ގއ.ނިލަންދުއާއި ދާންދޫގެ ގޭގެއަށް އަންނަ ރަމަޟާން މަހު ބެހުމަށް ބޭނުންވާ ކާޑު ބަރުކޮށްގެން ދިޔަ ދޯންޏެއް ފަރަށް އަރައި ހުރިހާ މުދަލެއް ކަނޑުވެއްޖެއެވެ.
ނިލަންދޫ ކައުންސިލްގެ ރައީސް ނާސިހު އިބްރާހީމް "ދިޔަރެސް" އަށް ވިދާޅުވީ ފަރަށް އަރާފައިވަނީ ލިއޯ ޓްރޭޑިން ކުންފުނީގެ ދޯންޏެެއް ކަމަށެވެ. ރޭ ފަތިހުގެ ވަގުތެއްގައި މި ދޯނި އަރާފައިވަނީ ގއ.އަތޮޅު އެކެފަރު ފަރަށެވެ. އެ ދޯނީގައި ބަރުކޮށްގެން ގެނައި މުދަލަކީ އެ ކުންފުނީގެ ޗެއާމަން ކޮންމެ އަހަރަކުވެސް އެ ދެ ރަށުގެ ރައްޔިތުންނަށް ރޯދަ ހަދިޔާގެ ގޮތުގައި ބަހާ ކާޑުގެ ބާވަތްތައް ކަމަށް އޭނާ ވިދާޅުވިއެވެ.
ދޯނީގައި ކާޑުގެ ބާވަތްތައް ކަމުގައިވާ ހަޑޫ ހަކުރު އަދި ފުށުގެ 50 ކިލޯގެ 1،080 ބަސްތާގެ އިތުރުން ކަދުރުވެސް ހިމެނޭ ކަމުގައި އޭނާ ވިދާޅުވިއެވެ.
ނާސިހު ވިދާޅުވީ ދޯނީގައި ބަރުކޮށްގެން ގެނައި ހުރިހާ މުދަލެއްވެސް މޫދަށް ވެއްޓި ކަނޑުވެފައިވާ ކަމަށާއި އެއްވެސް މުދަލެއް ސަލާމަތް ނުކުރެވުނު ކަމަށެވެ.
އޭނާ ވިދާޅުވީ ފަރަށް އެރުމުގެ ސަބަބުން ދޯނި ފަޅައިގެން ގޮސްފައިވާ ކަމަށާއި، މިހާރު ދޯންޏަށް ދިޔަވަމުންދާ ކަމަށެވެ.