އައްޑޫ ބްރިޖު މަޝްރޫއުގެ ސަވޭއަށް 38 މިލިއަން ރުފިޔާ ހޭދަކޮށްފައިވާ ކަމަށާއި، ހެދި ސަވޭގެ ރިޕޯޓު ފެންނަން ނެތް ކަމަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ހޯމަ ދުވަހު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި މެންބަރު ނާޒިލް ވިދާޅުވީ ބްރިޖުގެ މަޝްރޫއު ކުރިއަށް ގެންދާ ވާހަކަ މިސަރުކާރުން އަބަދުވެސް ދައްކަމުންދާ ކަމަށެވެ. އެމަސައްކަތް ކުރުމަށް 38 މިލިއަން ރުފިޔާ ހޭދަ ކޮށްފައިވާކަމަށް ނާޒިލް ވިދާޅުވިއެވެ.
މީގެ އިތުރުން މެންބަރު ނާޒިލް ވިދާޅުވީ ހިތަދޫގައި ޒަމާނީ ފެންވަރަށް ތަރައްގީ ކޮށްފައިވާ މަގުތަކުގެ ބާކީ ނުނިމި ހުރި ބައި ވެސް މިސަރުކާރަށް އަހަރު ވެގެން ދިޔައިރު ނިންމާލެވިފައިނުވާ ކަމަށެވެ. އަދި އައު މަޝްރޫއެއްގެ ބިންގާ ވެސް އެޅިފައިނުވާ ކަމަށް ނާޒިލް ވިދާޅުވިއެވެ. މިސަރުކާރަށް އޮތީ ހަތަރު އަހަރު ކަމަށާއި، ފަހު އަހަރަކީ ކެންޕޭން އަހަރު ކަމަށް ނާޒިލް ވިދާޅުވިއެވެ. އަދި ބޮޑެތި ރަށްރަށުގައި ބޮޑެތި މަޝްރޫއުތަކަށް 3 އަހަރު ބޭނުންވާނެ ކަމަށާއި، އެއްވެސް މަޝްރޫއެއް ފެށިފައިނުވާ ކަމަށް މެންބަރު ނާޒިލް ވިދާޅުވިއެވެ.
އިތުރަށް ނާޒިލް ވިދާޅުވީ ބަޖެޓާއި ގުޅޭގޮތުން ސަރުކާރުން ދައްކަނީ ހަގީގާތާއި ހިލާފު ވާހަކަތަކެއް ކަމަށެވެ. އަދި މިއަހަރުގެ ތެރޭގައި ކުރުމަށް ބަޖެޓުގައި ހިމަނާފައިވާ އެއްވެސް ކަމެއް ކޮށްފައިނުވާ ކަމަށް ނާޒިލް ވިދާޅުވިއެވެ.