މެލޭޝިއާ އެއާލައިންސްގެ ގެއްލިފައިވާ ފްލައިޓް އެމްއެޗް 370 ވެއްޓިފައިވާ ކަމަށް ބެލެވޭ ތަނުގެ ތިން ބައިކުޅަ ދެ ބައި ބެލިއްޖެ ކަމަށާއި މިހާތަނަށް އެއްވެސް ނިޝާނެއް ނުވާ ކަމަށް އޮސްޓްރޭލިއާ އިން މިއަދު ބުނެފި އެވެ.
މިދިޔަ މަހުގެ އަށް ވަނަ ދުވަހު މެލޭޝިއާގެ ކުއާލަ ލަމްޕޫރުން ޗައިނާގެ ބެއިޖިން އަށް 239 މީހުންނާ އެކު ދަތުރުކުރަނިކޮށް ގެއްލުނު ފްލައިޓް ހޯދުމުގެ މަސައްކަތުގައި ބޭނުންކުރާ އޮޓޮނޮމަސް އަންޑަވޯޓާ ވެހިކަލް (ޔޫއޭވީ) ބްލޫފިން-21 ނުވަ ފަހަރެއްގެމަތިން މިހާރު ވަނީ ފީނައިފަ އެވެ.
ފްލައިޓް ހޯދުމުގެ މަސައްކަތް ކުރާ ޖޮއިންޓް އޭޖެންސީ ކޯޑިނޭޝަން ސެންޓަރު (ޖޭއޭސީސީ) އިން ބުނީ ބްލޫފިން-21 އިން ކުރި މަސައްކަތުގައި، މިހާތަނަށް އެއްކުރި މައުލޫމާތުން ހާއްސަ އެއްވެސް ކަމެއް ފާހަގަކުރެވިފައި ނެތް ކަމަށެވެ.
ބްލޫފިން-21 ބޭނުންކޮށްގެން މިހާރު ބަލަމުން ދަނީ އޮސްޓްރޭލިއާގެ ހުޅަނގު ސަރަހައްދުގެ ކަނޑެވެ. އެއީ ފްލައިޓްތަކުގެ ބްލެކް ބޮކްސް އިން ލިބޭ ކަހަލަ ސިގްނަލްތަކެއް ލިބުނު ހިސާބެކެވެ. ޖޭއޭސީސީން ބުނީ ބްލޫފިން-21 ބޭނުންކޮށްގެން ހޯދަމުން ދަނީ 10 ކިލޯމީޓަރުގެ ރޭޑިއަސްގެ ސަރަހައްދެއް ކަމަށެވެ.
މެލޭޝިއާ އިން ބުނެފައި ވަނީ ފްލައިޓް ހޯދުމުގައި މިހާރު ހިނގަމުން ދަނީ ވަރަށް މުހިންމު މަރުހަލާއެއް ކަމަށާއި ދެ ދުވަހެއްގެ ތެރޭގައި ނިޝާނެއް ނުވެއްޖެ ނަމަ، މިހާރު ހޯދާ ސަރަހައްދު ބަދަލުކުރުމާ މެދު ވިސްނަން ޖެހޭނެ ކަމަށެވެ. --އޭއެފްޕީ