އިޒްރާއީލާއި ހަމާސްއާ ދެމެދު ގައިދީން ދޫކުރުމުގެ މަޝްވަރާތައް ކުރިއަށް ދާ ދަނޑިވަޅެއްގައި، އިޒްރާއީލުގެ ސިފައިން ޣައްޒާއިން އަނބުރާ ގެންދިއުމުގެ ޕްލޭނެއް ފާސްކޮށްފި ކަމަށް އިޒްރާއީލްގެ ނޫހަކުން ބުނެފިއެވެ.
ހާރެޓްޒް ނޫހުން ރިޕޯޓްކުރި ގޮތުގައި، ގައިދީން ދޫކުރުމުގެ މަޝްވަރާތަކުގައި ކުރިއެރުން ލިބެމުންދާތީ، ޣައްޒާއިން އަވަހަށް ސިފައިން އަނބުރާ ގެންދިއުމުގެ ޕްލޭންތަކަކަށް ސިފައިންގެ ފަރާތުން ވަނީ ހުއްދަ ދީފައެވެ. މީގެ ތެރޭގައި ޣައްޒާ ދެބަޔަކަށް ބައިކުރާ ނެޓްޒަރިމް ކޮރިޑޯ މެދުވެރިކޮށް ސިފައިން އަނބުރާ ގެންދިއުން ހިމެނެއެވެ.
ޣައްޒާގެ ސަރަޙައްދުގައި ފުޅާ ދާއިރާއެއްގައި އިޒްރާއީލްގެ އިންފްރާސްޓްރަކްޗަރ އަދި ސިފައިންގެ މަރުކަޒުތައް ޤާއިމްކޮށްފައި ވީނަމަވެސް، ސިފައިން އަނބުރާ ގެންދެވޭނެ ކަމަށް ސިފައިންގެ ފަރާތުން ބުނެފައިވެއެވެ. އަދި ސަރުކާރާއި ފަލަސްތީނުގެ ހަމާސް ޖަމާޢަތާ ދެމެދު ވެވޭ އެއްބަސްވުމަކާ އެއްގޮތަށް، އަވަހަށް ސިފައިން އަނބުރާ ގެންދިއުމުގެ ޤާބިލުކަން ލިބިފައިވާ ކަމަށްވެސް އެފަރާތުން ބުނެފައިވެއެވެ.
އިޒްރާއީލު ސަރުކާރުން ހާމަކުރި ގޮތުގައި، މަޝްވަރާތައް ކުރިއަށް ގެންދިއުމަށްޓަކައި މޮސާޑްގެ އިސްވެރިޔާ ޑޭވިޑް ބަރނާއާއި ޝިން ބެޓްގެ އިސްވެރިޔާ ރޯނެން ބާރުގެ އިސްނެންގުމުގެ ދަށުން ވަފުދެއް ޤަޠަރަށް ދަތުރުކުރާނެއެވެ. މި އިޢުލާނު ކުރުމުގެ ކުރިން ބޮޑުވަޒީރު ބެންޖަމިން ނެތަންޔާހޫ ވަނީ އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ މެދުއިރުމަތީގެ ޚާއްޞަ މަންދޫބު ސްޓީވް ވިޓްކޮފްއާ ބައްދަލުކޮށްފައެވެ.
އިޒްރާއީލްގެ އެހެން ނޫހެއްކަމުގައިވާ ޔެދިއޯތް އަހްރޯނޯތް ނޫހުން މައުލޫމާތު ދޭ ގޮތުގައި، އިޒްރާއީލާއި ހަމާސްއާ ދެމެދު ގައިދީން ދޫކުރުމުގެ އެއްބަސްވުމުގެ 90 އިންސައްތަ މިހާރު ވަނީ ނިމިފައެވެ. މި އެއްބަސްވުމުގެ ދަށުން، ސިފައިން އަނބުރާ ގެންދިއުމާއެކު، ދެފަރާތުގެ ގައިދީން ދޫކުރެވޭނެ ކަމަށް ބެލެވެއެވެ.
މިދިޔަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ޣައްޒާއަށް އިޒްރާއީލުން ދެމުންދާ ހަމަލާތަކުގައި މިހާތަނަށް 46،500 އަށްވުރެ ގިނަމީހުން ވަނީ ޝަހީދުވެފައެވެ. ޝަހީދުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ.
މި ހަނގުރާމައިގެ ސަބަބުން ޣައްޒާގެ އާބާދީގެ ބޮޑު ބައެއް ވަނީ ހިޖުރަކުރަން މަޖުބޫރުވެފައެވެ. އދ. އިން ފާހަގަކުރާ ގޮތުގައި ޣައްޒާގެ ކުޑަކުދިންގެ ތެރެއިން ގިނަ އަދަދެއްގެ ކުދިންނަށް މިވަގުތު ރަނގަޅު ކާނާއެއް ނުލިބި، ބަނޑުހައި ހޫނުކަމާ ކުރިމަތިލާން ޖެހިފައިވެއެވެ. ހިއުމެނިޓޭރިއަން އެހީގެ ޖަމްޢިއްޔާތަކުން ބުނާގޮތުގައި، ސަރަޙައްދަށް ވަންނަ އެހީގެ މިންވަރު މަދުކަމުން، ކުޑަކުދިންގެ ތެރެއިން ގިނަ އަދަދެއްގެ ކުދިން ތިބީ ނުރައްކާތެރި ހާލަތެއްގައެވެ.