ކަނޑުގެ މަގުން ރާއްޖެ އެތެރެކުރަން އުޅުނު 3 މިލިއަން ރުފިޔާގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.
ކަސްޓަމްސް އިން ބުނީ މިއަދު ބަލާފާސްކުރެވުނު ސީފްރައިޓް ޝިޕްމަންޓުގައި މަސްތުވާތަކެތިކަމަށް ޝައްކުކުރެވޭތަކެތި އަޅާފައި ހުރި ޕެކެޓުތަކެއް ކަސްޓަމްސްއިން އަތުލައިގަނެފައިވާކަމަށާއި، މި ޕެކެޓުތަކުގައި ފޮރުވާފައި ހުރި ތަކެތި ތަހުލީލުކުރިއިރު މަސްތުވާތަކެތީގެ ބާވަތެއް ކަމަށްވާ މެތަމްފެޓަމިން އަށް ޕޮޒިޓިވް ވެފައިވާކަމަށެވެ.
ކަސްޓަމްސް އިން ބުނީ ިއެ ތަކެތީގެ ބަރުދަނުގައި ޖުމްލަ 1.518 ކިލޯ ހުރިކަމަށާއި އެތަކެތީގެ މަގުމަތީ އަގު 3،000،000.00 (3 މިލިއަން) ދިވެހި ރުފިޔާއަށް އަށް ވުރެ ގިނަ ވާނެ ކަމަށް ލަފާކުރެވޭ ކަމަށެވެ.
ކަސްޓަމްސް އިން ބުނީ މި މައްސަލަ އިތުރަށް ތަހުގީގުކުރުމަށްޓަކައި އަތުލައިގަނެވުނު މަސްތުވާތަކެތި ފުލުހުންނާއި ހަވާލުކުރެވިފައިވާ ކަމަށެވެ.
ފާހަގަކޮށްލެވޭ ގޮތުގައި ރޭ ދަންވަރު މަކުނުދޫ ކައިރިން ގަވައިދާ ހިލާފަށް ރާއްޖެ އައިސް އުޅުން ސްރީ ލަންކާގެ މަސް ބޯޓަކުންވެސް ވަނީ މަސްތުވާތަކެތި އަތުލައިގެންފައެވެ. މި މައްސަލަ އާއި ގުޅިގެން ފުލުހުން ބުނީ ރޭ ދަންވަރު ސްރީލަންކާގެ މަސްބޯޓެއް ހިފަހައްޓާފައި ވާކަމަށާއި އެ ބޯޓުން 468.6 ކިލޯގެ މަސްތުވާތަކެތި ފެނިފައިވާ ކަމަށެވެ.
އެ ބޯޓުން ފެނިފައިވަނީ 344 ކިލޯގެ މެތު، 124.6 ކިލޯގެ ކޮކެއިން ކަމަށާއި އެ ތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާކަމަށް ފުލުހުން ވަނީ މައުލޫމާތު ދީފައެވެ.
ފުލުހުން މީގެ ކުރިން ހާމަކޮށްފައިވާ ތަފާސް ހިސާބު ތަކުން ހާމަވާ ގޮތުގައި މި އަހަރުގެ 1 ޖެނުއަރީން އޮގަސްޓު މަހުގެ 31 ވަނަ ދުވަހުގެ ނިޔަލަށް ފުލުހުންގެ ޑްރަގް އެންފޯސްމަންޓް އިން ޖުމްލަ 282 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގަނެފައި ވެއެވެ.
އެކިއެކި އޮޕަރޭޝަންތަކުގައި 158.84 ކިލޯގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައި ވާއިރު އަތުލެވުނު މަސްތުވާތަކެއްޗާއި ބަނގުރަލުގެ އަދަދު 282،273،651.52 މިލިއަނަށް އަރާ ކަމަށް އެ ތަފާސް ހިސާބުތަކުން ހާމަވެއެވެ.