ސިޔާސީ ޕާޓީން ވަކިކުރުމުން އެ ޕާޓީއެއްގެ ސްލޮޓެއްގައި ރައްޔިތުންގެ މަޖިލީހުގެ މެންބަރުކަން ކުރަމުންދާ މެންބަރުގެ ގޮނޑި ގެއްލޭގޮތަށް ފާސްކުރި އިސްލާހު ހިމެނޭހެން، ގާނޫނުއަސާސީ އަށް މިފަހުން ގެނައި އިސްލާހުތައް ބާތިލްކުރުމަށް އެދި ސުޕްރީމް ކޯޓަށް ހުށަހެޅި މައްސަލައަށް އެމްޑީޕީ އިން ތަދައްހުލު ވާން ނިންމައިފިއެވެ.
ސުޕްރީމް ކޯޓަށް މި މައްސަލަ ހުށަހެޅުއްވީ ގާނޫނީ ވަކީލު އަދި ކެންދޫ ދާއިރާގެ ކުރީގެ މެންބަރު އަލީ ހުސައިނެވެ. މިކަމަށް މަރުހަބާ ކިޔާ އެމްޑީޕީ އިން ނެރުނު ބަޔާނެއްގައި ބުނެފައިވަނީ މެމްބަރުން ނިސްބަތްވާ ސިޔާސީ ޕާޓީ ބަދަލުކޮށްފިނަމަ މެމްބަރުކަމުގެ މަގާމު ގެއްލޭގޮތަށް ގާނޫނު އަސާސީގެ 73 ވަނަ މާއްދާ އިސްލާހުކޮށް، ފާސްކޮށް އަދި އެ މާއްދާ ތަސްދީގުކޮށްފައިވަނީ ޑިމޮކްރަސީގެ ހަމަތަކާ މީގެ ކުރިން މަޖިލީހުން ގާނޫނުތައް ފާސްކުރުމުގައި އަމަލުކުރަމުން އައިސްފައިވާ އުސޫލުތަކާ ހިލާފަށް ކަމަށެވެ.
މީގެއިތުރުން އެމްޑީޕީ އިން ބުނީ ގާނޫނުއަސާސީއަށް ސަރުކާރުން ހުށަހަޅާ މަޖިލީހުން ގެނައި ބަދަލަކީ ގާނޫނު އަސާސީގެ ބާރު ކެނޑިގެންދާގޮތަށް ގެނެސްފައިވާ ބަދަލެއް ކަމަށާއި، މި ބަދަލުގެ ސަބަބުން މަޖިލީހުގައި ރައްޔިތުން ތަމްސީލުކުރާނެ މަންދޫބަކު ހިޔާރުކުރުމަށް ރައްޔިތުންނަށް ލިބިފައި އޮތް ހައްގު ނިގުޅައިގަނެފައިވާ ކަމަށެވެ.
މި އިސްލާހު މަޖިލީހަށް ހުށަހަޅުއްވާފައިވަނީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދެވެ. ޕާޓީ ބަދަލުކޮށްފިނަމަ މެންބަރުކަން ގެއްލޭ އިސްލާހުގެ އިތުރުން، ގާނޫނުއަސާސީ އަށް ޝާހިދު ދެން ހުށަހެޅުއްވި ބައެއް އިސްލާހުތަކަކީ:
- ގައުމީ ތަރައްގީގެ ޕްލޭންތަކާއި ތަސައްވުރުތައް އެކުލަވާލުމުގެ ބާރުތައް ރައީސުލްޖުމްހޫރިއްޔާ އަށް ލިބޭ ގޮތަށް ހެދުން
- މަޖިލީހުގެ ފުރިހަމަ އަޣުލަބިއްޔަތުން ފާސްވެގެން ނޫނީ އަސްކަރީ ބޭނުމަކަށް ރާއްޖޭގައި އެއްވެސް ސަރަހައްދެއްގައި ބޭރުގެ ސިފައިންނަށް ހަރަކާތްތެރިވެވޭނެ ގޮތް ހެދުން
މި އިސްލާހުތަކާ އެކު ފާސްކުރި ބިލް ރައީސް ތަސްދީގު ކުރެއްވުމާ އެކު، މިހާރު އެ ވަނީ ގެޒެޓްގައި ޝާއިއުކޮށްފައެވެ.