ބޭންކުތަކަށް ޑޮލަރު މާރުކުރުމުގެ މިހާރުގެ ގަވާއިދަށް ބަދަލެއް ނުގެނެވޭނެ ކަމަށާއި، އަލަށް އެކުލަވާލާފައިވާ ބޭރު ފައިސާއާ ބެހޭ ބިލުގައި ހިމަނާފައިވަނީ އިސްތިސްނާ ޙާލަތްތަކެއް ކަމަށް ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުالله ހަލީލް ވިދާޅުވެއްޖެއެވެ.
ސަރުކާރަށް އެއް އަހަރު ފުރުން ފާހަގަކުރުމަށް ސޯޝަލް ސެންޓަރުގައި ކުރިޔަށް ގެންދިޔަ ޖަލްސާގައި ރައީސް ވަނީ ޑޮލަރު ގަވައިދަށް އަމަލު ކުރުން ނޫން ގޮތެއް ނެތްކަމަށާއި، އެ ގަވައިދަށް ދެން ގެންނާނެ އިތުރު ބަދަލެއް ނެތްކަމަށް ވިދާޅުވެފައެވެ.
ނަމަވެސް، މިހާރު އެކުލަވާލާފައިވާ ބޭރު ފައިސާއާ ބެހޭ ބިލަށް އާންމުންގެ ޚިޔާލު ހޯދުމަށް ހުޅުވާލުމާއެކު، އެ ބިލުގައި އޮތީ ރައީސް އޭރު ވިދާޅުވި ގޮތަށް ނޫންކަމަށް ބުނެ ބައެއް ފަރާތްތަކުން ވާހަކަ ދައްކަމުން ދިޔައެވެ.
Advertisement
މިކަމާއި ގުޅިގެން ފިރުޒުލް ކުރެއްވި ޕޯސްޓެއްގައި ވިދާޅުވެފައިވަނީ، މި ބިލުގައި ބޭންކުތަކަށް ޑޮލަރު މާރުކުރުމުގައި މިހާރުގެ ގަވާއިދުގައި އަމަލުކުރަންޖެހޭ އުސޫލަށް ބަދަލެއް ގެނެސްފައިނުވާ ކަމަށެވެ. އެގޮތުން ބިލުގެ އަށްވަނަ މާއްދާގައި ބަޔާންކޮށްފައިވަނީ ޓޫރިޒަމް ވިޔަފާރިތަކަށް ބޭރު ފައިސާއިން ލިބޭ އާމްދަނީ އެކުގައި ރާއްޖޭގައި ރަޖިސްޓްރީކޮށްފައިވާ ބޭންކަކަށް ޖަމާކުރަންޖެހޭނެ ކަމަށެވެ.
ފިރުޒުލް އިތުރަށް ވިދާޅުވީ، އަލަށް އެކުލަވައިލި ބިލުގައި ޑޮލަރުން ލިބޭ އާމްދަނީ ޖަމާކުރުން އިތުރަށް ހަރުކަށިކޮށް ފުޅާކޮށްފައިވާ ކަމަށެވެ. މިގޮތުން ޓޫރިޒަމް ވިޔަފާރި ނޫން ވިޔަފާރިތަކުގެ ތެރެއިން އަހަރަކު މަދުވެގެން 20 މިލިއަން ޑޮލަރުގެ އާމްދަނީ ލިބޭ ވިޔަފާރިތަކުންވެސް އެ ފަރާތްތަކަށް ލިބޭ ބޭރު ފައިސާގެ އާމްދަނީ ދިވެހިރާއްޖޭގެ ބޭންކަކަށް ޖަމާކުރަންޖެހޭނެ ކަމުގައި ބަޔާންކޮށްފައިވާ ކަމަށް ވިދާޅުވިއެވެ.  
ހަމަ އެހެންމެ، ޑޮލަރުން ލިބޭ އާމްދަނީ ޖަމާކުރުން އިތުރަށް ހަރުކަށިކޮށް ފުޅާކޮށް، ޓޫރިޒަމް ވިޔަފާރި ނޫން ވިޔަފާރިތަކުގެ ތެރެއިން އަހަރަކު މަދުވެގެން 20 މިލިއަން ޑޮލަރުގެ އާމްދަނީ ލިބޭ ވިޔަފާރިތަކުންވެސް އެ ފަރާތްތަކަށް ލިބޭ ބޭރު ފައިސާގެ އާމްދަނީ ދިވެހިރާއްޖޭގެ ބޭންކަކަށް ޖަމާކުރަންޖެހޭނެ ކަމުގައި އެ ބިލުގައި ބަޔާންކޮށްފައިވެއެވެ. އަދި އެ ފަރާތްތަކުން %25 މާރުކުރަންވެސް ލާޒިމުކޮށްފައިވެއެވެ.
އައު ބިލުގައި އުސޫލަށް ގެނައި ހަމައެކަނި ބަދަލަކީ، 50 އެނދަށްވުރެ ގިނަ އެނދު ހުންނަ ގެސްޓުހައުސް އަދި ސިޓީ ހޮޓާތަކާއި، ޓޫރިސްޓު އުޅަނދުތައް 25 ޑޮލަރު މާރުކުރާ ކެޓަގަރީއަށް ބަދަލުކުރުން ކަމަށް ފިރުޒުލް ވިދާޅުވިއެވެ.
މީގެއިތުރުން، ގަވާއިދުގައި ނެތް އައު ކަމެއްގެ ގޮތުގައި މި ބިލުގައި ތައާރަފުކޮށްފައިވަނީ ތިން އިސްތިސްނާ ހާލަތެއް ކަމަށް ފިރުޒުލް ފާހަގަކުރެއްވިއެވެ. އެއީ އެ ތިން ބާވަތެއްގެ ފަތުރުވެރިން ޑޮލަރު މާރުކުރާއިރު ހިމަނަންނުޖެހޭ ގޮތަށް ހިމަނާފައިވާ އިސްތިސްނާތަކެކެވެ.
މި އިސްތިސްނާތަކުގެ ތެރޭގައި ހިމެނެނީ:
1. ގިނަވެގެން 24 ގަޑިއިރު ހޭދަނުކުރާ ޓޫރިސްޓުން
2. އުމުރުން ދެ އަހަރު ފުރިހަމަނުވާ ކުޑަކުދިން
3. ހިލޭ ނުވަތަ ކޮމްޕްލިމެންޓަރީކޮށް ތިބޭ ފަރާތްތައް
މި ބިލު މިހާރު ވަނީ އާންމުންގެ ޚިޔާލު ހޯދުމަށް ހުޅުވާލާފައެވެ: