ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުން ޑިޖިޓަލްކޮށް، ނޭޝަނަލް ޑިޒާސްޓާ މެނޭޖްމަންޓު އޮތޯރިޓީން (އެންޑީއެމްއޭ) ''ޑާލާ"ގެ ނަމުގައި ޕްލެޓުފޯމެއް އިފުތިތާހުކޮށްފިއެވެ. މިއަދު ހެނދުނު ބޭއްވި ރަސްމިއްޔާތެއްގައި ޑާލާ ޕްލެޓްފޯމް އިފުތިތާހުކޮށްދެއްވީ، ހޯމް މިނިސްޓަރު އަލީ އިހުސާނެވެ. އެންޑީއެމްއޭއިން އިފުތިތާހުކުރި، "ޑާލާ" ޕްލެޓްފޯމަކީ ކާރިސާތަކުގައި ލިބޭ ގެއްލުންތައް ރިފޯޓުކުރުން ޑިޖިޓަލްކޮށް، ކާރިސާތަކާ ގުޅޭ ރިޕޯޓުތައް ތައްޔާރުކުރުމާއި ހެކީގެ މައްޗަށް ބިނާކޮށް ނިންމުންތައް ނިންމުމުގެ ނިޒާމު ހަރުދަނާކުރުމަށް ފަރުމާކޮށްފައިވާ ގައުމީ ޑިޖިޓަލް ޕްލެޓްފޯމެކެވެ. ކާރިސާތަކުން ލިބޭ ގެއްލުންތައް ރިޕޯޓުކޮށް، ތަފާސްހިސާބު ބަލަހައްޓަން އެންޑީއެމްއޭއިން ޕްލެޓުފޯމު އިފްތިތާހުކުރި ރަސްމިއްޔާތުގައި ހިސާންއާއި މިނިސްޓަރު އިހުސާން ---- ފޮޓޯ/ އެންޑީއެމްއޭ އެންޑީއެމްއޭއިން ބުނީ، ކުރިން މެނުއަލްކޮށް ކުރި، ކާރިސާތަކުގެ ގެއްލުން ވަޒަންކުރުމުގެ މަސައްކަތް މި ޕްލެޓްފޯމާއެކު، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލު ވާނެ ކަމަށެވެ. މިގޮތުން، އެ ޕްލެޓުފޯމު މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓު ކުރެވޭއިރު، ލިބުނު ގެއްލުންތަކުގެ ހިސާބުތައް އޮޓޮމެޓިކުން ތައްޔާރުކުރުމާއި ގެއްލުން ވަޒަންކުރުމުގެ ސައްހަކަން އިތުރުވާނެ ކަމަށް އެންޑީއެމްއޭއިން ވަނީ ބުނެފައެވެ. އެ ޕްލެޓުފޯމުން އެންމެ ބޮޑު ފަސޭހައެއް ލިބޭނީ، ކާރިސާތަކާ ގުޅިގެން އެހީއަށް އެދޭ ފަރާތްތަކަށް ކަމަށް އެ އޮތޯރިޓީން ވަނީ ބުނެފައެވެ. އެ ޕޯޓަލް މެދުވެރިކޮށް ފަސޭހައިން އެހީއަށް އެދި ހުށަހެޅޭއިރު، އެހީގެ ކަންކަން ކުރިއަށްދާ ގޮތާއި ހުށަހަޅާފައިވާ މައުލޫމާތު ބަދަލުކުރުން ފަދަ ކަންކަމާ ގުޅޭ މައުލޫމާތު އެސްއެމްއެސް މެދުވެރިކޮށް އެ ފަރާތްތަކަށް ލިބޭނެއެވެ. އެހެންވެ، ކާރިސާތަކަށް އިޖާބަދިނުމާއި އިއާދަކުރުމުގެ މަސައްކަތް މިހާރަށްވުރެ އަވަސްވެ، ހަރުދަނާ ވާނެ ކަމަށް އެންޑީއެމްއޭއިން ގަބޫލުކުރެއެވެ. އޭގެއިތުރަށް، ޑާލާ ޕޯޓަލްއިން ކާރިސާގެ ބާވަތްތަކާއި ގެއްލުން ލިބުނުކަމަށް ރިޕޯޓުކުރެވުނު ދާއިރާއާއި ސަރަހައްދާއި އާބާދީގެ ގިންތިތަކާއި މުދަލުގެ ބާވަތްތަކަށް ބަލައި ވަކިވަކިން މައުލޫމާތު އެއްކުރުމުގެ ގާބިލުކަން ލިބިފައިވާ ކަމަށް އެންޑީއެމްއޭއިން ފާހަގަކުރިއެވެ. އެ ކަމުގެ ސަބަބުން، ކާރިސާތަކުގެ އަސަރުތައް ފުންކޮށް ދެނެގަނެވި، އެހީތެރިކަން ބޭނުންވާ ދާއިރާތަކަށް އަމާޒުކޮށްގެން ފިޔަވަޅު އެޅުމަށް މަގުފަހިވާނެ ކަމަށް އެ އޮތޯރިޓީން ވަނީ ބުނެފައެވެ. އެންޑީއެމްއޭގެ ސީއީއޯ ހިސާން ހަސަން --- ފޮޓޯ/ އެންޑީއެމްއޭ މި ޕްލެޓުފޯމާ ގުޅުވައި، އެންޑީއެމްއޭގެ ސީއީއޯ ހިސާން ހަސަން ވިދާޅުވީ، ޑާލާ ޕްލެޓުފޯމަކީ ހަމައެކަނި ޑިޖިޓަލް ނިޒާމެއް ނޫން ކަމަށާއި އެއީ، ސަރުކާރުގެ 'ޑިޖިޓަލް މޯލްޑިވްސް 2.0' ސިޔާސަތަށް އޮތް އިތުބާރު ރަމްޒުކޮށްދޭ ޕްލެޓްފޯމެއް ކަމަށެވެ. އެންޑީއެމްއޭއިން ބުނީ، ޑާލާ ޕްލެޓުފޯމު ފަރުމާކުރުމުގެ މަސައްކަތްކުރީ، ޔޫއެންޑީޕީގެ ފަންޑިން ވިންޑޯ މެދުވެރިކޮށް ޑެންމާކާއި ލަގްޒެމްބާގްއާއި ދެކުނު ކޮރެއާ ސަރުކާރުގެ އެހީއާއެކު ކަމަށެވެ.