ގެސްޓު ހައުސްތަކާއި ބިދޭސީން ނިދުމުގެ އިންތިޒާމު ހަމަޖެހިފައިވާ ތަންތަނަށް ވަދެ އެމީހުންގެ އަތުން ފޯނާއި ފައިސާ ފަދަ ތަކެތި އަތުލަމުންދާ ކަމުގެ މަޢުލޫމާތު އިމިގްރޭޝަން ޑިޕާޓްމަންޓަށް ލިބެމުން އަންނަ ކަމަށް އެ ޑެޕާޓްމަންޓުން ބުނެފި އެވެ. އިމިގްރޭޝަން ޑިޕާޓްމަންޓުން މިއަދު އާންމު ކުރި ބަޔާނެއްގައި ބުނީ، އިމިގްރޭޝަންގެ ފަރާތުން ހިންގާ ހާއްސަ އޮޕަރޭޝަންތަކުގައި، ގެސްޓް ހައުސް ފަދަ ތަންތަނަށް ވަންނާނީ ކޯޓު އަމުރެއް އޮވެގެން ކަމަށެވެ. އަދި ކޯޓު އަމުރެއް ނެތި އިމިގްރޭޝަންގެ މުވައްޒަފުން ގެސްޓް ހައުސްތަކާއި ގޭގެއަށް ނުވަންނާނެ ކަމަށް ވެސް އެ ޑިޕާޓްމަންޓުން ބުންޏެވެ. "އަދި ޚާއްޞަ ރެއިޑް އޮޕަރޭޝަންތަކުގައި ތަންތަން ބަލައި ފަސްކުރަންދާ ނަމަ އިމިގްރޭޝަން އޮފިސަރުން ދާނީ ފުލުހުންނާ އެކުގަ އެވެ،" އިމިގްރޭޝަން މުވައްޒަފުން ކުލަ ހެދުމުގައި ތަންތަނަށްދާ ނަމަ އިމިގްރޭޝަންގެ މުވައްޒަފެއްކަން އަންގައިދޭ ކާޑު ފެންނާނެ ގޮތަށް އޮފިސަރުންގެ ހެދުމުގައި ހަރުކޮށްފައި ހުންނާނެ ކަމަށް ވެސް އެ ޑިޕާޓްމަންޓުން ބުންޏެވެ. "ވީމާ، އިމިގްރޭޝަން އޮފިސަރުން ކަމަށް ބުނެ ގެސްޓު ހައުސްތަކާ ބިދޭސީން ދިރިއުޅޭ ތަންތަނަށް އެއްވެސް ފަރާތަކުން ވަދެފި ނަމަ އެފަަދަ ފަރާތްތަކުގެ އަތުގައި ކޯޓު އަމުރާއި އިމިގްރޭޝަން މުވައްޒަފެއްކަން އަންގާދޭ ފާސް އޮތްތޯ ބެއްލެވުމަށާ އަދި އެކުގައި ފުލުހުން ތިބިކަން ޔަގީން ކުރެއްވުމަށް ޚާއްޞަ ސަމާލުކަން ދެއްވުމަށް އިލްތިމާސް ކުރަމެވެ."