މިއަހަރު ބާއްވާ ރިޔާސީ އިންތިހާބުގައި ފާރިސް މައުމޫނަށް ތާއިދުކުރައްވަނީ ދަރިކަލަކަށްވާތީ ނޫން ކަމަށާއި އެއީ ގާބިލް ބޭފުޅަކަށްވުމުން ކަމަށް މޯލްޑިވްސް ރީފޯމް މޫވްމެންޓް (އެމްއާރްއެމް)ގެ ޒައީމް، ކުރީގެ ރައީސް މައުމޫން އަބްދުއްގައްޔޫމް ވިދާޅުވެއްޖެއެވެ.
ފާރިސްގެ ކެމްޕޭން ޓީމުން ޓުވިޓާގައި އާންމުކުރި ވީޑިއޯއެއްގައި މައުމޫން ވިދާޅުވީ ފާރިސްއަކީ ރައީސުލްޖުމްހޫރިއްޔާގެ މަގާމު އަދާކުރެއްވުމަށް ގާބިލް ބޭފުޅެއް ކަމަށެވެ.
"ކެންޑިޑޭޓް ނަންބަރު 6، އަހުމަދު ފާރިސް މައުމޫނަށް އަޅުގަނޑު ތާއީދު ކުރަނީ، އޭނާއަކީ އަޅުގަނޑުގެ އުފަންދަރިއަކަށް ވީތީ އެއް ނޫން. އަހުމަދު ފާރިސް މައުމޫނަށް އަޅުގަނޑު ތާއީދު ކުރަނީ، އޭނާ އަޅުގަނޑު ގަބޫލު ކުރާ އުސޫލުތައް ގަބޫލު ކުރާތީ. އޭނާއަކީ، ރައީސުލްޖުމްހޫރިއްޔާގެ މަގާމުގެ ވާޖިބުތަކާއި މަސްއޫލިއްޔަތުތައް އަދާ ކުރުމުގެ ގާބިލުކަން ހުރި މީހެއް ކަމަށް ޔަގީން ކުރެވޭތީ،" މައުމޫން ވިދާޅުވިއެވެ.
މައުމޫން ވިދާޅުވީ ރައްޔިތުންގެ މަޖިލީހުގެ މެމްބަރަކަށް ފާރިސް ހުންނެވި އިރު، ގައުމަށް ފައިދާހުރި ގިނަ މަސައްކަތްތަކެއް ކޮށްދެއްވާފައިވާ ކަމަށެވެ. އަދި މެމްބަރެއްގެ މަގާމުގައި ހުންނަވައި ކުރެއްވި ސިޔާސީ މަސައްކަތެއްގެ ސަބަބުން ފާރިސް ޖަލަށްދާން ޖެހިވަޑައިގެންނެވި ކަމަށް ވެސް މައުމޫން ވިދާޅުވިއެވެ.
މެމްބަރެއްގެ ގޮތުގައި ހުންނެވިއިރު، ފާރިސްގެ ކިބައިން ފެނުނު އެ ހިތްވަރު، ރައީސުލްޖުމްހޫރިއްޔާގެ މަގާމަށް ފާރިސް އިންތިހާބުވެއްޖެ ނަމަވެސް ފެންނާނެ ކަމަށް މައުމޫން ވިދާޅުވިއެވެ. އަދި ފާރިސްއަކީ އަމިއްލަ މަސްލަހަތަށް ނުވަތަ އަމިއްލަ ފައިދާއަށް އެއްވެސް ކަމެއް ކުރައްވާނެ ބޭފުޅެއް ނޫން ކަމަށް ވެސް މައުމޫން ވިދާޅުވިއެވެ.
"ފާރިސް މައުމޫންއަކީ، އަމިއްލަ ފައިދާއަށްޓަކައި ގައުމު ވިއްކާލާނެ މީހެއް ނޫން. އޭނާއަކީ، ދޮގު ހަދައި މަކަރު ހަދައި އޯޅުވާލާނެ މީހެއް ނޫން،" މައުމޫން ވިދާޅުވިއެވެ.
އެހެންކަމުން މިއަހަރު ބާއްވާ ރިޔާސީ އިންތިހާބުގައި ފާރިސަށް ވޯޓު ދެއްވުމަށް މައުމޫން ވަނީ އެދިވަޑައިގެންފައެވެ.