މިސަރުކާރުގެ އަމާޒަކީ ފެލިވަރުގައި 100 ޓަނުގެ މަސް ޕްރޮސެސް ކުރެވޭ މުޅިން އައު ކާރުޚާނާއެއް ގާއިމުކުރުން ކަމަށް ފިޝަރީޒް މިނިސްޓްރީން ބުނެފިއެވެ.
އެ މިނިސްޓްރީން ބުނިގޮތުގައި ޅ.ފެލިވަރުގައި ހުރި މިފްކޯގެ ޕްރޮސެސިންގް ކާރުޚާނާއަކީ 1978 ގައި ޖަޕާންގެ މިޓުސުބުޝީ ކުންފުނިން ހިންގިއިރު ބިނާކޮށްފައިވާ ކާރުޚާނާއެކެވެ. މިއަދާއި ހަމައަށް އައިއިރު އިތުރު ޕައުޗު ލައިންއެއް އެޅުން ފިޔަވައި އެއްވެސް އަޕްގްރޭޑެއް ކާރުޚާނާއަކަށް ގެނެސްފައެއް ނުވެއެވެ.
މިވަގުތު ފެލިވަރުގެ މަސްކާރުޚާނާގެ ކެޕޭސިޓީއަކީ ދުވާލަކު 50 ޓަނެވެ. އެހެންމަނަވެސް އެވްރެޖްކޮށް ބޭނުން ކުރަމުންދާ ކެޕޭސިޓީއަކީ 35 ޓަނެވެ.
މިސަރުކާރުގެ އަމާޒަކީ ފެލިވަރުގައި 100 ޓަނުގެ މަސް ޕްރޮސެސް ކުރެވޭ މުޅިން އައު ކާރުޚާނާއެއް ގާއިމުކުރުމެވެ. މި މަޝްރޫއަކީ ދޮންގފަންގ އިލެކްޓްރިކް އިންޓަނޭޝަނަލުން ކޮންޓްރެކްޓަރ ފައިނޭންސިންގ ދަށުން ކުރިއަށް ގެންދާ ޕްރޮޖެކްޓެއް ކަމަށް ފިޝަރީޒް މިނިސްޓްރީން ބުނެއެވެ.
އެ މިނިސްޓްރީން ބުނިގޮތުގައި ފިޔޯރީގައި ދުވާލަކު 100 ޓަނުގެ ދަޅުގައި މަސް ބަންދުކުރާ ކާރުޚާނާއެއް އެޅުމުގެ މަސައްކަތް ދަނީ ކުރަމުނެވެ. މިކާރުޚާނާއާއި އެކު 3000 ޓަނުގެ މަސް ފިނިކޮށް ރައްކާކުރެވޭނެ ކޯލްޑް ސްޓޯރޭޖަކާއި 100 ޓަނުގެ ފިޝް މީލް ޕްލާންޓަކާއި 100 ޓަނުގެ އައިސް ޕްލާންޓެއް ގާއިމްކުރެވިގެންދާނެއެވެ. މި ކާރުޚާނާއަކީ ކޮންޓްރެކްޓަރ ފައިނޭންސްގެ ދަށުން ޗައިނާގެ ދޮންގފަންގ އިލެކްޓްރިކް އިންޓަނޭޝަނަލުން ކުރިއަށް ގެންދާ މަޝްރޫއެއް ކަމަށް އެ މިނިސްޓްރިން ބުނެއެވެ.