އޭލެވެލް އިމްތިހާނުން އެއް ވަނަ ހޯދާ ދަރިވަރުންނަށް ރައީސުލްޖުމްހޫރިއްޔާ ދެއްވާ ސްކޮލަޝިޕް، އަންނަ އަަހަރުން ފެށިގެން ލިމިޓްކުރާ ގޮތަށް ނިންމައިފި އެވެ. އޭލެވެލްގެ ގަދަ ދިހައެއްގެ އެއްވަނައިގައި ހިމެނޭ ހުރިހާ ކުދިންނަށް މީގެ ކުރިން ސްކޮލަޝިޕް ދިން ނަމަވެސް، އަންނަ އަހަރުން ފެށިގެން އެ އަދަދު ވަނީ 15 އަށް މަދުކޮށްފަ އެވެ. މިކަން އަންގައި، މީގެ ދެ މަސް ކުރިން އެޑިއުކޭޝަނުން އާއްމުކޮށްފައިވާ އުސޫލެއްގައި ބުނީ މި 15 ކުދިން ހޮވާނީ، އެކަމަށް ކުރިމަތިލާ ދަރިވަރުންގެ ތެރެއިން އެންމެ މަތިން ޕޮއިންޓް ލިބޭ ކުދިން ކަމަށެވެ. ޕޮއިންޓް ދޭ އިރު، މާއްދާތަކުން އޭ ގްރޭޑް ލިބޭ ދަރިވަރުންނަށް 12 ޕޮއިންޓް އަދި "އޭ ޕްލަސް" ލިބޭ ދަރިވަރުންނަށް 15 ޕޮއިންޓް ދެ އެވެ. މިކަން ކަނޑައަޅައި، ސްކޮލަޝިޕަށް ހުށަހަޅާ ދަރިވަރުންނާ އިންޓަވިއުކުރާނީ އެކަމަށް ހާއްސަ ޕެނަލަކުން ކަމަށް ވެސް އިއުލާންގައިވެ އެވެ. އޭލެވެލް އިން އެއް ވަނަ ހޯދައިގެން، ރައީސްގެ ސްކޮލަޝިޕް ލިބޭ ހުރިހާ ދަރިވަރުންނަށް، އެ ކުއްޖަކު ބޭނުން ގައުމަކުން، ބޭނުން ދާއިރާއަކުން ކިޔެވުމުގެ ފުރުސަތު ކުރިން ދިން ނަމަވެސް އަންނަ އަހަރުން ފެށިގެން އެކަން ވެސް ވަނީ ބަދަލުކޮށްފަ އެވެ. އެގޮތުން އެ ކުއްޖަކު ބޭނުންވާ ގައުމަކުން ކިޔެވުމުގެ ފުރުސަތު ލިބެނީ ސްކޮލަޝިޕް ލިބޭ 15 ދަރިވަރުންގެ ތެރެއިން އެންމެ މަތިން ޕޮއިންޓް ލިބޭ ފަސް ކުދިންނަށެވެ. ބާކީ ތިބި 10 ކުދިންނަށް ކިޔެވުމުގެ ފުރުސަތު ދެނީ ތަރައްގީވަމުން އަންނަ ނުވަތަ ކުޑަކޮށް ތަރައްގީވެފައިވާ ގައުމުތަކުގެ ތެރެއިން ގައުމަކުންނެވެ. އެކަމަކު އެންމެ ކުޑަކޮށް ތަރައްގީވެފައިވާ ގައުމުތަކުގެ ތެރޭގައި ހިމެނުނަސް އެ ގައުމެއްގައި ކިޔަވާއިރު ކުރަން ޖެހޭ ހަރަދު، ތަރައްގީވެފައިވާ ގައުމެއްގެ ހަރަދާ އެއްވަރުވާ ނަމަ އެ ގައުމަަކަށް ނުދެވޭނެ އެވެ. މިދިޔަ އަހަރުގެ އޭލެވެލް އިމްތިހާނުން 23 ދަރިވަރަކު އެއް ވަނަ ހޯދި އެވެ.