ރ. އިނގުރައިދޫގެ ގިރާ ސަރަޙައްދުގައި ހުރި ގެތަކަށް އުދަ އަރައި ބޮޑެތި ގެއްލުންތަކެއް ވަމުންދާ ކަމަށް އިނގުރައިދޫ ކައުންސިލުން ބުނެފިއެވެ.
އެ ކައުންސިލުން ފޭސްބުކުގައި ކުރި ޕޯސްޓެއްގައި ބުނީ އެންމެ ބޮޑަށް ގެއްލުން ލިބެމުންދަނީ ގިރާ ސަރަޙައްދުގައި އޮތް ކިނބިގަސްގެއަށް ކަމަށެވެ. މި ގެއަށް ލޮނުގަނޑު ވަންނަމުންދާ ކަމުގެ ޝަކުވާ ލިބިފައިވާ ކަމަށް ކައުންސިލުން ހާމަކޮށްފައިވެއެވެ.
މި މައްސަލަ 2024 ވަނަ އަހަރު ސަރުކާރުގެ ސަމާލުކަމަށް ގެނެސް، ކަމާބެހޭ މިނިސްޓްރީގެ ބޭފުޅުން ރަށަށް ޒިޔާރަތްކޮށް ސާރވޭކުރި ނަމަވެސް، މިހާތަނަށް އެއްވެސް ޢަމަލީ މަސައްކަތެއް ނުކުރެވި އޮތުމުގެ ސަބަބުން، މޫސުން ގޯސް ދުވަސްވަރު އެ ސަރަޙައްދުގައި ދިރިއުޅޭ ރައްޔިތުންގެ މުދަލާއި ގެދޮރަށް ގެއްލުން ލިބެމުންދާ ކަމަށް ކައުންސިލުން ފާހަގަކޮށްފައިވެއެވެ.
Advertisement
ރައްގިރުމުގެ މައްސަލައަށް ހައްލެއް ހޯދުމަށް ކުރެވެމުންދާ މަސައްކަތްތަކަށް ކަމާބެހޭ ފަރާތްތަކުން އެކަށީގެންވާ އިޖާބައެއް ނުލިބި، މި އިރުވައި މޫސުމުގެ ގަދަ ދުވަސްވަރު ރައްޔިތުން ނުރައްކަލަށް ހުށަހެޅިފައިވާ ކަމަށް ކައުންސިލުން ބުނެފައިވެއެވެ.
މޫސުން ގޯސްވެ އެކި ރަށްތަކަށް ގެއްލުންތައް ވަމުންދާއިރު އެންޑީއެމްއޭއިން ދީފައިވާ މަޢުލޫމާތުގައި، ބޯކޮށް ވާރޭވެހުމާއި އުދަ އެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެގެން ރިޕޯޓު ލިބިފައިވާ ކަމަށް ބުނެފައިވެއެވެ. އޭގެ ތެރޭގައި އުދަ އެރުމުގެ ސަބަބުން ށ. ނަރުދޫ އާއި ރ. އިނގުރައިދޫ ހިމެނެއެވެ. އަދި ވާރޭވެހި ފެންބޮޑުވެގެން ދ. ކުޑަހުވަދޫ، ދ. މީދޫ، ފ. ނިލަންދޫ އަދި ފ. މަގޫދޫ ހިމެނޭ ކަމަށް އެންޑީއެމްއޭއިން ބުނެފައިވެއެވެ.
ބައެއް ރަށްރަށުގައި ފެން ހިއްކުމުގެ މަސައްކަތުގައި ސިފައިން ހަރަކާތްތެރިވަމުންދާ ކަމަށާއި، މިހާތަނަށް އެއްވެސް ހާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަމަށްވެސް އެންޑީއެމްއޭއިން ބުނެފައިވެއެވެ.