އިޞްލާޙުގެ ފެށުމަކީ ތިމާކަމަށްވާތީ، އާއިލާއަކަށް، މުޖުތަމަޢަކަށް ނުވަތަ ޤައުމަކަށް އިޞްލާޙެއް، ނުވަތަ ހެޔޮ ބަދަލެއް ގެންނަން އެދޭ މީހާ، އެ ބަދަލެއްގެ ޢަމަލީ ނަމޫނާއަކަށް ވާންޖެހޭނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، 1447 ވަނަ އަހަރުގެ ރަމަޟާން މަސް ފެށުމާ ގުޅިގެން، ފޮނުއްވި ޚިތާބުގައެވެ. މި ޚިޠާބުގައި އެމަނިކުފާނު ވަނީ، ރަމަޟާންމަހުގެ ތަހުނިޔާ އާއި ހެޔޮއެދުންތައް، ދިވެހިރާއްޖޭގެ އެންމެހައި ލޮބުވެތި ރައްޔިތުންނަށާއި، މުޅި އިސްލާމީ އުންމަތަށް ފޮނުއްވާފައި ވެއެވެ.
އެމަނިކުފާނުގެ ޚިޠާބުގައި، މާތް ﷲ ރޯދަ ފަރުޟުކުރެއްވީ ތަޤުވާވެރިވުމަށާއި، ކުށްފާފަތަކަށް އަރައިގަތުމަށް ބިރުވެތިވެ، އެކަންކަމުން ދުރުހެލިވުމަށާއި، ތެދުމަގުގައި ސާބިތުވެ، ހެޔޮ ކަންކަންކުރުންމަތީ ދެމިތިބުމަށްޓަކައިކަމުގައި ވިދާޅުވެފައިވެއެވެ. އަދި މި ބަރަކާތްތެރި ހެޔޮކަމުގެ މޫސުން ބައްދަލުކުރި ހިނދު، މުޖުތަމަޢިން ދެކެން ބޭނުންވާ، ވަރަށް ގިނަ ހެޔޮ ކަންކަން އެބަހުރި ކަމަށާއި، އޭގެ ތެރޭގައި ދީނީ ކަންކަމާއި، އާދަކާދައިގެ ކަންކަން ހިމެނޭ ކަމުގައިވެސް އެމަނިކުފާން ވިދާޅުވެފައިވެއެވެ.
އެގޮތުން އެމަނިކުފާނު ވަނީ، ދިވެހި މުޖުތަމަޢަކީ، ފަސްވަގުތު ނަމާދުކުރާ، ކުޑަކުދީންގެ ކަރާމާތް ރައްކާތެރިކުރާ، ބޮޑެތި މީހުންނަށް އިޙްތިރާމުކުރާ މުޖުތަމަޢެއްކަމުގައި ވުމަށް އެދިވަޑައިގަންނަވާކަމުގައި ވިދާޅުވެފައިވެއެވެ.
އަދި، މަސްތުވާތަކެތިން ސަލާމަތްވެފައިވާ، ޞިއްޙީގޮތުން ނުރަނގަޅު އާދަތަކަށް ނޫނެކޭ ބުނާ، އަދި ހުރިހާ ކަމެއްގައި މާތްވެގެންވާ އިސްލާމްދީނުގެ އަސްލުތަކަށް ފުރިހަމައަށް ޙުރުމަތްތެރިކޮށްހިތާ، ދިވެހީންގެ ހަރުދަނާ އިސްލާމީ ސަގާފަތާއި، ދިވެހިވަންތަ، ތަހުޒީބު، އަމިއްލަ ގޮތްތައް ނަގަހައްޓާ މުޖުތަމަޢެއް ދެކިވަޑައިގަންނަވަން ބޭނުންފުޅުވާކަން ރައީސުލްޖުމްހޫރިއްޔާ ފާހަގަކުރައްވާފައިވެއެވެ.
މި ސިފަތައް ހުރި މުޖުތަމަޢެއް ބޭނުންވަނީ، ދިވެހިރާއްޖޭގެ އަމާންކަމާ، ދިވެހީންގެ ދެ ދުނިޔޭގެ ސަލާމަތަށްޓަކައިކަމަށާއި، ހެޔޮލަފާ، ޚުލްޤުހެޔޮ އަދި ޒަމާނާއެކު ކުރިއަރާފައިވާ ބަޔަކަށް ދިވެހީން ވުމަށްޓަކައިކަމަށްވެސް އެމަނިކުފާނު ވިދާޅުވެފައިވެއެވެ. އަދި އޭގެ ސަބަބުން، ދިވެހީންގެ ޤަދަރު މަތިވެރިވެގެންދާނެކަން ރައީސުލްޖުމްހޫރިއްޔާ ފާހަގަކުރައްވާފައިވެއެވެ.
ރަމަޟާން މަހަކީ، އަޚުލާޤުގެ އެންމެ މަތިވެރި ހުރިހާ ފިލާވަޅެއް އުނގަންނައިދޭ މައްސަރުކަމުގައިވާތީ، އަޅުކަންތައްތަކުން ވަގުތުތައް ރާވާލުމާއި، ޛިކުރުތަކުން ތަޤުވާވެރިވުމާއި، ހިތާއި ރޫޙާއި ހަށިގަނޑު، ހެޔޮ ކަންކަމުގައި ހޭދަކުރާން ދަސްކޮށްދިނުމަށްވެސް އެމަނިކުފާނުގެ ޚިތާބުގައި ބާރުއަޅުއްވާފައިވެއެވެ.
އެމަނިކުފާނުގެ ޚިޠާބު ނިންމަވާލައްވާފައިވަނީ، ހުރިހާ ހެޔޮ ޢަމަލުތައް، ކޮންމެ މީހަކު އަމިއްލަ ނަފުސާ ހަމައިން ފަށައި، މި ބަރަކާތްތެރި ރަމަޟާން މަހަކީ ޤައުމަށް ހެޔޮ ބަދަލެއް ގެނައުމަށްޓަކައި، އަމިއްލަ ނަފްސު އެ ބަދަލާ އެއްގޮތަށް، ދީނީ، ޤައުމީ އިންތަކުގެ މަތީގައި ތަރުބިއްޔަތުކުރާ މައްސަރަކަށް ހެދުމަށް ނަޞޭހަތްތެރިވެވަޑައިގަންނަވަމުންނެވެ.
ބަރަކާތްތެރި ރަމަޟާން މަހަށް މަރުޙަބާ ވިދާޅުވެ އެކްސްގައި ކުރެއްވި ޕޯސްޓެއްގައި އެމަނިކުފާނު ވަނީ، ރަމަޟާން މަހާ ބައްދަލުވުމުގެ ނިޢުމަތް ދެއްވީތީ މާތްﷲގެ ޙަޟްރަތަށް ޙަމްދު ކުރައްވައި، މިއީ ދިވެހި ކޮންމެ ރައްޔިތަކަށް ފާގަތި، އަދި ދިވެހި ޤައުމަށް ނަސީބާއި ނަޞްރުގެ މައްސަރެއްކަމުގައި ލެއްވުމަށް އެދި ދުޢާކުރައްވާފައެވެ.
މި މުނާސަބަތުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ކުރެއްވި ޕޯސްޓުގައިވެސް ވަނީ، މި ބަރަކާތްތެރި ރަމަޟާން މަހަކީ، އަޅުގަނޑުމެންގެ ހެޔޮ ޢަމަލުތައް ޤަބޫލުކުރައްވައި، މާތް ﷲގެ އޯގާވަންތަކަމުގައި ލަހައްޓަވާނޭ މައްސަރަކަށް ވުމަށް އެދިވަޑައިގެން ދުޢާކުރައްވާފައެވެ.