ޢާއިޝަތު ރަފާޙް ޢަލީ
 
ނަބިއްޔާ ޞައްލަﷲ ޢަލައިހި ވަސައްލަމް ހަދީޘްކުރެއްވިއެވެ. 
قال نبينا صلى الله عليه وسلم : ( عجب ربنا من قنوط عباده وقرب غِيَرِهِ، ينظر إليكم أزلين قنطين فيظل يضحك يعلم أن فرجكم قريب )
[އެކަލާނގެ އަޅުތަކުން އެބައިމީހުންގެ ޙާލަތު ރަނގަޅު ޙާލަތަކަށް ބަދަލުވުން ގާތްވެފައިވާއިރުވެސް، މާޔޫސްވެފައިވާލެއް ބޮޑުކަމުން އަޅަމެންގެ ވެރި ރައްބު އަޖާއިބުވެވޮޑިގަންނަވައެވެ. އެ އަޅުތަކުން ގޮތް ހުސްވެ، އުއްމީދުކެނޑިފައިވާތަން އެއިލާހަށް ފެނިވަޑައިގަނެއެވެ. އަދި މިކަމާއި ހިނިވަރުނަ ކުރައްވާ ވޮޑިގަންނަވައެވެ. އެއީ އެއަޅުތަކުން (މުޞީބާތްތަކުންނާއި ހިތާމަތަކުން) ސަލާމަތްކުރެއްވުން ކައިރީގައިވާކަމަށްޓަކައެވެ." 
ދުނިޔޭގައި ދިރިއުޅޭއިރު އިންސާނުންނަށް އެކި އެކި ކަންކަމާ ކުރިމަތިލާން ޖެހެއެވެ. ހިތްދަތި ކަންކަމާއި، އުފާވެރި ކަންކަމާްއި ދިމާވެއެވެ. ނަމަވެސް ﷲ ތަޢާލާ އަޅުގަނޑުމެންނަށް އަންގަވަނީ ހުރިހާ ޙަލަތެއްގައިވެސް ﷲ ތަޢާލާގެ މަތީން ހަނދުމަކުރުމަށެވެ. އަދި މާޔޫސް ނުވުމަށެވެ.
އަޅުގަނޑުމެން މިސާލަކަށް ބަލާނަމަ ޔޫސުފް ޢަލައިހިއްސަލާމް އެކަލޭގެފާނަށް ހިތާމަވެރި އެތައް ކަމެއް ދިމާވުމުންވެސް ﷲ ތަޢާލާއަށް ދުޢާ ދަންނަވާ، އަދި މާޔޫސްވުމެއް ނެތި ހުންނެވިއެވެ. 
ﷲ ތަޢާލާ ކީރިތި ޤުރްއާނުގައި ޔޫސުފް ސޫރަތުގެ 87 ވަނަ އާޔަތުގައި ވަޙީ ކުރައްވާފައިވެއެވެ. 
يَٰبَنِىَّ ٱذْهَبُوا۟ فَتَحَسَّسُوا۟ مِن يُوسُفَ وَأَخِيهِ وَلَا تَا۟يْـَٔسُوا۟ مِن رَّوْحِ ٱللَّهِ إِنَّهُۥ لَا يَا۟يْـَٔسُ مِن رَّوْحِ ٱللَّهِ إِلَّا ٱلْقَوْمُ ٱلْكَٰفِرُونَ ‎﴿٨٧﴾‏
މާނައީ: "އޭ އަހުރެންގެ ދަރިންނޭވެ! يوسف ގެފާނާއި، އޭނާގެ أخ އާގެ خبر އެއްވޭތޯ ތިޔަބައިމީހުން ދާށެވެ! އަދި اللَّه ގެ رحمة ން ތިޔަބައިމީހުން اميد ކަނޑައިނުލާށެވެ! (ހަމަކަށަވަރުން، كافر ވިމީހުން މެނުވީ، اللَّه ގެ رحمة ން اميد ކަނޑައެއް ނުލާނެތެވެ.) (87)" 
އެހެންކަމުން އަޅުގަނޑުމެން އަބަދުވެސް ﷲ ތަޢާލާއަށް ވަކީލުކޮށް ހެޔޮގޮތް ވުމަށް އަބަދުވެސް ހިތައް އަރުވަން ވާނެއެވެ. އެގޮތުން ހިތާމަވެރި ކަންކަން ކުރިވުމުން ނުވަތަ ކަންކަން ޙާޞިލްނުވެ މަގުތައް ބަންދު ވެއްޖެކަމަށް ހީވެއްޖެނަމަވެސް ﷲ ތަޢާލާގެ ޙަޟްރަތައް ރުޖޫޢަވެ ފާފަތައް ފުއްސަވާ ދެއްވާތޯ ދުޢާ ކުރުމަކީ ވަރަށް މުހިއްމު ކަމެކެވެ. މީގެ އިތުރުން ދުޢާ ކުރުމާއި، އިސްތިޣްފާރުކުރުން މަތީގައި ދެމިހުރުމަކީވެސް ވަރަށް މުހިއްމު ކަމެކެވެ.