ދުޢާކުރުމުން (މިހާރު، މިޒަމާނުގައިވެސް) ވަޤުތުން ޢިޖާބަކުރައްވަވާކަން ޤަބޫލުކުރަން އުނދަގޫވާ މީހުންނަށް މިކިޔައިދެނީ ދާދި ފަހުން މީހަކަށް ކުރިމަތިވި ކަމެކެވެ. 
ޢިމާރާތެއްގެ 15 ވަނަ ފަންގިފިލާގައި އަލިފާން ރޯވެ އަނދަނީއެވެ. 3 މީހަކު ތިބީ ތާށިވެފައެވެ. ސަލާމަތްވެވޭނެ ހަމައެކަނި ގޮތަކަށް އޮތީ ބޭރަށް ފުންމައިލުމެވެ. 3 މީހުންނަކީވެސް ޢަރަބިންނެވެ. 2 ފިރިހެނުންނާއި އަންހެނެކެވެ. 3 މީހުންވެސް ލައިގެން ތިބީ އެއް ޒާތެއްގެ ދިގު ހެދުމެވެ. 
ފުންމާލުމުން 3 މީހުންވެސް ސަލާމަތްކުރެވޭތޯ ބިންމަތީގައި ތިބި މީހުން މަސައްކަތްކުރިއެވެ. ނަމަވެސް ދެފިރިހެނުން ވެއްޓުނު ގޮތަށް މަރުވީއެވެ. އަންހެން މީހާ ފުންމާލުމުން ތިރިވީ އަރިއަޅަމުންވެސް ކޮޅަށް ހުރެއެވެ. އޭނާ ބިމުގައި ނުޖެހެނީސް ހިފެހެއްޓޭތޯ ކުރި މަސައްކަތް ކާމިޔާބުވިއެވެ. ވަރަށް އާދައާ ޚިލާފް ގޮތަކަށެވެ. އޭނާ ހިފަހައްޓަން މަސައްކަތްކުރި މީހެއްގެ ބޮލަށް ހެދުން މެހި ވެއްޓިޖެހުނު ޕްރެޝަރު ކުޑަވެގެން ދިއައީއެވެ. 
އޭނާ ސަލާމަތްވުމުން ދިން އިންޓަރވިޔޫއެއްގައި ބުނީ އޭނާ ފުންމައިލީ ވަރަށް ޘާބިތުކަމާއިއެކުގައި ކަމަށެވެ. އަދި ޘާބިތުކަން ލިބިގަތީ އިބްރާހީމްގެފާނު އަލިފާންގަނޑަށް އެއްލައިލި ވަޤުތު ކުރެއްވެވި ދުޢާއިން ކަމަށެވެ. ) حَسْبُنَا اللَّهُ وَنِعْمَ الْوَكِيلُ) 
މިކަމުންވެސް އެނގެނީ ހަމަ މިހާރުވެސް އަޅުތަކުން ކުރާ ހަމަ ވަޤުތުންވެސް ޢިޖާބަކުރައްވަވާ ކަމެވެ. އެކަމަށް ޝައްކުކޮށްގެން ނުވާނެ ކަމެވެ. 
މިއީ ޢިބްރަތްތެރި ވާހަކަތައް ގެނެސްދޭ ޗެނެލަކުން އަހުރެންނަށް އަޑުއިވިފައިވާ ވަރަށް ޢިބްރަތްތެރި ވާހަކައެކެވެ. މިފަދަ ކަންކަމަކަށް އަހުރެން ޝައްކެއް ނުކުރަމެވެ.
- އިސްލާމީ ތިލަފަތުގެ ދަރުސަކުން 
ތިރީގައިވާ ލިޔުންވެސް ވިދާޅުވެލައްވާށެވެ! 
"އެކިއެކި ކަންކަން ދިމާވެގެން ބައްދަލުކުރާ އަދި ފޯނުންވެސް ގުޅާ ބައެއް މީހުންގެ ގާތުގައި ދުޢާކުރަން ބުނީމާ އެމީހުންނަށް ހީވަނީ އެއީ އެކަމަކަށް އަހުރެން ސަމާލުކަން ނުދިނީ ކަމަށެވެ. ދުޢާއަކީ މުސްލިމުންގެ އެންމެ ބާރުގަދަ ހަތިޔާރުކަން އެމީހުންނަށް ޤަބޫލެއް ނުކުރެވެއެވެ. ދުޢާކުރުމުން އައްސަވައިވޮޑިގެންވާކަމާއި ޢިޖާބަކުރައްވަވާނެކަން ޔަޤިންކުރަންވެސް އުނދަގޫވަނީއެވެ." 
މިއީ ޝައިޚަކު ވަރަށް ދެރަވެ ހުންނަވައިގެން ވިދާޅުވި ބަސްފުޅެކެވެ. މިބަސްފުޅުގެ އަޑު އިވުމުން ބޭނުންވީ މީގެ 3 އަހަރުކުރިން ހަމަ އެންމެންގެ ލޯމަތީގައި ހިނގައި ގޮސްފައިވާ ކަމެއްގެ ހަނދާން އައުކޮށްލާށެވެ. ޝައިޚް އެވިދާޅުވާ ވިސްނުމުގެ މީހުންނަށް ޢިބްރަތަކަށްވެދާނެކަމުގެ އުންމީދުގައެވެ. 
2019 ވަނަ އަރުގެ އެޕްރިލްމަހުގެ 15 ވަނަ ދުވަހު އެންމެންގެ ލޯތަކަށް މާތް ﷲ ދެއްކެވި ކަމެއްގެ ހަނދާން އަުކޮށްލަމާތޯއެވެ!  އެދުވަހު ކުރި އިސްތިސްޤާ ނަމާދަށްފަހު ކުރިދުޢާ 7 އުޑުމަތިން އަޑުއައްސަވައިވޮޑިގެންނެވި ކަމުގެ ހެކި ދެއްކެވީ ވަޤުތުންނެވެ.  ހަމަ އެވަގުތު ވެއްސެވި ހިމަފޮދު ވާރެއިންނެވެ. 
އެދުވަހު ލިޔުނު ޚަބަރުތަކުން: 
ޝައިޚް ޢަލީ ޒައިދު ވިދާޅުވީ ޝައިޚުގެ ގައިކޮޅުގައިވެސް ރަޙްމަތުގެ ވާރޭ ޖެހުނު ކަމަށެވެ. އަދި ބައެއް ރަށްރަށަށް ވާރޭ ވެހުނު ކަމުގެ މައުލޫމާތުވެސް ލިބިވަޑައިގެންފައިވާ ކަމަށެވެ. 
ޚުޠުބާގައި ކިޔާފައިވާ ފަދައިން މަސައްކަތް ކުރަންވީ އަމަލުތައް އިޞްލާޙް ކުރުމަށެވެ. ތަޤްވާވެރިކަން އިތުރުމަށެވެ. ކުރެވޭ ފާތަކުން ތައުބާވުމަށެވެ. އެފަދަ ފާފައެއް ދެން ނުކުރުމަށް އަޒުމް ކަނޑައެޅުމަށެވެ. ކީރިތި ޤްރްއާނުގައި ވަނީ "ރަށްތަކުގެ އަހުލުވެރިން، އީމާންވެ، ތަޤްވާވެރިވީނަމަ، ހަމަކަށަވަރުން، އުޑުންމާއި، ބިމުން، ތިމަންރަސްކަލާނގެ އެއުރެންގެ މައްޗަށް ބަރަކާތުގެ މަގުތައް ހުޅުއްވަވައިދެއްވެވީމުހެވެ." 
ދެވަނަ ޚަބަރު: 
އިސްތިސްޤާ ނަމާދުކޮށް ދުޢާކުރަމުން ދަނިކޮށް މާލެއަށް ވާރޭ ފޮދެއް ވެހިއްޖެ 
އިސްތިސްޤާ ނަމާދުކޮށް ދުޢާކުރަމުން ދަނިކޮށް މާލެއަށް ވާރޭ ފޮދެއް ވެހިއްޖެ އެވެ. 
މީޓިއޮރޮލޮޖީން ވަނީ މެންދުރު 12.54 ހައި އިރު މާލެއަށް ވާރޭ ފޮދެއް ވެހުނުކަން ކަށަވަރުކޮށްދީފައެވެ. މީޓިއޮރޮލޮޖީން ބުނީ އެއީ އެ އެވަގުތު މާލެ މަތީގައި ހަދާލި ކުޑަ ވިލާކޮޅަކުން ވެހުނު ކެރިފޮދެއް ކަމަށެވެ. 
މިއަދު މާލޭގައި ކުރި އިސްތިސްޤާ ނަމާދު އިމާމުވެ ކޮށްދެއްވީ ޑރ. މުޙައްމަދު އިޔާޟް ޢަބްދުއްލަޠީފްއެވެ. 
ހަމަ އެވަގުތު މާލޭގެ އިތުރުން ބައެއް ރަށް ރަށަށް ވެސް ވާރޭ ވެހުނެވެ. އެއިގ ތެރެއިން އެއްރަށަކީ ޅ. ނައިފަރެވެ. 
މިޚަބަރުތަކުގެ ހަނދާން ވަރަށް ގިނަ ބައަކު އަދިވެސް ހުންނާނެއެވެ. 
އެދުވަހުގެ ޚުޠުބާގައި ކިޔާފައިވެއެވެ. "މަސައްކަތް ކުރަންވީ އަމަލުތައް އިޞްލާޙް ކުރުމަށެވެ. ތަޤްވާވެރިކަން އިތުރުމަށެވެ. ކުރެވޭ ފާފަތަކުން ތައުބާވުމަށެވެ. އެފަދަ ފާފައެއް ދެން ނުކުރުމަށް އަޒުމް ކަނޑައެޅުމަށެވެ. ކީރިތި ޤްރްއާނުގައި ވަނީ "ރަށްތަކުގެ އަހުލުވެރިން، އީމާންވެ، ތަޤްވާވެރިވީނަމަ، ހަމަކަށަވަރުން، އުޑުންމާއި، ބިމުން، ތިމަންރަސްކަލާނގެ އެއުރެންގެ މައްޗަށް ބަރަކާތުގެ މަގުތައް ހުޅުއްވަވައިދެއްވެވީމުހެވެ." 
މިފަދަ ހަނދާންތައް އައުނުކުރެވޭނަމަ ޝައްކުތައް އުފެދި އިތުރުވާނެއެވެ. ދުޢާކުރަން ފެށުމުން ޙައްލު ލިބޭކަން ބަޔާންކޮށް މިއަދުނޫހުގެ ބައެއް ކިޔުންތެރިން މަޢުލޫމާތު ޙިއްޞާކުރެއެވެ. އެފަދަ ވާހަކައެއްގެ ބަދަލުގައި ޙިއްޞާމިކުރީ އެންމެންގެ ލޯމަތީގައި ހިނގައިދިއަކަމެއްގެ ވާހަކައެވެ.