ދެއްވައިފި އެވެ.
"މިއަދު އެމެރިކާގައި ބައްޓަންވަމުންދަނީ އިންތިހާއަށް މުއްސަނދިކަމާއި ބާރާއި ނުފޫޒުގެ އޮލިގާކީއެއް. އެއީ ހަގީގަތުގައި އަހަރެމެންގެ މުޅި ޑިމޮކްރަސީ އާއި އަހަރެމެންގެ އަސާސީ ހައްގުތަކާއި މިނިވަންކަމަށް ނުރައްކާވާ ކަމެއް،" އޭނާ ވިދާޅުވި އެވެ.
އުމުރުން 82 އަހަރުގެ ބައިޑަންގެ އެ އިންޒާރު އަމާޒުކުރެއްވީ މުއްސަނދި، ޓެކްނޮލޮޖީގެ ދާއިރާގައި ހަރަކާތްތެރިވާ ނުފޫޒު ގަދަ މީހުންނަށެވެ.
ބައިޑަން ވިދާޅުވި މުއްސަނދި، "ޓެކް-އިންޑަސްޓްރިއަލް ކޮމްޕްލެކްސް" އަކީ ޓްރަމްޕާ ގާތް އަދި އޭނާގެ ކެމްޕޭނަށް ބޮޑު މާލީ އެހީތެރިކަމެއް ފޯރުކޮށްދިން ދުނިޔޭގެ އެންމެ މުއްސަނދި އީލޮން މާސްކް ފަދަ މީހުންނެވެ. އެއާ އެކު، އެމޭޒަންގެ ވެރިޔާ ޖެފް ބެޒޯސް އާއި ފޭސްބުކްގެ މާކް ޒުކަބާގް ފަދަ އެހެން މީހުން ވެސް ވަނީ އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް އެނބުރި ވައިޓް ހައުސްއަށް ވަޑައިގަތުމުގެ ކުރިން އޭނާއާ ގުޅުން ރަނގަޅު ކުރުމަށް މަސައްކަތްތަކެއް ކޮށްފަ އެވެ.
ވައިޓް ހައުސްއިން ދެއްވި އެންމެ ފަހުގެ ޓީވީ ތަގުރީރުގައި ބައިޑަން ވަނީ އޭނާގެ އެއް ދައުރުގެ ވެރިކަމުގެ ރެކޯޑަށް ވާހަކަ ދައްކަވާފަ އެވެ. އަދި މޫސުމަށް އަންނަ ބަދަލުތަކާއި ސޯޝަލް މީޑިއާގެ ދޮގު މައުލޫމާތުތަކާ ގުޅޭ އިންޒާރުތައް ވެސް އޭނާ ދެއްވި އެވެ.
"އަހަރެމެން އެކުގައި ކުރި ހުރިހާ ކަމެއްގެ ފުރިހަމަ އަސަރު އިހުސާސް ކުރަން ވަގުތު ނަގާނެ. ނަމަވެސް އޮށްތައް އިންދާފައި ހުރުމުން، ބޮޑުވެ، ކުރިއަށް އޮތް 10 ވަރަކަށް އަހަރު މާ ފޮޅޭނެ،" ބަައިޑަން ވިދާޅުވި އެވެ.
ބައިޑަން ވަނީ އެމެރިކާގެ ރައީސްކަމުގެ ހުވާ އަންނަ ހޯމަ ދުވަހު ކުރައްވާ ޓްރަމްޕްގެ ދެވަނަ ވެރިކަމުގެ ދައުރަށް ކާމިޔާބީއަށް އެދިވަޑައިގެންފަ އެވެ. ނަމަވެސް، އޭގެ ފަހުން ބައިޑެން ވަނީ "މިވަގުތު ގިނަ ކަންތައްތަކެއް ދަތިވެފައިވާ" ކަމުގެ އިންޒާރު ދެއްވާފަ އެވެ.