ރާއްޖޭގައި އުފެދުނު ދީނީ ޢިލްމުވެރިންގެ ތެރެއިން ބީއޭ ނަސީމަކީ ވަރަށް ގިނަ ގޮތްގޮތުން ފާހަގަކޮށްލެވޭ ބޭފުޅެކެވެ. ދީނީ ޢިލްމްވެރިންގެ ވާޖިބަކީ ކޮބައިކަން އުންމަތަށް ދައްކަވައި ދެއްވި ހަރުދަނާ ޝަޚްޞިއްޔަތެކެވެ. 
އެގޮތުން ޢިލްމުވެރިން ވާންޖެހޭނީ ސަރުކާރުގެ ތެރެއިން ލިބޭ މަންފާއަށް ބަލާބައަކަށް ނޫންކަމާ ޢިލްމްވެރިން ތިބެންޖެހޭނީ ﷲ ތަޢާލާގެ މަގުގައި ޘާބިތުވެކަން ޢަމަލުފުޅުން ދައްކަވައި ދެއްވެވިއެވެ. 
ދާދިފަހުން ފެނިގެންދިއައީ އަތަށް ފައިސާއަރަން ފެށީމާ، ޕާޓީގެ ބައަކަށް ބޮޑެތި މަޤާމުތަކާ ބޮޑު މުސާރަ ލިބެންފެށީމާ ލާދީނީ ކުއްލިއަކަށް ދީނީއަށް ބަދަލުކޮށްލިތަނެވެ. މިހާރު ފެންނަމުންދަނީ ސަރުކާރުގެ އިސްމަޤާމެއް ނުލިބުމުން ﷲ ތަޢާލާގެ މަގުގައި ސަރުކާރުން ކުރާ ރަނގަޅު ކަންކަން ބަލައިނުގަނެވިގެން އުޅޭތަނެވެ. ސަރުކާރު ހިންގާ ޕާޓީގައި ތިބެގެންވެސް ތަފާތު ގޮތްގޮތަށް ގޭސްގަނޑު އަނބުރަމުން ހިނގާ ތަނެވެ. 
ބީއޭ ނަސީމް ޢަމަލުފުޅު ކުރެއްވެވި ގޮތް މުޅިން ތަފާތެވެ. ސަރުކާރުގެ ތެރެއިން ދީނާ ދެކޮޅު ކަންކަން ފެނިވަޑައިގަތުމުން އިޞްލާޙްކުރަން ވިދާޅުވީމާ އެކަން އިޞްލާޙް ނުކުރީމާ އެއިރު ހުންނެވި ސަރުކާރުގެ ބޮޑު މަޤާމާއި ލިބިވަޑައިގަންނަވަމުން އައި ބޮޑު މުސާރަވެސް ދޫކޮށްލެއްވީއެވެ. ﷲ ތަޢާލާގެ މަގުގައި ޘާބިތުވެވަޑައިގަތީއެވެ. 
ތިރީގައި އެވަނީ 18 ސެޕްޓެމްބަރު 2022 ގައި ބީއޭ ނަސީމް އަވަހާރަވުމުން މިއަދުނޫހުގައި ޝާއިޢުކުރި ލިޔުމެވެ.
ޢިލްމުވެރިޔާގެ ޙަޔާތްޕުޅާއިމެދު މުހިންމު ބައެއް ކަންކަން އެލިޔުމުން އެނގިވަދައިގަންނަވާނެއެވެ. انشاالله
ރާއްޖޭގައި އިސްލާމް ދީނަށް ޢަމަލުކުރެއްވުމުގައި ވަރަށް ފުރިހަމަ ނަމޫނާއެއް ދައްކަވައިދެއްވި މަޝްހޫރު ދީނީ ޢިލްމުވެރިޔާ އައްޝައިބީއޭ ނަސީމް (ހ.ޕޫނަމް) އަވަހާރަވެއްޖެއެވެ. ޝައިޚް އަވަހާރަވީ ރޭ ފަތިސްވާން ވަރަށް ގާތްވެފައިވަނިކޮށެވެ. 
ޝައިޚް ނަސީމަކީ އިސްލާމް ދީނުގެ ކަންކަމުގައި ކަންކަން އޮންނަ ގޮތަށް ޙައްޤަށް ބަސްފުޅު ވިދާޅުވާތީ ރައީސް މައުމޫނުގެ ވެރިކަމުގައި އެންމެ ގިނައިން ބަންދުކޮށް އަނިޔާލިބިވަޑައިގެންނެވި ޢިލްމުވެރިއެކެވެ. 
އެކަންކަމުގެ ސަބަބުން އެމްޑީޕީ އުފެދިގެން އައި ދުވަސްވަރު އެޕާޓީ އާއި ގުޅިވަޑައިގެންނެވިއެވެ. ރައީސް ނަޝީދަށް ވެރިކަން ލިބިވަޑައިގަތުމުން އެމަނިކުފާނަށް ދީނީ ކަންކަމުގައި ލަފާއެރުވުމަށް ރައީސުލްޖުމްހޫރިއްޔާގެ އޮފީހުން އިސްމަޤާމެއްވެސް ދެއްވިއެވެ. ނަމަވެސް ރައީސް ނަޝީދުގެ ވެރިކަމުގައި އިސްލާމް ދީނުގެ ކަންކަން ކުރިއަށް ގެންދެވި ގޮތާއިމެދު ހިތްޕުޅު ހަމަޖެހިވަޑައިނުގަތުމުން ވަނީ އިސްތިޢުފާ ދެއްވައިފައެވެ. 
މީސްމީހުންނަށް ވަރުވާއަށް ލިޔެދީފައި ހުރި ރަށްތަކުގައި ރިޒޯޓް ތަރައްޤީކުރުމަށް މިލިއަނުން ރަށްލިޔުއްވައިގެން އުޅޭ ފަރާތަށް ޑޮލަރު ލިބުނު ދުވަސްވަރު ކ. ތުލުސްދޫ ކައިރީގައި އޮންނަ ކުޑަވިލިގިނގިލީގައި ރިޒޯޓެއް ތަރައްޤީ ކުރަން މިލިއަނުން ހުށަހެޅި ޑޮލްރުތައް، ރަށުގައި ބަނގުރަލާއި އޫރުމަހުގެ ވިޔަފާރިކުރާނެތީ އެކަން ޤަބޫލުފުޅު ނުކުރައްވާކަމަށް ވިދާޅުވެ ދެއްވީ ކުކުޅު ގެންގުޅޭށެވެ. 
ޝައިޚް ބީއޭ ނަސީމަކީ އިސްލާމް ދީނަށް ވަރަށް އަގުހުރި ޚިދުމަތްތަކެއް ކޮށްދެއްވި ޢިލްމުވެރިއެކެވެ. ޝައިޚް ވަނީ ވަރަށް ގިނަ ފޮތްތަކާއި ލިޔުންތައް ލިޔުއްވައި ދީނީ ހޭލުންތެރިކަން އިތުރުކުރަން ވަރަށް އަގުހުރި ޚިދުމަތްތަކެއް ކުރައްވައިފައިވާ ޢިލްމުވެރިއެކެވެ. ހުރިހާ ގޮތަކުންވެސް ވަރަށް ފުރިހަމަ ނަމޫނާ ޢިލްމުވެރިއެކެވެ. 
ޝައިޚް ބީއޭ ނަސީމް ދުނިޔެދޫކުރެއްވީ ވަރަށް ގިނަ ދުވަހު އާލާސްކަންފުޅާއި އުޅުއްވުމަށްފަހުގައެވެ. ގާތް އެކުވެރިން ވިދާޅުވާ ގޮތުގައި މިހާރުގެ ޢުމުރުފުޅު 82،83 އަހަރުވަރުވާނެއެވެ. 
މާތް ﷲ މަރުޙޫމްގެ ފުރާނައަށް ސުވަރުގޭގެ މަތިވެރި ނިޢްމަތް މިންވަރުކުރައްވަވާށި! ޢާއިލާއަށް ކެތްތެރިކަން މިންވަރުކުރައްވަވާށި! އާމީން