މެޑްރިޑް (އޭޕްރީލް 2) - ފަހު ވަގުތު އެންޓޯނިއޯ ރުޑިގާ ޖެހި ގޯލުން ރެއާލް ސޮސިއެޑާޑް 5-4 ގެ އެގްރިގޭޓް ނަތީޖާ އިން ބަލިކޮށް ރެއާލުން ސްޕެނިޝް ކަޕްގެ ފައިނަލުން ޖާގަ ހޯދައިފި އެވެ.
ރެއާލްގެ ދަނޑުގައި ކުޅުނު ސެމީ ފައިނަލް ދެ ވަނަ މެޗު، އިތުރު ވަގުތުގެ ދެ ހާފް ކުޅެގެން ނިމުނީ 4-4 ގެ ނަތީޖާ އަކުންނެވެ. ރެއާލުން ވަނީ ސެމީ ފައިނަލް ފުރަތަމަ ލެގުގައި ސޮސައިޑާޑްގެ މައްޗަށް 1-0 ގެ ނަތީޖާ އަކުން ކުރިހޯދައިފަ އެވެ.
ރޭގެ މެޗުގެ 16 ވަނަ މިނިޓްގައި ސޮސިއެޑާޑްގެ އެންޑާ ބަރެނޭޗާ ވަނީ ގޯލު ޖަހައި އެ ޓީމަށް ލީޑު ނަގައިދީފަ އެވެ. އެކަމަކު، މެޗުގެ 30 ވަނަ މިނިޓްގައި ރެއާލްގެ ޒުވާން ފޯވާޑް އެންޑްރިކް ވަނީ ގޯލު ޖަހައި ނަތީޖާ ހަމަހަމަ ކޮށްދީފަ އެވެ. މިއީ، ވިނީޝިއުސް ޖޫނިއާގެ އެހީތެރިކަމާއެކު އެންޑްރިކް ޖެހި ގޯލެކެވެ.
އެކަމަކު، މެޗުގެ 72 ވަނަ މިނިޓްގައި ރެއާލްގެ ޑިފެންޑަރު ޑޭވިޑް އަލަބާ އަތުން ބައިކޮޅަށް ވަން ގޯލާ އެކު ސޮސިއެޑާޑް އިން އަލުން ލީޑު ނެގި އެވެ. އަދި މެޗުގެ 80 ވަނަ މިނިޓްގައި މިކޭލް އޮޔާޒަބާލް ވަނީ އިތުރު ގޯލެއް ޖަހައި އެ ޓީމުގެ ލީޑު ފުޅާކޮށްފަ އެވެ.
ދެ ގޯލު ފަހަތަށް ދިޔަ ކަމުގައި ވިޔަސް ރެއާލުން ހިތްވަރު ދޫކޮށްނުލައި ރަނގަޅަށް ކުޅެން ފެށި އެވެ. އެ ގޮތުން، ސޮސިއެޑާޑްގެ ގޯލުގެ ދެ މިނިޓް ފަހުން ރެއާލްގެ ޖޫޑް ބެލިންހަމް ވަނީ ގޯލެއް ޖަހައި ފަރަގު ކުޑަކޮށްފަ އެވެ. އަދި، އޭގެ ހަތަރު މިނިޓް ފަހުން އައުރެލިއަން ޗުއަމެނީ ވަނީ ގޯލު ޖަހައި ނަތީޖާ ހަމަހަމަ ކޮށްދީފަ އެވެ.
އެކަމަކު، މެޗުގެ އިތުރު ވަގުތުގައި، އަޔާޒަބާލް ވަނީ ގޯލެއް ޖަހައި އަލުން ސޮސިއެޑާޑް އަށް ލީޑު ނަގައިދީފަ އެވެ.
މެޗުގެ ފުރިހަމަ ވަގުތު ހަމަވިއިރު، އެގްރިގޭޓް ނަތީޖާ އެއްވަރުވެފައިވުމުން ނަތީޖާ ނެރުނީ އިތުރު ވަގުތުުގެ ދެ ހާފު ކުޅިގެންނެވެ. މި މެޗުގައި ރެއާލަށް އެގްރިގޭޓް އިން ކުރިހޯދައިދިން ގޯލު މެޗުގެ 115 ވަނަ މިނިޓްގައި ޖަހައިދިނީ ރުޑިގާ އެވެ. މިއީ އާދާ ގުލާގެ އެހީތެރިކަމާއެކު އޭނާ ޖެހި ގޯލެކެވެ.
މި ނަތީޖާއާއެކު މި މަހުގެ 26 ވަނަ ދުވަހުގެރޭ ފައިނަލުގައި ރެއާލާ ދެކޮޅަށް ނުކުންނާނެ ޓީމެއް އެނގޭނީ ސެމީ ފައިނަލްގެ ދެ ވަނަ މެޗުގައި ބާސެލޯނާ އާއި އެތުލެޓިކޯ މެޑްރިޑް ބައްދަލުކުރާ މެޗަށްފަހުގަ އެވެ.