ސްލާމިކް މިނިސްޓްރީން އިންތިޒާމުކޮށްގެން ބާއްވާ، އިސްލާމިކް ފެއަރ މިއަދު ހަވީރު ފެށުމަށް ނިންމައިފިއެވެ.
އިސްލާމިކް މިނިސްޓްރީން ވިދާޅުވީ، މި ފެއާގެ މަޤުޞަދަކީ އެ މިނިސްޓްރީން ރައްޔިތުންނަށް ފޯރުކޮށްދޭ ދީނީ ކަންތައްތަކާމެދު ހޭލުންތެރިކަން އިތުރުކޮށް، އިސްލާމީ ހުދޫދުގެ ތެރެއިން މުނިފޫހިފިލުވުމުގެ ކަންކަން އާއްމުންނަށް ހުޅުވާލަދިނުން ކަމަށާއި މުޖްތަމަޢުގައި އެއްބައިވަންތަކަމާއި އެއްބައެއްވަންތަކަން އާލާކުރުމަށް މަސައްކަތް ކުރުން ކަމަށެވެ.
މިއަދުން ފެށިގެން މި މަހުގެ 31 ގެ ނިޔަލަށް ކުރިއަށްދާ މި ފެއާ އޮންނާނީ، އިސްލާމީ މަރުކަޒުގެ ހޯލާއި އިސްލާމީ މަރުކަޒު މައިދާން ހިމެނޭ ސަރަހައްދުގައެވެ.
މި ފެއާގައި ސަރުކާރު ކުންފުނިތަކާއި ޔުނިވަރސިޓީތަކާއި އަމިއްލަ ޖަމިއްޔާ ޖަމާޢަތްތަކާއި ބުކްޝޮޕްތަކުން ބައިވެރިވާނެއެވެ. މި ފެއަރގައި ބައިވެރިވާ ސަރުކާރުގެ މުއައްސާތަކުގެ ތެރޭގައި މީރާ، ކީރިތި ޤުރުއާނާ ބެހޭ މަރުކަޒް، މޯލްޑިވްސް ޕޮލިސް ސަރވިސް އަދި އެމެ.އެން.ޑީ.އެފް ހިމެނެއެވެ. ބައިވެރިވާ ޖަމިއްޔާތަކުގެ ތެރޭގައި ޖަމުޢިއްޔަތުއް ސަލަފާއި އިސްލާމިކް ފައުންޑޭޝަން ހިމެނެއެވެ. ޔުނިވާސިޓީ ތަކުގެ ތެރޭގައި ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމިކް ޔުނިވަރސިޓީ ހިމެނެއެވެ. ބުކްޝޮޕް ގެތެރޭގައި ދަގަތަ، އަސްރަފީ އަދި ނޮވެލްޓީ ހިމެނެއެވެ. މީގެ އިތުރުން މެސެޖް އޮފް އިސްލާމުންވެސް މި ފެއަރގައި ބައިވެރިވާނެއެވެ.
އިސްލާމިކް މިނިސްޓްރީގެ ފަރާތުން ބަލަހައްޓަމުންދާ ދެ ފަންޑުކަމުގައިވާ ދީނީ ފަންޑާއި، ވަޤުފް ފަންޑުގެ ފަންޑު ފޮށިތަށް މި ފެއާގައި ބެހެއްޓިފައި ހުންނާނެ ކަމަށާއި، އަދި މި ފަންޑުތަކަށް އެހީވާން ބޭނުންފުޅުވާ ފަރާތްތަކަށް އެފުރުޞަތުވެސް މިފެއާގައި ހުޅުވާލެވިފައި ހުންނާނެ ކަމަށް، އިސްލާމިކް މިނިސްޓްރީން ހާމަކުރެއެވެ.
ފެއާ ހިނގަމުންދާއިރު ކުޑަކުދިންނަށް ޙާއްޞަކޮށްގެން ސްޓޭޖް ހަރަކާތްތަކެއް ކުރިއަށް ގެންދިޔުމަށް ނިންމާފައި ވާއިރު ކުޑަކުދިން ޝަޢުޤުވެރިވާކަހަލަ ގޭމް ހަރަކާތްތަށް ކުރިއަށްދާ އެކި ސްޓޯލްތަށް އިސްލާމީ މަރުކަޒު މައިދާނުގައި ބެހެއްޓިފައި ހުންނާނެ ކަމަށްވެސް، އިސްލާމިކް މިނިސްޓްރީން ހާމަކުރެއެވެ.
މި ފެއަރގެ މެއިން ސްޕޮންސަރަކީ މޯލްޑިވްސް ޙައްޖު ކޯޕަރޭޝަންއެވެ. އަދި ކޯ ސްޕޮންސަރ އަކީ އުރީދޫ މޯލްޑިވްސް އެވެ.
މި މަހުގެ 31 ގެ ނިޔަލަށް ފެއާ ކުރިއަށްދާނީ ހަވީރު ހަތަރަކުން ހަޔަކަށް އަދި ރޭގަނޑު އަށަކުން ދިހަޔަކަށެވެ.
މި ފެއާއަށް ކަނޑައަޅުއްވާފައިވާ ޝިޢާރަކީ "އުޚުއްވަތްތެރިކަން – މުޖުތަމަޢުގެ ބަދަހިން" މި ޝިޢާރެވެ.