ނޫރު ސޫރަތުގެ 35 ވަނަ އާޔަތުގައި ﷲ ޖެއްސެވި މިސާލުގައި އޮތީ ބައްތިއަކުން އަލިކުރާ ވާހަކަ އެވެ. އެ ބައްތީގެ އަލިން އަލިކޮށްދެނީ ވަކިވަކި ފަރުދުންނެވެ. މި އާޔަތާ ޖެހިގެން ދެން އޮތް އާޔަތުން އަންގައިދެނީ ﷲގެ ގެތައް އަލިކުރާ ވާހަކަ އެވެ. މިއީ ރޫހީ ގޮތުން ޖަމާއަތުގެ އަލިކަމެވެ. މި އާޔަތުގެ މާނައިގައި ވެއެވެ. 'އެ ތަންތާނގައި، އެކަލާނގެ ނަންފުޅު ހަނދުމަކުރުމަށާއި، އެތަންތަން މަތިވެރިކޮށް އުފުލުމަށް، ﷲ އިޒުނަ ދެއްވާފައިވާ ގެތަކެއްގަ އެވެ. ހެނދުނާއި ހަވީރު، އެތަންތާނގައި އެކަލާނގެއަށް ތަސްބީހަ ކިޔައިއުޅެ އެވެ."
ބައްތީގެ މިސާލުން އެނގެނީ ތެދުމަގު ހޯދުމުގެ މުހިންމުކަމެވެ. އެއީ ރޫހީ އަލިކަން ލިބިގަތުމެވެ. ތެދުމަގާއި ރޫހީ އަލިކަން އިންސާނާއަށް ލިބެނީ އޭނާ ﷲއަށް އީމާންވުމުންނެވެ. އޭނާ ﷲއަށް އީމާންވުމާ އެކު އޭނާ އަނދިރިކަމުން މިންޖުވެ އެވެ. މި މިސާލުގައި ﷲ ފާހަގަކުރައްވަނީ ތެދުމަގު ލިބިގެން ﷲގެ ނަންފުޅު ހަނދުމަކުރާ މީހުން ނުވަތަ ޖަމާއަތްތަކާއި އެމީހުން ޒިކުރުކުރާ މިސްކިތްތަކުގެ ވާހަކަ އެވެ. އެތަންތަނާއި އެތަންތަނުގެ އަހުލުވެރިންނަށް ލިބޭ ރޫހީ އަލިކަމުން އެމީހުންނަށް ހުރި ފައިދާގެ ވާހަކަ އެވެ.
އިލްމުވެރިން އެއްބަސްވާ ގޮތުގައި މި އާޔަތުގައި އޮތް ބުޔޫތު މި ބަހުން މާނަކުރެވެނީ މިސްކިތްތަކެވެ. މި އާޔަތް ބާވައިލެއްވިއިރު ދުނިޔޭގައިވާ ނަން ހުރި އެއް ދީނަކީ ނަސާރާ ދީނެވެ. އެދީނުގެ އަހުލުވެރިން ބޮޑެތި ފައްޅިތައް ބިނާކޮށްގެން އެތަންތަނުގައި މިޝްކާތު ހެދި އެވެ. އަދި މިޝްކާތުގައި ބައްތި ދިއްލައިގެން ޝަރީކުކުރަމުން ގެންދިޔަ އެވެ. އެމީހުންގެ އެ ބިނާތަކުގައި ޖިސްމާނީ އަލިކަން ހުއްޓަސް އެތަންތަނާއި އެތަންތަނުގައި އަޅުކަންކުރަމުން ދިޔަ މީހުން ތިބީ ރޫހީ ގޮތުން އަނދިރިކަމުގަ އެވެ.
މިއަދު ދުނިޔެއަށް ބަލާއިރު، މިސްކިތެއް ނެތް ބައްރެއް ނުވަތަ ރަށެއް ދުނިޔެއަކު ނުވެ އެވެ. ﷲގެ އިޒުނަފުޅާ އެކު ބިނާކުރެވިފައިވާ މިސްކިތްތަކުގައި ނަމާދުކޮށް ޤުރްއާން ކިޔަވައި އިސްލާމް ދީން އުނގަންނައިދެވެ އެވެ. އެތަންތަން ﷲގެ ހަޒުރަތުގައި މާތްވެގެންވެ އެވެ. އަދި އެ މިސްކިތްތަކުގެ ދަރަޖަ އެކަލާނގެ ހަޒުރަތުގައި އުފުލިގެންވެ އެވެ. އެއީ ރޫހީ އަލިކަން ލިބިފައިވާ ތަންތަނެވެ. މި މިސާލުން އަންގައިދެނީ ޖަމާއަތުގެ ރޫހީ އަލިކަމެވެ.
ބުޔޫތުގެ މާނައިގައި ގެ ނުވަތަ މިސްކިތް ނޫން ތަންތަން ޝާމިލުކުރެވޭނެކަމަށް ވެސް ބައެއް އިލްމުވެރިން ދެކެ އެވެ. އެގޮތުން އެފަދަ އިލްމުވެރިން ދައްކާ ހެއްކަކީ މިސްކިތް ނޫން ގެތަކުގައި ﷲގެ ނަންފުޅު ހަނދުމަކުރެވިފައި ވާތީ އެވެ. އަދި މިހާރު ވެސް އެގޮތަށް އެކަންކުރެވޭ ގެތައް ނުވަތަ ބިނާތައް ދުނިޔޭގައި ހުރީތީ އެވެ. އެގެތަކުގައި ﷲގެ މަތިން ހަނދުމަކުރެވެނީ އެކަމަށް ﷲ އިޒުނަ ދެއްވާފައި ވާތީ އެވެ.
އިލްމުވެރިއަކު ބުނިގޮތުގައި އޭނާ ޓައިވާނަށް ކުރި ދަތުރެއްގައި އަރަބި ބަހުން ވާހަކަދައްކާ ބަޔަކާ ބައްދަލުވި އެވެ. އެމީހުން އަރަބި ކިޔެވީ ކޮން ތާކުންތޯ ސުވާލުކުރުމުން ލިބުނު ޖަވާބަކީ ޓައިވާން އެވެ. ޓައިވާނުގައި މީގެ 500 އަހަރު ކުރިން މުސްލިމުން ބިނާކުރި ސްކޫލެއްގައި އިސްލާމް ދީނާއި އަރަބި ބަސް ކިޔަވައިދެވެ އެވެ. އަދި އެތަނުގައި ﷲގެ ނަންފުޅު ހަނދުމަކުރެވެ އެވެ. އެއީ އެތަންތަނުގައި މީހުން ނަމާދުކޮށް ޤުރްއާން ކިޔަވައި ޒިކުރުކުރާތީ އެވެ.
މިދެންނެވި ފަދަ ގެތަކަކީ ﷲގެ ހަޒުރަތުގައި މަތިވެރިވެގެންވާ އަދި އެތަންތަނުގެ ދަރަޖަ އުފުލިގެންވާ ތަންތަނެވެ. ރޫހީ އަލިކަމުގައި ކުރިއަށް ދާން އެދޭ މީހުން ކަންތައްކުރަންވާ ގޮތް މި މިސާލުން އެނގެ އެވެ.
ރޫހީ އަލިކަމުން ތިމާ އަލިކުރަން އެދޭ މީހުން އަޅުކަންކުރަން ޖެހޭ ތަނަކީ މިސްކިތެވެ. އެތަނުގައި ނަމާދުކޮށް ޒިކުރުކުރުމުން ﷲ ތިމާމެން މާތްކުރައްވަ އެވެ. އަދި މިސްކިތުގައި ޒިކުރުކޮށް ތަސްބީހަ ކިޔާ މީހުންގެ ދަރަޖަ އާއި މަގާމް ﷲ މަތިވެރިކުރައްވަ އެވެ. އެހެންކަމުން މަތިވެރިކަމާއި މާތްކަން ހޯދަން މީހުން ކުރަން ޖެހޭ އެއް ކަމަކީ މިސްކިތް ޚިޔާރުކުރުމެވެ.
މި މިސާލުން ލިބޭ އެއް ފިލާވަޅަކީ މިސްކިތް ބިނާކުރުމުގެ މުހިންމުކަމެވެ. ފުރަތަމައިނުން މިސްކިތް ބިނާކުރެވެނީ ﷲގެ އިޒުނަފުޅާ އެކު އެވެ. މިއިން އެނގެނީ މިސްކިތެއް ބިނާކުރުން ފަދަ ބޮޑު ހެޔޮ އަމަލެއް ކޮންމެ މީހަކަށް ނުކުރެވޭނެކަމެވެ. ﷲގެ އިރާދަފުޅާއި ވާގިފުޅާ އެކު އެ ފުރުސަތު ލިބޭ މީހަކީ ޝައްކެއް ނެތް ގޮތުގައި އެމީހާގެ މަތިވެރިކަމާއި ދަރަޖަ ބޮޑުވާނެ މީހެކެވެ.