މިއަހަރު 18 އަހަރު ފުރޭ ކުދިންގެ މައުލޫމާތު ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) އިން ހޯދައި ހޯމް މިނިސްޓަރު އަލީ އިހުސާންގެ ބެލުމުގެ ދަށުން އެ ކުދިންގެ ނަމުގައި ޕީއެންސީ ފޯމުތައް ފުރުމަށް ފަހު، އުމުރު ހަމަވުމުން އިލެކްޝަންސް ކޮމިޝަން (އީސީ)ން ހުށަހަޅަން ތައްޔާރުކޮށްފައިވާ ކަމަށް ކޮށްފައިވާ ތުހުމަތުތައް އިހުސާން ރޭ ދޮގުކުރައްވައިފި އެވެ.
ވީ ކިހިނެއް؟ - ޕީއެންސީއަށް މެންބަރުން އިތުރުކުރުމަށް ބޮޑު ކެމްޕެއިނެއް ފަށާފައި ވަނިކޮށް މިދިޔަ ދެ ހަފުތާއެއްހާ ދުވަހު ސޯޝަލް މިޑީއާއަށް ފެންމަތިވަމުން ދަނީ ޕީއެންސީއަށް ވަގަށް މީހުން ވައްދާ ކަމަށް ބުނާ މައްސަލަ އެވެ.
އޭގެ ތެރޭގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓެ) އާއި ކުރީގެ ސަރުކާރުގެ ހެރިޓޭޖް މިނިސްޓްރީގެ ސްޓޭޓް މިނިސްޓަރު އަދި މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު ވެސް ޕީއެންސީއަށް ވައްދާފައިވާ މައްސަލައެ ވެސް ހިމެނެ އެވެ.
ތަފްސީލް - މި އަހަރު 18 އަހަރު ފުރޭ ކުދިންގެ މައުލޫމާތު ހޯދައި އެ ކުދިން ޕީއެންސީއަށް ވައްދަން އެ ކުދިންގެ ނަމުގައި ފޯމު ފުރާފައިވާ ކަމުގެ ތުހުމަތުތައް އިހުސާނަށް ކޮށް، 'އެކްސް'ގައި ޕޯސްޓެއް ކުރެއްވީ އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދެވެ.
ވަހީދުގެ އެ ތުހުމަތަށް ރައްދު ދެއްވައި އިހުސާނު ކުރެއްވި ޕޯސްޓުގައި ވިދާޅުވީ އެފަދަ ކަމެއް ހިޔާލަށް ވެސް ނުގެންނަވާ ކަމަށެވެ. އެފަދަ ދޮގު ތުހުމަތުތައް ނުކުރެއްވުމަށް ވެސް އޭނާ އެދިވަޑައިގެންނެވި އެވެ.
"މަނިކުފާނުގެ ސަރުކާރުގައި މިކަން ކުރައްވަން
މަނިކުފާނު ވިސްނެވީތޯ؟ ހަމަ ޔަގީނުން ވެސް އަޅުގަނޑު މިހާތަނަށް ހިޔާލަށް ވެސް ނުގެންނަ ކަމެއްގެ ވާހަކަ ތިޔަ ވިދާޅުވީ. ތިބޭފުޅުން ތި ދައްކަވާ ކޮންމެ ދޮގު ވާހަކައަކަށް ޖަވާބުދޭނެ ވަގުތު ނުވަތަ ފުރުސަތު އެ މީހަކަށް ނުލިބި ވެސް ދާނެ،" އިހުސާން ކުރެއްވި ޕޯސްޓުގައި ވިދާޅުވި އެވެ.
"މީހުންގެ ބޮލުގައި މިފަދަ ބޮޑެތި ދޮގު ހަދައިގެން ކަންކަން އެޅުވުމަށް ވުރެ ތިބޭފުޅުންގެ ސިޔާސަތުތަކުގެ ރަނގަޅު ވާހަކަ ދެއްކެވުމަށް ވަގުތު ހޭދަކުރުން ރަނގަޅުވާނެ."
ފާހަގަކޮށްލެވޭ - ޕީއެންސީއަށް ވަގަށް ވައްދާފައިވާ ކަމަށް ބުނެ ސޯޝަލް މީޑިއާގައި ދައުރުކުރާ ފޯމުތަކެއްގައި ޑީއެންއާރު ހިންގުމާ ހަވާލުވެ ހުންނެވި ހޯމް މިނިސްޓްރީގެ ޑެޕިއުޓީ މިނިސްޓަރު އަހުމަދު އާލީގެ ސޮއި ހެއްކެއްގެ ގޮތުގައި އޮތުމުން ގިނަ ތުހުމަތުތަކެއް ވަނީ ކޮށްފަ އެވެ. ނަމަވެސް އެ ތުހުމަތުތަކަށް އޭނާވަނީ އިންކާރުކުރައްވާފަ އެވެ.
އޭނާ ވިދާޅުވީ ޕީއެންސީއަށް މެންބަރުން ސޮއިކޮށްފައިވާ އެއްވެސް ފޯމެއްގައި ހެކީގެ ގޮތުގައި އޭނާ ސޮއިކުރައްވާފައި ނުވާ ކަމަށެވެ. ސޯޝަލް މީޑިއާގައި އޭނާގެ ސޮއި އޮތް ފޯމުތަކެއްގެ ފޮޓޯތަކެއް ފެނުނު ކަމަށާއި އެއީ އުފައްދާފައިވާ ފޯމުތަކެއް ކަމަށް އޭނާ ގަބޫލުކުރައްވާ ކަމަށެވެ.
ޑީއެންއާރުގެ ތެރެއިން މީހުންގެ ޒާތީ މައުލޫމާތު ޕީއެންސީއަށް ދެމުންދާ ކަމަށް ތުހުމަތުކުރާ މައްސަލާގައި އޭނާ ވިދާޅުވީ އެފަދަ އެއްވެސް ނުހިނގާ ކަމަށެވެ. އަދި މީހުންގެ އައިޑީ ކާޑުގެ ކޮޕީ އެ އިދާރާގައި ރައްކާކޮށްފައި ނުހުންނާނެ ކަމަށް ވެސް އޭނާ ވިދާޅުވި އެވެ.
އެނގުން މުހިންމު - ސަރުކާރަށް އެއް އަހަރު ވުމުގެ ކުރިން 75،000 މެންބަރުން ހަމަ ކުރުމަށް ހިންގާ މެންބާޝިޕް ޑްރައިވްގެ ތެރެއިން ބައެއް މީހުންނަށް ނޭނގި އެ މީހުން ޕީއެންސީއަށް ވެއްދި ކަމުގެ ތުހުމަތު އެ ޕާޓީއަށް ދަނީ އަމާޒުވަމުންނެވެ. އެ ތުހުމަތު އަމާޒުވިތާ ދެ ހަފްތާއަށް ވުރެ ގިނަ ދުވަސް ފަހުން ޕީއެންސީން އިއްޔެ ވަނީ މިކަމާ ގުޅޭ ގޮތުން ބަޔާނެއް ނެރެ، އެ މައްސަލަ ޕާޓީ ތެރެއިން ވެސް ބަލަމުންދާ ކަމަށް ބުނެ، ދިފާއުގައި ފުރަތަމަ ފަހަރަށް ވާހަކަ ދައްކާފަ އެވެ.
ޕީއެންސީން ބުނީ ޕާޓީތަކުގެ މެމްބާޝިޕް ފޯމު ސައްހަތޯ ކަށަވަރުކުރަން ޖެހެނީ އީސީން ކަމަށާއި އެ ގާބިލުކަން ޕާޓީގައި ނެތް ކަމަށެވެ.