އެމެރިކާއާއި އިސްރާއީލުން އީރާނަށް ދެމުން ދާ ހަމަލާތަކާއި، އީރާނުން ރައްދުގައި ދެމުންދާ ހަމަލާތަކާ ގުޅިގެން އޮޕަރޭޝަންތައް ހުއްޓާލައިފައި އޮތް އެމިރޭޓްސްއާއި ފްލައިދުބާއީން މިއަދު ބައެއް ދަތުރުތައް ފަށައިފިއެވެ. އެމެރިކާއާއި އިސްރާއީލުން ވަނީ މިދިޔަ ހޮނިހިރު ދުވަހު އީރާނަށް ވަރުގަދަ ހަމަލާތަކެއް ދޭން ފަށައިފައެވެ. ރައްދެއްގެ ގޮތުން، އީރާނުން ވަނީ، އެ ސަރަހައްދުގައި ހުންނަ އެމެރިކާގެ އަސްކަރީ މަރުކަޒުތަކަށް ހަމަލާ ދޭން ފަށައިފައެވެ. އޭގެ ތެރޭގައި ޔޫއޭއީ، ގަތަރު، ކުވޭތު، ބަހުރެއިން އަދި ސައުދީ އަރަބިއާ ހިމެނެއެވެ. އޭގެ ސަބަބުން މެދުއިރުމަތީގެ ގައުމުތަކުގެ ވައިގެ ސަރަހައްދު ބަންދުކުރުމުން، އެމިރޭޓްސްއާއި ފްލައި ދުބާއީގެ ދަތުރުތައް ހުއްޓުމަކަށް ގެނައެވެ. ރާއްޖެއަށް އަންނަ ގިނަ ފަތުރުވެރިން ދަތުރުކުރަނީ ދުބާއީއާއި ދޯހާ މަގުން ކަމަށްވުމުން، ރާއްޖޭގައި ވެސް ގިނަ އަދަދެއްގެ ފަތުރުވެރިން ނުފުރި ތާށިވިއެވެ. https://sun.mv/218567 އެމިރޭޓްސްއިން މިއަދު އެކްސްގައި ކުރި ޕޯސްޓެއްގައި ވަނީ، ބައެއް ދަތުރުތައް ފަށަން ނިންމައިފައިވާކަން އިއުލާންކޮށްފައެވެ. އެގޮތުން އެންމެ ކުރިން ބުކިން ހައްދައިފައިވާ ކަސްޓަމަރުންނަށް އިސްކަން ދީގެން ތަރުތީބުން ކުރިއަށްދާނެ ކަމަށާއި، ދަތުރު ހަމަޖެހުމުން އެމިރޭޓްސްއިން ކަސްޓަމަރުންނަށް އަންގާނެ ކަމަށް އެ އެއާލައިނުން ބުނެފައިވެއެވެ. https://x.com/EmiratesSupport/status/2028470859187523783 އެމިރޭޓްސްއިން ވަނީ، ދަތުރު ހަމަޖެހުނުކަން އެންގުމުގެ ކުރިން އެއާޕޯޓަށް ނުދިޔުމަށް އިލްތިމާސްކޮށްފައެވެ. އަދި އެ އެއާލައިނުން ވަނީ މެދުއިރުމަތީގެ ހާލަތު ބަލަމުން އަންނާނެ ކަމަށާއި، އެގޮތުގެ މަތިން ތާވަލަށް ވެސް ބަދަލު ގެންނާނެ ކަމަށް ބުނެފައެވެ. އެމިރޭޓްސްއިން ވަނީ ކަމާ ގުޅޭ މައުލޫމާތު އެ އެއާލައިންގެ ވެބްސައިޓާއި ސޯޝަލް މީޑިއާގައި ހިއްސާކުރަމުން ދާނެ ކަމަށް ބުނެފައެވެ. ފްލައިދުބާއީން އެ އެއާލައިންގެ ވެބްސައިޓުގައި ހިއްސާކުރި މައުލޫމާތުގައި ވެސް ވަނީ މިއަދު ބައެއް ދަތުރުތައް ފަށާކަން އިއުލާންކޮށްފައެވެ. އެގޮތުން ދުބާއީ އިންޓަނޭޝަނަލް އެއާޕޯޓަށް ޖައްސާ އަދި ފުރަން ހަމަޖެހިފައިވާ ފްލައިޓުތަކެއްގެ މައުލޫމާތު ހިއްސާކޮށްފައިވެއެވެ. އޭގެ ތެރޭގައި ރަޝިއާއާއި ޕާކިސްތާނަށް ކުރާ ދަތުރުތަކެއް ހިމެނެއެވެ. ފްލައިދުބާއީން ވަނީ، އެ އެއާލައިނުން އެންމެ އިސްކަމެއް ދެނީ ފަސިންޖަރުންނާއި ކުރޫގެ ރައްކާތެރިކަމަށްކަން ފާހަގަކޮށް، އޮޕަރޭޝަންތައް އަލުން ފެށުމަށް ކަމާ ގުޅުން ހުރި އިދާރާތަކާއެކު މަސައްކަތް ކުރަމުން އަންނަ ކަމަށް ބުނެފައެވެ. ފްލައިޓްރޭޑާއިން ދައްކާ ގޮތުގައި، ހަަމަލާތައް ފެށި ފަހުން މެދުއިރުމަތިން ކޮންމެ ދުވަހަކަށް 4،000އަށް ވުރެ ގިނަ ފްލައިޓް ކެންސަލްކޮށްފައިވެއެވެ.