އިސްރާއީލުން ޣައްޒާއަށް ދެމުންދާ ހަމަލާތައް އިތުރަށް ގަދަވެ، ރޭ އެކަނިވެސް 77 ފަލަސްޠީނު ރައްޔިތުން ޝަހީދުކޮށްލައިފިއެވެ.
މީގެ އިތުރުން، ޖަބާލިޔާ ރެފިއުޖީ ކޭމްޕްގައި ހުރި އދ.ގެ އަންރުވާ މެޑިކަލް ފެސިލިޓީއަކަށް އިސްރާއީލުން ދިން މިސައިލް ހަމަލާއެއްގައި މަދުވެގެން 22 މީހުން ޝަހީދުކޮށްލާފައުވާއިރު އޭގެ ތެރޭގައި އަންހެނުންނާއި ކުޑަކުދިން ހިމެނެއެވެ.
އިސްރާއީލްގެ ބޮޑުވަޒީރު ބެންޖަމިން ނެތަންޔާހޫ ވަނީ އިސްރާއީލްގެ ނިރުބަވެރި ސިފައިން ޣައްޒާ ސަރަޙައްދު ބައިބައިކުރުމަށް އެތަނުގެ ސަރަޙައްދުތައް ހިފަމުންދާ ކަމަށް ބުނެފައެވެ. އެކަމަށްޓަކައި ރޭގެ ވަގުތެއްގައިވެސް ޣައްޒާއަށް ދެ ރޮކެޓް ހަމަލާ ދީފައިވާ ކަމަށް ރިޕޯޓްތައް ބުނެއެވެ.
Advertisement
މީގެ އިތުރުން، އިސްރާއީލްގެ ސިފައިން ސީރިއާގެ ދިމިޝްޤު އަދި ހޮމްސް ސަރަޙައްދުތަކަށްވެސް އަލުން ހަމަލާދީފައިވާ ކަމަށް އިސްރާއީލްގެ ސިފައިން ވަނީ ކަށަވަރުކޮށްދީފައެވެ.
23 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ހައްދު ފަހަނައަޅާފައިވާ އިސްރާއީލުން ހިންގަމުންދާ ޤަތުލު ޢާއްމުގައި މަދުވެގެން 50،423 ފަލަސްޠީނުގެ ރައްޔިތުން ޝަހީދުވެ، 114،638 މީހުން ވަނީ ޒަޚަމްވެފައެވެ. އަދި ސަރުކާރުގެ މީޑިއާ އޮފީހުން މަރުވި މީހުންގެ އަދަދު 61،700 އަށް އަޕްޑޭޓްކޮށް، ވެއްޔާއި ސިމެންތި ތެރޭގައި ގެއްލިފައިވާ އެތައް ހާސް މީހުން ޝަހީދުވެފައިވާ ކަމަށް ލަފާކުރެވޭ ކަމަށް ބުނެފައިވެއެވެ.