ރައީސުލްޖުމްހޫރިއްޔާ ދެއްވާ ހާއްސަ ސްކޮލާޝިޕާއި ހައި އެޗީވާސް ސްކޮލަރޝިޕްގައި ކިޔަވާ ދަރިވަރުންގެ ކޯސް ފެށުމަށްފަހު އެހެން ކޯހަކަށް ބަދަލުވާން ބޭނުންނަމަ އެ ފުރުސަތު ދިނުމަށް ނިންމައިފިއެވެ.
ހަޔާރ އެޑިއުކޭޝަން މިނިސްޓްރީން ވަނީ މަތީ ސާނަވީ އިމްތިހާނުން އެއްވަނަ ދަރަޖައިގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ހާއްސަ ސްކޮލާޝިޕާއި ހައި އެޗީވާސް ސްކޮލަރޝިޕާ ބެހޭ އައު އުޞޫލް ގެޒެޓްކޮށްފައެވެ.
ދައުލަތުގެ ނިއުސް ޕީއެސްއެމްއަށް މައުލޫމާތު ދެއްވަމުން ހަޔަރ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ.އަބްދުއްރަޙީމް ހަސަން ވިދާޅުވީ 2019 ވަނަ އަހަރު އެކުލަވާލާފައިވާ އުސޫލްގައިވާގޮތުން ފައިސާއެއްގެ އެއްވެސް މުއާމަލާތެއް ހިންގުމަށްފަހު ކޯސް ބަދަލު ނުކުރެވެއެވެ. ނަމަވެސް އެކި ސަބަބުތައް ދިމާވެގެން ކޯސް ބަދަލުކުރުމުގެ ހާލަތްތައް އައިސްފައި ހުރިކަމަށް ސްޓޭޓް މިނިސްޓަރ ވިދާޅުވިއެވެ. އެހެންކަމުން އައު އުސޫލުގައި އެކަމަށް ރިޢާޔަތްކުރުމަށްފަހު ޕްރޮގްރާމް ބަދަލުކުރެވޭނެ ގޮތްތަކެއް ކަނޑައަޅާފައިވާ ކަމަށް ސްޓޭޓް މިނިސްޓަރ ވިދާޅުވިއެވެ.
އަލަށް އެކުލަވާލާފައިވާ އުސޫލްގައިވާގޮތުން ޕްލޭސްމަންޓް ލިބުނުކަމުގެ ލިޔުން ސްކޮލަރޝިޕް ލިބޭ ދަރިވަރު މަތީ ތައުލީމާ ބެހޭ ވުޒާރާއަށް ހުށަހެޅުމަށްފަހު، ފުރިހަމަކުރަން އެދޭ ޕްރޮގުރާމު ބަދަލުކުރެވޭނީ 3 ހާލަތެއްގައެވެ. އަދި އެހާލަތައް އުސޫލްގައި ތަފްސީލްކޮށް ކިޔާދީފައިވެއެވެ.
އައު އުސޫލުގައިވާ ގޮތުން ޕްރޮގުރާމު ބަދަލުކުރަން އެދޭއިރ،ު ކުރިން ހުށަހެޅި ޕްލޭސްމަންޓް ލިބުނުކަމުގެ ލިޔުމުގައި ބަޔާންކޮށްފައިވ،ާ މަތީ ތަޢުލީމު ދޭ މުއައްސަސާއަށް އެއްވެސް ޕޭމަންޓެއް ހަދައިފައި އޮވެގެން ނުވާނެއެވެ.
މަތީ ތައުލީމު ދޭ މުއައްސަސާއަކަށް ޕޭމަންޓެއް ހަދާފައިވަނިކޮށް ޕްރޮގްރާމު ބަދަލުކުރަން ޖެހިއްޖެނަމަ
- ޕްރޮގްރާމް ބަދަލުކުރަން ހުށަހަޅަންވާނީ ކިޔަވަން ފެށި ޕުރޮގުރާމުގެ ފުރަތަމަ ސެމެސްޓަރ ނިމުމުގެ ކުރިން
- ދޫކޮށްލާ ޕްރޮގްރާމް ފުރިހަމަކުރުމަށް ދަރިވަރުގެ ނަމުގައި ކޮށްފައިވާ ޚަރަދުތަކަކ،ީ ބަދަލުވާ ޕްރޮގްރާމަށް ހިނގާ ޖުމުލަ ޚަރަދުން އުނިކުރެވޭނެ އެއްޗެއްކަމަށް އެއްބަސްވުން.
- ޕްރޮގްރާމް ބަދަލުކުރަންޖެހޭ ސަބަބު އެކަން ކުރުން މުހިންމުކަމަށް ބާރުދ،ޭ ކަމާ ގުޅުންހުރި ރަސްމީ ފަރާތްތަކުގެ ލިޔުންތައް ހުށައެޅުން
- ޕްރޮގްރާމް ބަދަލުވީނަމަވެސ،ް އެސްކޮލަރޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން
- ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން
- ދޫކޮށްލާ ޕްރޮގްރާމް ފުރިހަމަކުރުމަށް ހިނގާނެ ޚަރަދަށްވުރެ ޖުމުލަ ޚަރަދު ބޮޑުނުވާނެ ޕްރޮގްރާމަކަށް ބަދަލުވާން އެދުން
ފުރަތަމަ ޑިގްރީއާ ނުލައި ސީދާ އެންޓްރީ ލިބޭ 4 އަހަރަށްވުރެ ދިގުނޫން މާސްޓާސް ޑިގްރީ ޕްރޮގްރާމެއްނަމަ
- މިއުސޫލަށް ޢަމަލުކުރަން ފެށިއިރު ކިޔަވަމުންދާ ދަރިވަރެއް ކަމުގައިވުން
- ޕްރޮގްރާމް ބަދަލުކުރާ ފުރަތަމަ ފަހަރު ކަމުގައިވުން
- ޕްރޮގްރާމް ބަދަލުވީނަމަވެސ،ް އެސްކޮލަރޝިޕްގެ އުސޫލުގެ އެހެން އެއްވެސް މާއްދާއަކާ ތައާރުޒުވުމެއް ނެތުން
މަތީ ސާނަވީ އިމްތިހާނުން އެއްވަނަ ދަރަޖައިގައި ފާސްވާ ދަރިވަރުންނަށް ރައީސުލްޖުމްހޫރިއްޔާ ދެއްވާ ހާއްސަ ސްކޮލާޝިޕަކީ ދިވެހި އިސްލާމް ހިމެނޭގޮތަށް ފަސް މާއްދާއިން އޭ ސްޓަރ ލިބޭ ދަރިވަރުންނަށް ދޭ ސްކޮލާޝިޕެކެވެ.
ހައި އެޗީވާސް ސްކޮލަރޝިޕަކީ ދިވެހި އިސްލާމް މާއްދާ ހިމެނޭގޮތަށް ފަސް މާއްދާއިން "އޭ" އަށް ވުރެ ދަށް ނޫން ފާހެއް ލިބިފައި އޮންނަ ދަރިވަރުންނަށް ދޭ ސްކޮލަރޝިޕެކެވެ. މި ދެ ސްކޮލާޝިޕްގެ ތެރެއިން ރައީސުލްޖުމްހޫރިއްޔާގެ ސްކޮލާޝިޕް ލިބޭ ދަރިވަރުންނަށް ބޭނުން ގައުމަކުން ބޭނުން ޔުނިވާސިޓީއަކުން ކިޔެވުމުގެ ފުރުސަތު ލިބެއެވެ.
ހައި އެޗީވާސް ސްކޮލާޝިޕްގައި މި ސަރަހައްދުގެ ގައުމުތަކާއި މެލޭޝިޔާއާއި ޗައިނާއާއި ފިލިޕީންސްގެ އިތުރުން އޯއައިސީޑީގެ ޤައުމުތަކަށް ކިޔަވަން ދިޔުމުގެ ފުރުޞަތު ލިބޭނެއެވެ. އަދި މި ސްކޮލަރޝިޕުގައި ކިޔަވަންދެވޭނީ ރާއްޖެއަށް ބޭނުންވާ ދާއިރާތަކަށެވެ.