ހަވީރުގެ ކުރީގެ މުވައްޒަފުންނަށް އެއްވެސް މީޑިއާއެއްގައި ދެ އަހަރު ވަންދެން މަސައްކަތް ނުކުރެވޭ ގޮތަށް ސިވިލް ކޯޓުން ކުރި ހުކުމް އިސްތިއުނާފް ކުރުމަށް ބަންޑާރަނައިބުގެ އޮފީހުން ހުށައަޅާ މައްސަލައިގެ ތެރެއަށް ވަނުމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ވެސް ނިންމައިފި އެވެ.
މީޑިއާ ކައުންސިލްގެ ރައީސް މުހައްމަދު އާސިފް ވިދާޅުވީ ދައުލަތުގެ ފަރާތުން އިސްތިއުނާފު ކުރާ މައްސަލައިގެ ތެރެއަށް ތަދައްހުލްވާން އެ ކައުންސިލުން ނިންމީ، މީޑިއާގައި މަސައްކަތްކުރާ އެތައް ބައެއްގެ ހައްގުތައް ގެއްލިފައިވާ ކަމަށް ގަބޫލު ކުރެއްވޭތީ ކަމަށެވެ.
މޮންދު ވިދާޅުވީ މީޑިއާތަކުގެ ދިފާއުގައި ނުކުތުމުގެ މަސްއޫލިއްޔަތު ގާނޫނީ ގޮތުން ހަވާލުވެފައިވަނީ މީޑިއާ ކައުންސިލަށް ކަމަށެވެ. އަދި ނޫސްވެރިންގެ ހައްގުތައް ގެއްލޭ ކަމަށް ފެންނަ ނަމަ، އެކަމަކަށް ހައްލެއް ހޯދައިދީ ހައްގުތައް ހިމާޔަތް ކުރުމަކީ ގާނޫނީ ގޮތުން މީޑިއާ ކައުންސިލާ މަތިކޮށްފައިވާ ޒިންމާއެއް ކަމުގައިވެސް ވިދާޅުުވި އެވެ.
މިގޮތުން ހަވީރުގެ ކުރީގެ މުވައްޒަފުންގެ ހައްގުތައް ގެއްލޭ ކަމަށް ގަބޫލުކުރެވޭތީ ދައުލަތުން ހައި ކޯޓުގައި އިސްތިއުނާފުކުރާ މައްސަލައިގެ ތެރެއަށް ވަނުމާ ގުޅޭ ގާނޫނީ މަސައްކަތް މާދަމާ ފައްޓަވާނެ ކަމުގައިވެސް މޮންދު ވަނީ ވިދާޅުވެފަ އެވެ.
ހަވީރުގެ ކުރީގެ މުވައްޒަފުންގެ ހައްގުތައް ގެއްލޭ ގޮތަށް ސިވިލް ކޯޓުން ކުރި ހުކުމް އިސްތިއުފާނު ކުރަން ހައި ކޯޓާއި ސުޕްރީމް ކޯޓަށް އެ މުވައްޒަފުންގެ ފަރާތުން ހުށަހަޅާފައިވާއިރު، ބަންޑާރަނައިބުގެ އޮފީހުން ވަނީ ސިވިލް ކޯޓުގެ ހުކުމުގައި ހިމެނޭ މުވައްޒަފުންގެ ބައި، ހައިކޯޓުގައި އިސްތިއުނާފު ކުރުމަށް ނިންމާފަ އެވެ. އަދި ދައުލަތުން އިސްތިއުފާނަށް ހުށަހެޅުމުން އެ މައްސަލައިގެ ތެރެއަށް މީޑިއާ ކަންސިލްގެ އިތުރުން މޯލްޑިވްސް ބްރޯޑްކާސްޓިން ކޮމިޝަނުންވެސް ވަންނާނެ ކަމުގައި އެކޮމިޝަނުން ވަނީ ބުނެފަ އެވެ.