އިންޑިއާގައި އިމްތިހާނު ކަރުދާސްތަކެއް ލީކުވި މައްސަލައިގައި ޒުވާނުން ކުރަމުންދާ މުޒާހަރާތަކާ ގުޅިގެން، އެ މައްސަލައިގައި ޝާމިލުވާ ފަރާތްތަކަށް އަދަބު ދިނުމަށްޓަކައި ފާސްޓް ޓްރެކް ކޯޓުތަކެއް ގާއިމުކުރައްވާނެ ކަމަށް އެ ގައުމުގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެއެވެ. މޯދީ މިފަދައިން ވިދާޅުވެފައިވަނީ، ނޭޝަނަލް އެލިޖިބިލިޓީ ކަމް އެންޓްރެންސް ޓެސްޓް (ނީޓް) ގެ ކަރުދާސްތައް ލީކުވި މައްސަލައިގައި އެ ގައުމުގެ ތަޢުލީމާ ބެހޭ ވަޒީރު ދަރުމެންދުރަ ޕްރަދާންގެ އިސްތިއުފާއަށް ގޮވާލައި އެތައް ހާސް ޒުވާނުންނެއް ނިއު ދިއްލީގައި މުޒާހަރާކުރަމުންދާ ދަނޑިވަޅެއްގައެވެ. ރޮއިޓާސްއިން ރިޕޯޓުކޮށްފައިވާ ގޮތުގައި، މުޒާހަރާގެ ބައިވެރިންނާއި އިދިކޮޅު ޕާޓީތަކުން ވަނީ މޯދީގެ މި ހުށަހެޅުން ގަބޫލުނުކޮށް، ތަޢުލީމާ ބެހޭ ވަޒީރު ވަގުތުން އިސްތިއުފާ ދެއްވުމަށް ގޮވާލާފައެވެ. އެކްސްގައި ކުރެއްވި ޕޯސްޓެއްގައި މޯދީ ވިދާޅުވި ގޮތުގައި، ޒުވާނުންގެ މުސްތަގުބަލަށް ވުރެ މުހިންމު އެއްވެސް ކަމެއް ނެތެވެ. އަދި ކަރުދާސް ލީކުކުރުމުގައި ޝާމިލުވާ ފަރާތްތަކަށް އަވަސް އަދި ހަރުކަށި އަދަބު ދިނުމަށްޓަކައި ފާސްޓް ޓްރެކް ކޯޓުތައް ގާއިމުކުރުމަށް ނިންމަވާފައިވާ ކަމަށް އޭނާ ވިދާޅުވިއެވެ. ނަމަވެސް، މުޒާހަރާތައް އިންތިޒާމުކުރުމުގައި އިސްކޮށް ހަރަކާތްތެރިވާ ކޮކްރޯޗް ޖަނަތާ ޕާޓީ (ސީޖޭޕީ) ގެ ތަރުޖަމާނު އާޝުތޯޝް ރަންކާ ބުނި ގޮތުގައި، ކޯޓުތަކުން ކުރާ ކަންކަމަކީ މައްސަލައިގެ އެއް ފަރާތެވެ. އަދި އަސްލު މައްސަލައަކީ ކަރުދާސްތައް ލީކުވުން ކަމަށާއި، އެހެން މައްސަލަތަކަށް ވެސް ފާސްޓް ޓްރެކް ކޯޓުތައް ހަދާފައިވީ ނަމަވެސް އެކަމުން ހައްލެއް ލިބިފައިނުވާ ކަމަށް އޭނާ ބުންޏެވެ. މި މައްސަލައާ ގުޅިގެން އިންޑިއާގެ ގާނޫނުހަދާ މަޖިލީހުގެ ޖަލްސާތަކަށް ވެސް ވަނީ ހުރަސްއެޅިފައެވެ. އިދިކޮޅު ކޮންގްރެސް ޕާޓީގެ ލީޑަރު ރާހުލް ގާނދީ ވިދާޅުވި ގޮތުގައި، ޒުވާނުންގެ މުސްތަގުބަލަށް އެންމެ ބޮޑު ގެއްލުމެއް ދެއްވީ މޯދީއެވެ. މީޑިއާތަކުން ރިޕޯޓުކޮށްފައިވާ ގޮތުގައި، ބުދަ ދުވަހުގެ ރޭ ޖަންތަރު މަންތަރު ސަރަހައްދަށް 10،000 އަށް ވުރެ ގިނަ މީހުން އެއްވެފައިވާއިރު، ފުލުހުންނާއި މުޒާހަރާގެ ބައިވެރިންނާ ދެމެދު ވަނީ ހަމަނުޖެހުންތަކެއް ހިނގާފައެވެ. މި ހަމަނުޖެހުންތަކާ ގުޅިގެން ސަލާމަތީ ސަބަބުތަކަށްޓަކައި ދިއްލީ މެޓްރޯގެ 16 ސްޓޭޝަނެއް ވަނީ ބަންދުކޮށްފައެވެ.