ރަށުގެ ސްކޫލުން ކިޔަވައި ނިމިގެން މާލެއައީ ނާސިންގ ކިޔަވާށެވެ. މާލޭގައި ހުރީ ބައްޕަގެ ވަރަށް ގާތް އެކުވެރިއެއްގެ ގޭގައެވެ. އަގުދީގެން ހުންނާނެ ފެންވަރު ނެތުމުން ނޯކަރަކަށެވެ. ގޭގެ މަސައްކަތް ކުރަމުން ކިޔެވުމަކީ ކުރަން ފަސޭހަކަމެއް ނޫން ނަމަވެސް އެހެން ގޮތެއް ނެތުމުން އައީ ހިތްވަރުކުރަމުންނެވެ. ހިތްވަރުކުރަން ހިތްވަރު ލިބެނީ ދައްތަގެ ރަނގަޅުކަމުންނެވެ.  
އެގޭގެ ދައްތަ އަކީ ވަރަށް ރަނގަޅު އަންހެނެކެވެ. ވަރަށް ހެޔޮ އަންހެނެކެވެ. ގަންނަ ހެދުންވެސް 2،3 ފަހަރު ލާފައި އަޅުގަނޑަށް ދެއެވެ. އަދި އެއިގެ އިތުރުން ދޭތެރެދޭތެރެއިން ހެދުން ގަނެވެސްދެއެވެ. ބޭނުންވާނެ އެހެންކަންކަންވެސް ކޮށްދެއެވެ. ވާހަކަދައްކާނީވެސް ވަރަށް އޯގާތެރިކަމާއިއެކުގައެވެ. އެހެންވެ ދައްތަ ދެކެ ވަރަށް ލޯބިވެއެވެ.  
އެހެން އުޅެނިކޮށް ފަހު އިމްތިޙާން ފެށެން ވަރަށް ކައިރިވެފައި ހުއްޓައި ބޭބެ، ބޭބެކަން ކަނޑާލައި އަޅުގަނޑާއި ބެހެން މަސައްކަތް ފަށައިފިއެވެ. އެހެންނަމަވެސް ކައިރިއެއް ނުވަމެވެ. އަޅުގަނޑު ބުނީ ދައްތައަކީ މަންމައެއް ފަދަ އަންހެނެއް ކަމަށާއި ތިއައީ ބައްޕަކަމަށެވެ.  
އެކަމުގެ ނަތީޖާއަކަށްވީ ދައްތަގެ ވަރަށް އަގުބޮޑު ރަންއަނގޮޓިއެއް ވަގަށް ނެގިކަމުގެ ބަދުނާމު އަޅުވާފައި ގެއިން ބޭރުކޮށްލުމެވެ. ބޭބެ އެކަންކުރީ އެކަން އެގޮތަށް ކުރާނެ ކަމަށް ބުނެފައެވެ. ގެއިން ބޭރުކޮށްލުމުން ވެސް ބޭބެ ކުރި އެއްވެސް ކަމެއްގެ ވާހަކައެއް ދައްތަ ގާތަކު ނުބުނަމެވެ. އެއީ ދެމަފިރިންގެ މެދުގައި އަޅުގަނޑާއިހުރެ މައްސަލަ ޖެހެން ބޭނުންނުވާތީއެވެ.  
ގެއިން ބޭރުކޮށްލީމާ އަޅުގަނޑު ގެންދިއައީ އެކުގައި ކިޔަވަން އުޅޭ މާލޭ ކުއްޖެކެވެ. އެގޭގައި އުޅެން ފެށުމުން އެގޭގެ މީހުންގެ ލޯބިވެސް ލިބުނެވެ. ވީމާ ދެއްވި ނިޢްމަތަށް ޝުކުރިވެރިވެގެން ކެތްތެރިވެ މަޑުންހުރީއެވެ.  
އިމްތިޙާން ހަދައި ނިމުނަތަނުން މަގުމަތިން ދައްތައާއި ބައްދަލުވިއެވެ. ހުރީ ވަރަށް ދެރަވެފައެވެ. ކަންބޮޑުވެފައެވެ. އަޅުގަނޑު ފެނުމުން ލޮލުން ކަރުނަވެސް އޮހޮރުނެވެ. އެހެންވެ ދައްތަ އެހައި ދެރަވީ ކީޢްވެގެންތޯ ސުވާލުކުރީމާ ބުނީ އަޅުގަނޑު ފޮނުވާލާފައި ގެއަށް ގެނައި އަންހެންކުއްޖަކާ ބޭބެ ގުޅުން ހިންގާކަން ފަޅާއަރައިގެން ދެމަފިރިން މައްސަލަ ޖެހުނުތަނާހެން ބޭބެެ މަސައްކަތްކުރި އޮފީހުން ކުރި ވައްކަމެއްގައި ބޭބެ ބައިވެރިވެގެން މިހާރުވެސް ވަނީ ޖަލުގައި ކަމަށެވެ.  
އެވަގުތު ބޭއިޚްތިޔާރުގައި އަޅުގަނޑަށް ބުނެވުނެވެ. "ވަގަކީ ކާކުކަން ފަޅާއަރައިފިތާއެވެ!" ދައްތަ އިތުރު ތަފްޞީލަށް އެދުމުން ހުރިހާ ވާހަކަތަކެއް ކިޔައިދިނީމާ ދައްތަ ވަރަށް ދެރަވިއެވެ. އަދި އަނބުރާ ގެއަށް ގެންދަން ބޭނުންވިއެވެ. ނަމަވެސް އަޅުގަނޑު ބުނީ އިމްތިޙާން ނިމިއްޖެކަމަށާއި މިއުޅެނީ ރަށަށްދާން ކަމަށެވެ. މާލޭގައި އުޅެން ފޫހިވެއްޖެ ކަމަށެވެ.
ދައްތަ ކުރި އާދޭހަށް ދައްތަ ގާތަށް އަނެއްކާވެސް ބަދަލުވީމެވެ. އެއީ ދައްތަގެ އެކަނިވެރިކަން ހުރި ގޮތުން އެހީތެރިވުމަށެވެ. ހިތްވަރު ދިނުމަށެވެ. އަދި އެއިރު ދެމަފިރިން ވަރިވެފައިވާތީއެވެ. އެގެއަށް ދެވުމުން ހިތަށް އެރިއެވެ. "މިގެއިން އަޅުގަނޑު ބޭރުކޮށްލީ ވަގުބަދުނާމު އަޅުވައިފައެވެ. އެކަމަކު އެނބުރި މިހިރީ ވަދެވިފައެވެ. ދެރަދިން މީހާއަކީ ބޮޑުވަގެއްކަން މިހާރު އެވަނީ ހާމަވެފައެވެ. ދައްތަ އެއުޅެނީ ދެވަނަ ކައިވެނިކުރާށެވެ. ވަގުކަލޭގެއަކަށް ދެން މިގެއަކަށް ނުވަދެވޭނެތާއެވެ!" 
މިއީ 6 އަހަރު ފަހެވެ. އަޅުގަނޑުވެސް ކައިވެނިކޮށްފީމެވެ. ކައިވެނިކުރީމާވެސް ދައްތަ އަޅުގަނޑު ދުލެއް ނުކުރިއެވެ. އުޚުތެއްފަދައިން އެބަގެންގުޅެއެވެ. ދައްތަ އެހެން މީހަކާއި ކައިވެނިކޮށް ދެދަރިންވެސް ލިބި ދިރިއުޅެނީ ވަރަށް އުފަލުގައެވެ. 
މިއީ އަޅުގަނޑުގެ ޙަޔާތުގައި ކުރަންޖެހުނު ތަޖުރިބާއެވެ. މިއަދުނޫހުގެ ކިޔުންތެރިންގެ ގާތުގައި ޚާއްޞަކޮށް އަޅުގަނޑު ފަދައިން ގޭގޭގައި އުޅެންޖެހިފައިވާ އަންހެނުންގެ ގާތުގައި ބުނެލަން ބޭނުމީ ވަޙުޝީކަން ހައްދުފަހަނައަޅާފައިވާ މިފަދަ މަކަރުވެރި ފިރިހެނުން ވަރަށް ގިނައެވެ. އެމީހުންނަށް ދީލައި ނުލާށެވެ! ﷲ މިންވަރުކުރައްވަވާ ރަޙްމަތް މާމަތިވެރިވާނެއެވެ!
 
- ޙާމިދާ / މިއަދުނޫހުގެ ކިޔުންތެރިއެއް