ތަފާތު ނުކުޅެދުންތެރިކަން ހުންނަ ކުދިންނަށް ހާއްސަކޮށްގެން ދިރާގުން ބާއްވަމުން އަންނަ "ދިރާގު ސްޕެޝަލް ސްޕޯޓްސް ފެސްޓިވަލް" މިއަދު ހަވީރު ފަށައިފިއެވެ.
ހެންވޭރު ދަނޑުގައި މިއަދު ކުރިއަށް މިގެންދާ ފެސްޓިވަލަކީ ދިރާގުގެ އިޖްތިމާއީ ޒިންމާގެ ތެރެއިން ހިންގާ ވަރަށް ހާއްސަ ފެސްޓިވަލެކެވެ. މި ފެސްޓިވަލްގެ އެންމެ ބޮޑު ބޭނުމަކީ މުޖުތަމައުގައި ދިރިއުޅޭ އެއްވެސް ކުއްޖަކު ބާކީ ނުކުރުމާއި ހުރިހާ ކުދިންނަށްވެސް ފުރުސަތުތަކެއް ހޯދައިދިނުންކަމަށް ދިރާގުން ބުންޏެވެ.
މި ސްޕޯޓްސް ފެސްޓިވަލް ފެއްޓެވުމުގެ ގޮތުން ވާހަކަދައްކަވަމުން އެޑިޔުކޭޝަން މިނިސްޓަރ ޑރ. އައިޝަތު ޝިހާމް ދިރާގަކީ ރާއްޖޭގަ ހުރި ގިނަ ކުންފުނިތަކުގެ ތެރެއިން އެންމެ ހާއްސަކޮށް ހާއްސަ އެހީއަށް ބޭނުންވާ ކުދިންނަށް ގިނަ ކަންތައްތަކެއް ކޮށްދެއްވަމުން ގެންދަވާ ކުންފުންޏެއް ކަން ފާހަގަ ކުރެއްވިއެވެ. ސްކޫލްތައް މިހާރުވެސް ހާއްސަ އެހީއަށް ބޭނުންވާ ކުދިންނަށް ބޭނުންވާ ގޮތަށް ބަދަލުކުރަމުން ގެންދާ ކަމަށާއި، މިހާރުވެސް 1100 ކުދިން އެކި ސްކޫލްތަކުގައި ކިޔަވަމުންދާކަމަށް ވެސް މިނިސްޓަރ ވިދާޅުވިއެވެ. އަދި ޓީޗަރުންވެސް އެކަމަށް އަހުލުވެރިކުރުވަމުން ގެންދަވާކަމަށްވެސް މިނިސްޓަރ ފާހަގަކުރެއްވިއެވެ.
ދިރާގް ސްޕޯޓްސް ފެސްޓިވަލް ވިދިވިދިގެން ބޭއްވޭތާ މިއީ ފަސްވަނަ އަހަރުކަން ފާހަގޮށް ދިރާގުގެ ޕަބްލިކް ރިލޭޝަން މެނޭޖަރ އިމްޖާދު ޖަލީލު ވިދާޅުވީ މިއީ ވަރަށް ހާއްސަ ދުވަހެއްކަމަށާއި އެހެން އަހަރުތަކާއި ހިލާފަށް މިއަހަރު ގިނަ އަދަދެއްގެ ދަރިވަރުން މި ސްޕޯޓްސް ފެސްޓިވަލްގައި ބައިވެރިވެފައިވާކަމަށެވެ.
މީގެ އިތުރުން އިމްޖާދު ވިދާޅުވީ މިއަހަރު ކޮމްޕެޓޭޓިވް ސްޕޯޓްސްވެސް ތައާރަފްކުރުމުން ކުދިންގެ އަމިއްލަ ނަފްސަށް ކުރެވޭ އިތުބާރާއި، އަދި އެހެން ކުދިންނެކޭ އެއްގޮތަށް ނުކުޅެދޭ ކުދިންނަށްވެސް މިފަދަ ސްޕޯޓްސްތަކުގައި ބައިވެރިވޭކަން ކުދިންނަށްވެސް އެގިގެންދާނެކަމަށް އިމްޖާދު ވިދާޅުވިއެވެ.
"މައިކަލް ފެލެޕްސްއަކީ އަނެއްހެން ބުނާނަމަ އޯޓިސްޓިކް މީހެއް. އެހެންނަމަވެސް އޯޓިޒަމް މީހެއް ކަމުގައިވިޔެއް ކަމަކު އޮލިޕްމިކްސްގައި ގިނަ މެޑަލް ހޯދި މީހެއް އެއީ". އިމްޖާދު ވިދާޅުވިއެވެ.
އިމްޖާދު ވިދާޅުވީ ނުކުޅެދުންތެރިކަން ހުރި ކުއްޖެކޭ ކިޔާ ޖިސްމާނީ ގޮތުން އެކަމަށް ކުޅެދޭ ކުއްޖެއް ނަމަ ވާދަވެރި ކުޅިވަރުތަކުގައި އެފަދަ ކުއްޖަކަށް ބައިވެރިނުވެވޭނެ އެއްވެސް ސަބަބެއް ނެތްކަމަށެވެ. އަދި މިފަދަ ކުޅިވަރުތަކުގައިވެސް އެފަދަ ކުދިންނަށްވެސް ބައިވެރިވެވޭނެކަމަށާއި މިއަދުގެ މި ފެސްޓިވަލްގައި އެތްލެޓިކްސް އެސޯސިއޭޝަންގެ ފަރާތުންވެސް އޮފިޝަލުން އައިސް އެކުދިންގެ ޓައިމިންގ ނަގާނެކަމަށެވެ.
މިއަހަރުގެ ފެސްޓިވަލްގައި ވެސް ޖަމިއްޔަތަކުންނާއި ބައެއް ސްކޫލްތަކުން، 200 އަށް ވުރެ ގިނަ ކުދިން ބައިވެރިވިކަމަށް ދިރާގުން މައުލޫމާތުދެއެވެ.
މިއީ ރާއްޖޭގައި ތަފާތު ނުކުޅެދުންތެރިކަން ހުންނަ ކުދިންނަށް ހާއްސަ ކޮށްގެން މިހާ ބޮޑު ކޮށް ބޭއްވޭ ހަމަ އެކަނި މި ފަދަ ކުޅިވަރުގެ ހަރަކާތެވެ.